ប្រធានាធិបតីអាមេរិក លោក Donald Trump និងសមភាគីរុស្ស៊ីលោក Putin

សេចក្តីប្រកាសនេះត្រូវបានលោក Trump លើកឡើងនៅក្នុងសន្និសិទកាសែតនៅសេតវិមាន ជាងមួយថ្ងៃបន្ទាប់ពីលោកមានជំនួបជាមួយសមភាគីរុស្ស៊ីលោក Putin នៅក្នុងសន្និសីទកំពូលទ្វេភាគីនៅទីក្រុង Helsinki ប្រទេសហ្វាំងឡង់។ ថ្នាក់ដឹកនាំអាមេរិកបានឲ្យដឹងថា ក្នុងជំនួបដាច់ដោយឡែកជាមួយប្រធានាធិបតីលោក Putin ភាគីទាំងពីបានពិភាក្សាអំពីបញ្ហាកូរ៉េខាងជើង មជ្ឈឹមបូព៌ា ជាពិសេសគឺវិបត្តិស៊ីរី និងមហិច្ឆតានុយក្លេអ៊ែររបស់អ៊ីរ៉ង់។ លោក Trump បានសម្តែងក្ដីសង្ឃឹមថានៅពេលវេលាណាមួយនោះអ៊ីរ៉ង់នឹងទាក់ទងជាមួយ អាមេរិកហើយភាគីទាំងពីរអាចឈានដល់ការព្រមព្រៀងមួយ។ លើសពីនេះទៀតលោក Trump បានបន្តថា លោកនឹងសមភាគីលោក Putin បានពិភាក្សាអំពីការកាត់បន្ថយអាវុធនុយក្លេអ៊ែរនៅទូទាំងពិភពលោក។

ក៏នៅក្នុងសន្និសីទកាសែតនេះ ប្រធានាធិបតីអាមេរិក លោក Donald Trump បានឡើងសម្លេងទទួលស្គាល់សន្និដ្ឋានរបស់ទីភ្នាក់ងារចារកម្មនៃប្រទេសខ្លួន ដែលថាថា រុស្ស៊ីបានធ្វើអន្តរាគមន៍ចូលក្នុងការបោះឆ្នោតប្រធានាធិបតីអាមេរិកឆ្នាំ ២០១៦ ផងដែរ៕