មិត្ត Jin អ្នកគ្រូភាសាថៃ

រហូតមកដល់ពេលនេះ មហាវិទ្យាល័យទាំងពីរបានអនុវត្តន៍ខ្លឹមសារសហប្រតិបត្តិការមួយចំនួន ដូចជា៖ ការផ្លាស់ប្ដូរនិស្សិតដើម្បីបន្តការសិក្សា និងស្រាវជ្រាវ។ ជារៀងរាល់ឆ្នាំ មហាវិទ្យាល័យ Mahasarakham បានបញ្ជូននិស្សិត ចំនួនពី ២ ដល់ ៣ នាក់ ដែលមានជំនាញ គរុកោសល្យភាសាថៃមកផ្សព្វផ្សាយវប្បធម៌ និងភាសាថៃដល់និស្សិតវៀតណាម នៅមជ្ឈមណ្ឌលវប្បធម៌ និងភាសាថៃ នៃមហាវិទ្យាល័យ HANU ។

នៅក្នុងថ្នាក់រៀនភាសាថៃ នៃ មជ្ឈមណ្ឌលវប្បធម៌ និងភាសាថៃ នៃ មហាវិទ្យាល័យ HANU នោះ មិត្ត Jin-និស្សិតឆ្នាំទី ៤ ជំនាញភាសាថៃ ដេប៉ាតឺម៉ង់មនុស្សសាស្ត្រ នៃមហាវិទ្យាល័យ Mahasarakham កំពុងជក់ចិត្តបង្ហាត់បង្រៀនរបាំប្រពៃណីថៃដល់និស្សិតឆ្នាំទី ៣ ជំនាញភាសាថៃ នៃ មហាវិទ្យាល័យ HANU។ ក្នុងសម្លៀកបំពាក់ អាវពណ៌ស ខោរាងម៉ូដថៃនោះ Jin កំពុងបង្ហាត់បង្រៀនក្បាច់រាំដល់និស្សិតចំនួន ១០នាក់។ Jin គឺជានិស្សិតមួយរូប ក្នុងចំណោមនិស្សិតទាំង ៣ រូប នៃមហាវិទ្យាល័យ Mahasarakham ដែលត្រូវបានបញ្ជូនមកវៀតណាមដើម្បីបង្ហាត់បង្រៀនភាសាថៃ និងវប្បធម៌ថៃនៅ HANU ក្នុងរយៈពេល ៤ ខែសម្រាប់ឆ្នាំសិក្សា ២០១៨ - ២០១៩។ Jin បានសំណេះសំណាលថា៖

“ប្អូនសប្បាយចិត្តណាស់ ដោយបានបង្ហាត់បង្រៀនរបាំដល់និស្សិតវៀតណាម។ ប្រជាជនវៀតណាមភាគច្រើនគឺកម្ររាំណាស់។ ប៉ុន្តែ និស្សិត វៀតណាម ឧស្សាហ៍ព្យាយាម និងខិតខំប្រឹងប្រែងណាស់។ទោះបីជាទើបនឹងបានរៀនរយៈពេល ១ ខែក៏ដោយ ប៉ុន្តែ និស្សិតវៀតណាមរាំបានស្អាតណាស់។ លើសពីនេះទៅទៀត ប្អូនក៏បានបង្ហាត់បង្រៀនការសន្ទនាជាភាសាថៃទៀតផង”។

សកម្មភាពរាំរបាំថៃ

សកម្មភាព ដែល Jin កំពុងចូលរួម គឺស្ថិតក្នុងកម្មវិធីទទួលនិស្សិតពី មហាវិទ្យាល័យ Mahasarakham មកមហាវិទ្យាល័យហាណូយដើម្បីបង្រៀនវប្បធម៌ និងភាសាដល់និស្សិតភាសាថៃ។ រហូតមកដល់ពេលនេះ មាននិស្សិតថៃចំនួន ១៥ នាក់ បានមកចុះកម្មសិក្សា និងបង្រៀនភាសាថៃនៅ HANU។ មិត្ត Milk ជានិស្សិតមួយរូប ដែលបានចូលរួមការបង្រៀនភាសា និងវប្បធម៌ថៃដល់និសិស្សិត HANU បានឲ្យដឹងថា៖

“និស្សិតវៀតណាមបានចូលរួមសកម្មភាពនៅថ្នាក់រៀនយ៉ាងសកម្មណាស់។ ប្អូនមិនត្រឹមតែបង្រៀនភាសាថៃប៉ុណ្ណោះតែ ថែមទាំងឧទ្ទេសនាមអំពីរបៀបធ្វើម្ហូបថៃ របៀបចិតផ្លែឈើថៃ និងការរាំរបាំថៃទៀតផង។ និស្សិតវៀតណាមចិតផ្លែឈើពិតជាស្អាតណាស់។ ប្រការនេះធ្វើឲ្យប្អូនចាប់អារម្មណ៍ខ្លាំងណាស់។“

ទោះបីជានិយាយភាសាខុសគ្នាក៏ដោយ ប៉ុន្តែនិស្សិតភាសាថៃសុទ្ធតែខិតខំប្រឹងប្រែង និងផ្ដោតអារម្មណ៍លើមេរៀន។ ចំពោះនិស្សិតទាំងនេះ ការសិក្សាភាសាថៃបានក្លាយទៅជាភាពជិតស្និទ្ធនឹងងាយស្រួលជាង តាមរយៈការពន្យល់ និងបង្ហាត់បង្រៀនដោយអស់ពីចិត្តពីថ្លើមរបស់អ្នកគ្រូជនជាតិថៃ។ និស្សិតវៀតណាមមួយរូបបានចែករំលែកថា៖

“ក្នុងថ្នាក់រៀន អ្នកគ្រូតែងតែរៀបចំសកម្មភាព និងល្បែងនានា ដើម្បីលើកកម្ពស់ការយល់ដឹងសម្រាប់ប្អូន។ លើសពីនេះទៅទៀត អ្នកគ្រូជនជាតិថៃក៏បានជួយប្អូន កែសម្លេងឲ្យបានត្រឹមត្រូវ។ ប្អូនមានអារម្មណ៍ថា ប្រទេសថៃពិតជាស្និតស្នាលណាស់“។

ដោយមានភាពរួសរាយរាក់ទាក់ និងជិតស្និទ្ធនោះ ថ្នាក់រៀនភាសាថៃតែងតែពោរពេញទៅដោយសេចក្ដីសប្បាយរីករាយ និងស្នាមញញឹម។ ទន្ទឹមនឹងនេះ ចំនួននិស្សិត ដែលចុះឈ្មោះសិក្សាភាសាថៃក៏កើនឡើងផងដែរ។ វាយតម្លៃអំពីប្រសិទ្ធភាព និងយថាទស្សន៍អំពីកិច្ចសហប្រតិបត្តិការទ្វេភាគីនោះ លោកស្រី Tran Cam Tu អ្នកគ្រូបង្រៀនភាសាថៃ នៃមជ្ឈមណ្ឌលភាសា និងវប្បធម៌ថៃបានឲ្យដឹងថា៖

“យើងខ្ញុំបានសហការជាមួយមហាវិទ្យាល័យថៃជាច្រើនណាស់ ដូចជា៖ មហាវិទ្យាល័យ Mahasarakham  មហាវិទ្យាល័យ Khon Ken  និងមហាវិទ្យាល័យ Rangsit Sirakharinvirot ។ ក្នុងនោះ យើងខ្ញុំបានសហការជាមួយមហាវិទ្យាល័យ Mahasarakham តាំងពីយូរណាស់មកហើយ។ មហាវិទ្យាល័យ Mahasarakham ស្ថិតនៅ ភាគឦសានប្រទេសថៃ ដែលមានសហគមន៍ជនវៀតណាមជាច្រើនបានសិក្សា និងធ្វើការ។ ហេតុដូច្នេះហើយ សាលានេះមានកម្មវិធីបណ្ដុះបណ្ដាលអំពីភាសា និងវប្បធម៌អាស៊ានជាច្រើន ដែលក្នុងនោះមានវៀតណាមផងដែរ“។

លោក Nguyen Van Trao នាយកមហាវិទ្យាល័យហាណូយបានឲ្យដឹងថា៖ តាមផែនការ HANU កំពុងឆ្នោះទៅការដាក់បញ្ជូលភាសាថៃទៅក្នុងកម្មវិធីសិក្សា ដូចជាជំនាញសំខាន់មួយដែរ។ ទន្ទឹមនឹងនេះ កិច្ចសហប្រតិបត្តិការជាមួយ មហាវិទ្យាល័យ Mahasarakham ក៏ជាគោលនយោបាយមួយរបស់សាលា ដើម្បីអនុវត្តន៍ផែនការខាងលើឲ្យបានឆាប់ៗ ក៏ដូចជារួមចំណែកនាំវប្បធម៌ និងភាសាថៃខិតមកជិតនិស្សិតវៀតណាមផងដែរ៕