ຜູ້ແທນປະຊາຊົນ ແລະ ໂຄງການດຳເນີນງານຮັບໃຊ້ປະຊາຊົນ

ສະ​ມາ​ຊິກ​ສະ​ພາ​ແຫ່ງ​ຊາດຊຸດ​ທີ 14 ແລະ ​ສະ​ມາ​ຊິກສະ​ພາ​ປະ​ຊາ​ຊົນ​ຂັ້ນ​ຕ່າງໆ​ອາ​ຍຸ​ການ 2016-2021 ​ທີ່ຈະໄດ້​ຮັບ​ການ​ເລືອກ​ເຟັ້ນ​ຈາກຜູ້​ມີ​ສິດ​ເລືອກ​ຕັ້ງ​ໃນ​ວັນ​ທີ 22/5 ຈະ​ເປັນ​ຕົວ​ແທນ​ໃຫ້​ແກ່​ເຈດ​ຈຳ​ນົງ ແລະ ຄວາມມຸ່ງ​ຫວັງ​ຂອງ​ປະ​ຊາ​ຊົນ​ໃນ​ບັນ​ດາ​ອົງ​ການ​ສຳ​ນັກ​ງານ​ສິດ​ອຳ​ນາດ​ແຫ່ງ​ລັດ​ຢູ່​ຂັ້ນ​ສູນ​ກາງ ແລະ ທ້ອງ​ຖິ່ນ. ຜູ້​ມີ​ສິດ​ເລືອກ​ຕັ້ງມີ​ຄວາມ​ຫວັງ​ວ່າ ບັນ​ດາ​ຜູ້​ແທນ​ປະ​ຊາ​ຊົນ​ຍາມ​ໃດ​ກໍ​ຕ້ອງ​ມີ​ຈິດ​ສຳ​ນຶກ ແລະ ກະ​ທຳ​ເພື່ອ​ສິດ​ຜົນ​ປະ​ໂຫຍດ​ຂອງ​ປະ​ຊາ​ຊົນ ແລະ ປະ​ເທດ​ຊາດ, ຕອບ​ສະ​ໜອງ​ຄວາມ​ຮຽກ​ຮ້ອງ​ຕ້ອງ​ການ​ໃນ​ການກໍ່​ສ້າງ​ລັດ​ແຫ່ງ​ອຳ​ນາດ​ກົດ​ໝາຍ​ສັງ​ຄົ​ມ​ນິ​ຍົມຫວຽດ​ນາມ​ຂອງ​ປະ​ຊາ​ຊົນ, ໂດຍ​ປະ​ຊາ​ຊົນ ແລະ ເພື່ອ​ປະ​ຊາ​ຊົນ.

ຜູ້ແທນປະຊາຊົນ ແລະ ໂຄງການດຳເນີນງານຮັບໃຊ້ປະຊາຊົນ - ảnh 1
ຜູ້​ມີ​ສິດ​ເລືອກ​ຕັ້ງ​ຢູ່​ແຫ່ງ​ຕ່າງໆ​ໃນແຂວງກວາງ​ນິງ​ໄປ​ບ່ອນ​ບັດ

   ການ​ເລືອກ​ຕັ້ງ ສະ​ມາ​ຊິກ​ສະ​ພາ​ແຫ່ງ​ຊາດຊຸດ​ທີ 14 ແລະ ​ສະ​ມາ​ຊິກສະ​ພາ​ປະ​ຊາ​ຊົນ​ຂັ້ນ​ຕ່າງໆ​ອາ​ຍຸ​ການ 2016-2021 ແມ່ນ​ເຫດ​ການ​ການ​ເມືອງ​ທີ່​ສຳ​ຄັນ​ຂອງ​ປະ​ເທດ​ຊາດ, ແມ່ນ​ໂອ​ກາດ​ເພື່ອ​ໃຫ້​ຜູ້​ມີ​ສິດ​ເລືອກ​ຕັ້ງເລືອກ​ເຟັ້ນ​ເອົາ​ບັນ​ດາ​ຜູ້​ດີ​ເດັ່ນ, ສົມ​ກັບ​ເປັນ​ຕົວ​ແທນ​ແຫ່ງ​ເຈດ​ຈຳ​ນົງ, ຄວາມ​ມຸ່ງ​ມາດ​ປາດ​ຖະ​ໜາ​ ແລະ ສິດ​ເປັນ​ເຈົ້າ​ຂອງ​ຕົນ​ເພື່ອ​ຕິດ​ຕາມກວດ​ກາ, ສ້າງ​ກົດ​ໝາຍ ແລະ ພິ​ຈາ​ລະ​ນາ, ຕົກ​ລົງ​ບັນ​ດາ​ບັນ​ຫາ​ສຳ​ຄັນ​ຂອງ​ປະ​ເທດ​ຊາດ, ຂອງ​ທ້ອງ​ຖີ່ນ​ໃນ​ອາ​ຍຸ​ການ 5 ປີ 2016-2021.

    ພາ​ລະ​ກຳ​ອັນ​ໃຫຍ່ຫຼວງ​ຂອງ​ຜູ້​ໄດ້​ຮັບ​ເລືອກ​ຕັ້ງ​ເປັນ​ຕົວ​ແທນ​ໃຫ້ປະ​ຊາ​ຊົນ

   ແນວ​ຄິດຖື​ປະ​ຊາ​ຊົນ​ເປັນ​ກົກ ແມ່ນ​ຄວາມ​ຕ້ອງ​ການ​ໃນ​ການ​ເຄື່ອນ​ໄຫວ​ຂອງ​ສະ​ພາ​ແຫ່ງ​ຊາດ ແລະ ສະ​ມາ​ຊິກ​ສະ​ພາ​ແຫ່ງ​ຊາດແຕ່​ລະ​ຄົນ ກໍ​ຄື​ຂອງ​ອົງ​ການ​ອຳ​ນາດ​ແຫ່ງ​ລັດຢູ່​ທ້ອງ​ຖິ່ນ. ການ​ຜູກ​ຮັດ​ຢ່າງ​ສະ​ໜິດ​ແໜ້ນ​ກັບຜູ້​ມີ​ສິດ​ເລືອກ​ຕັ້ງ ແລະ ປະ​ຊາ​ຊົນ, ຮັບ​ຟັງ​ຄວາມ​ມຸ່ງ​ມາດ​ປາດ​ຖະ​ໜາ​ຂອງຜູ້​ມີ​ສິດ​ເລືອກ​ຕັ້ງ ແລະ ປະ​ຊາ​ຊົນ ຈະ​ປະ​ກອບ​ສ​່ວນ​ສ້າງ​ກຳ​ລັງ​ແຮງ​ໃຫ້​ແກ່​ສະ​ພາ​ແຫ່ງ​ຊາດ ແລະ ສະ​ພາ​ປະ​ຊາ​ຊົນ, ຮັບ​ປະ​ກັນ​ເພື່ອ​ໃຫ້​ບັນ​ດາ​ອົງ​ການ​ສຳ​ນັກ​ງານນີ້ ຕິດ​ພັນ​ກັບ​ການ​ເຄື່ອນ​ເໜັງ​ຂອງ​ຊີ​ວິດ​ເສດ​ຖະ​ກິດ-ສັງ​ຄົມ, ມີ​ບັນ​ດາ​ລັດ​ຖະ​ນະ​ໂຍ​ບາຍ​ອັນ​ຖືກ​ຕ້ອງ, ທັນ​ການ, ຕິດ​ແທດ​ຕົວ​ຈິງ, ເໝາະ​ສົມ​ກັບ​ຈິດ​ໃຈ​ຂ​ອງ​ປະ​ຊາ​ຊົນ. ບົນ​ຈິດ​ໃຈ​ດັ່ງ​ກ່າວ, ບັນ​ດາ​ໂຄງ​ການ​ດຳ​ເນີນງ​ານ​ຈ​ຂອງ​ບັນ​ດາ​ຜູ້​ສະ​ໝັກ​ຮັບ​ເລືອກ​ຕັ້ງໄດ້​ສະ​ແດງ​ໃຫ້​ເຫັນ​ເຈດ​ຈຳ​ນົງ, ຄວາມ​ຕັດ​ສິນ​ໃຈ​ເພື່ອ​ສະ​ພາ​ແຫ່ງ​ຊາດ​ປ່ຽນ​ແປງ​ໃໝ່, ມີ​ຄວາມ​ສາ​ມາດ​ຢ່າງ​ພຽງ​ພໍ​ເພື່ອ​ແບກ​ຫາບ​ໜ້າ​ທີ່​ຂອງ​ອົງ​ການ​ນິ​ຕິ​ບັນ​ຍັດ​ຂອງ​ປະ​ຊາ​ຊົນ, ໂດຍ​ປະ​ຊາ​ຊົນ ແລະ​ເພື່ອ​ປະ​ຊາ​ຊົນ.          ທ່ານ​ຫງວຽນ​ເລີມ​ແທ່ງ ຮອງ​ປະ​ທານ​ສະ​ພາ​ຊົນ​ເຜົ່າ​ຂອງ​ສະ​ພາ​ແຫ່ງ​ຊາດ​ຫວຽດ​ນາມ ຖື​ວ່າ :

     “ ຂ້າ​ພະ​ເຈົ້າ​ຄິດ​ວ່າ ຖ້າ​ຫາກ​ໄດ້​ຮັບ​ການ​ເລືອກ​ຕັ້ງ, ປະ​ຊາ​ຊົນ ແລະ ຜູ້​ມີ​ສິດ​ເລືອກ​ຕັ້ງຈະ​ເປັນ​ຜູ້​ຕິດ​ຕາມ​ຢ່າງ​ໃກ້​ຊິດ​ກ່ຽວ​ກັບ​ການ​ເຄື່ອນ​ໄຫວ​ຂອງ​ຜູ້​ແທນ​ປະ​ຊາ​ຊົນ​ຊຶ່ງ​ເຂົາ​ເຈົ້າໄດ້​ຮັບ​ການ​ເລືອກ​ຕັ້ງ​ໂດຍ​ຜ່ານ​ບັນ​ດາ​ການ​ເຄື່ອ​ນ​ໄຫວ​ໃນ​ກອງ​ປະ​ຊຸມ​ສະ​ພາ​ແຫ່ງ​ຊາດຫຼື​ໃນ​ກອງ​ປະ​ຊຸມ​ຂອງ​ສະ​ພາ​ປະ​ຊາ​ຊົນຫຼື​ດ້ວຍ​ການ​ເ​ຄື່ອນ​ໄຫວ​ລະ​ອຽດຂອງ​ຜູ້​ແທນ​ປະ​ຊາ​ຊົນເມື່ອ​ປະ​ກອບ​ສ່ວນ​ເຂົ້າໃນ​ວິ​ວັດ​ການ​ພັດ​ທະ​ນາ​ເສດ​ຖະ​ກິດ​ສັງ​ຄົມ​ຂອງ​ທ້ອງ​ຖິ່ນ. ພິ​ເສດ, ບັນ​ດາ​ອົງ​ການ​ສື່ມວນ​ຊົນ​ແມ່ນ​ມີ​ບົດ​ບາດ​ສາ​ຄັນ​ໃນ​ການ​ໜູ​ນ​ຊ່ວຍ​ຜູ້​ແທນ​ປະ​ຊາ​ຊົນ​ປະ​ຕິ​ບັດ​ຄຳ​ໝັ້ນ​ໝາຍ​ຂອງ​ຕົນ ແລະ ຜ່ານທາງ​ສື່ມວນ​ຊົນ, ຜູ້​ມີ​ສິດ​ເລືອກ​ຕັ້ງສາ​ມາດ​ຕິດ​ຕາມ​ການ​ເຄື່ອນ​ໄຫວ​ຂອງ​ຜູ້​ແທນ​ປະ​ຊາ​ຊົນ ”

     ສົມ​ກັບ​ຄວາມ​ເຊື່ອ​ໝັ້ນ​ຂອງ​​ຜູ້​ສະ​ໝັກ​ຮັບ​ເລືອກ​ຕັ້ງ

      ຄວາມ​ຄອງ​ຄອຍອັນ​ໃຫຍ່ຫຼວ​ງ​ທີ່​ສຸດ​ຂອງ​ຜູ້​ມີ​ສິດ​ເລືອກ​ຕັ້ງແມ່ນ​ປະ​ເທດ​ຊາດ​ນັບ​ມື້​ນັບ​ພັດ​ທະ​ນາ, ຊີ​ວິດ​ການ​ເປັນ​ຢູ່​ຂອງ​ປະ​ຊາ​ຊົນ​ນັບ​ມື້​ນັບ​ໄດ້​ຮັບ​ການ​ປົວ​ແປງ. ພ້ອມ​ກັນ​ນັ້ນ, ​ຜູ້​ມີ​ສິດ​ເລືອກ​ຕັ້ງຍາມ​ໃດ​ກໍ​ມີ​ຄວາມ​ຫ​ວັງ​ມີ​ສິ່ງ​ທີ່​ແທດ​ຈິງ​ໃນ​ເຂດ​ຊຸມ​ຊົນ​ທີ່​ຕົນ​ຢູ່​ອາ​ໄສ ແລະ ເຮັດ​ວຽກ. ບັນ​ດາ​ຄວາມ​ມຸ່ງ​ຫວັງຂອງຜູ້​ມີ​ສິດ​ເລືອກ​ຕັ້ງ, ເຖິງວ່າ​ໃນ​ລະ​ດັບ​ມະ​ຫາ​ພາກຫຼື​ຈຸນ​ລະ​ພາກ​ກໍ​ຕາມ ແຕ່​ກໍ​ລ້ວນ​ແຕ່​ໄດ້​ຝາກ​ຝັງ​ຕໍ່​ບັນ​ດາ​ຜູ້​ໄດ້​ຮັບ​ການ​ເລືອກ​ຕັ້ງ. ທ່ານ​ເຈີນ​ເຟືອກ​ສາວ ຜູ້​ມີ​ສິດ​ເລືອກ​ຕັ້ງຢູ່​ຮ່າ​ໂນ້ຍ ໃຫ້​ຮູ້​ວ່າ :

 “ ເພື່ອ​ເລືອກ​ເອົາ​ຜູ້​ແທນ​ປະ​ຊາ​ຊົນ, ພວກ​ຂ້າ​ພະ​ເຈົ້າ​ຕ້ອງ​ເລືອກ​ເຟັ້ນ​ເອົາຜູ້​​ທີ່ສາ​ມາດ​ເປັນ​ຕົວ​ແທນ​ປະ​ຊາ​ຊົນ​ໄດ້ ແລະ ເປັນ​ຕົວ​ແທນ​ປະ​ຊາ​ຊົນ​ຢູ່ນີ້​ແມ່ນ​ອີງ​ບົນ​ພື້ນ​ຖານ​ເຮັດ​ວຽກ​ເພື່ອ​ປະ​ຊາ​ຊົນ, ໃກ້​ຊິດ​ຕິດ​ແທດ​ກັບ​ປະ​ຊາ​ຊົນ, ເຂົ້າໃຈ​ປະ​ຊາ​ຊົນ, ສະ​ແດງ​ຄວາມ​ມຸ່ງ​ຫວັງ​ຂອງ​ປະ​ຊາ​ຊົນ. ຖ​້າ​ຫາກບໍ່​ໄດ້​ເລືອກ​ເຟັ້ນ​ລະ​ອຽດ ແລະ ປ່ອນ​ບັດ​ເລືອກ​ເອົາ​ຜູ້​ທີ່​ມີ​ແຕ່​ຄຳ​ເວົ້າ​ລ້າໆ, ບໍ່​ມີ​ການ​ກະ​ທຳ​ທີ່​ແທດ​ຈິງນັ້ນ ກໍ​ບໍ່​ສາ​ມາດ​ແກ້​ໄຂ​ໄດ້​ບັນ​ຫາ​ຫຍັງ​ເລີຍ. ດັ່ງ​ນັ້​ນ, ພວກ​ຂ້າ​ພະ​ເຈົ​້າ​ຕ້ອງ​ເລືອກ​ເອົາ​ຜູ້ສົມ​ເປັນ​ຕົວ​ແທນ​ໃຫ້​ແກ່​ປະ​ຊາ​ຊົນ, ສຸດ​ຈິດ​ສຸດ​ໃຈ​ເພື່ອ​ປະ​ຊາ​ຊົນ”

      ບັນ​ດາ​ຜູ້​ແທນ​ປະ​ຊາ​ຊົນ​ເປັນ​ຕົວ​ແທນ​ໃຫ້​ແກ່ຜູ້​ມີ​ສິດ​ເລືອກ​ຕັ້ງ​ທົ່ວ​ປະ​ເທດ​ນັບ​ສີບ​ລ້ານ​ຄົນ​ໄດ້​ຮັບ​ການ​ເລືອກ​ຕັ້ງ​ໂດຍ​ບັດ​ເລືອກ​ຕັ້ງ​ເສ​ລີ, ປະ​ຊາ​ທິ​ປະ​ໄຕ​ຂອງຜູ້​ມີ​ສິດ​ເລືອກ​ຕັ້ງ, ບັນ​ດາ​ຜູ້​ແທນ​ປະ​ຊາ​ຊົນ​ຕ້ອງ​ສະ​ແດງ​ໃຫ້​ເຫັນ​ຈິດ​ໃຈ​ຂອງ​ປະ​ຊາ​ຊົນ, ນຳ​ລົ​ມຫາຍ​ໃຈຈາກ​ຊີ​ວິດ​ຕົວ​ຈິງ​ມາ​ສູ່ກອງ​ປະ​ຊຸມ​ສະ​ພາ​ແຫ່ງ​ຊາດ, ຈາກນັ້ນ​ວາງ​ອອກ​ບັນ​ດາ​ລັດ​ຖະ​ນະ​ໂຍ​ບາຍ​ທີ່​ສອດ​ຄ່ອງ​ກັບ​ການ​ດຳ​ລົງຊີ​ວິດຂອງ​ປະ​ຊາ​ຊົນ.     ທ່ານ ຫງວຽນ​ວັນ​ເຕີມ ຜູ້​ມີ​ສິດ​ເລືອກ​ຕັ້ງ​ຮ່າ​ໂນ້ຍມີ​ຄວາມ​ຫວັງ​ວ່າ :

       “ ຫວັງ​ວ່າ ບັນ​ດາ​ຜູ້​ອອກ​ສະ​ໝັກ​ຮັບ​ເລືອກ​ຕັ້ງ​ເປັນ​ສະ​ມາ​ຊິກ​ສະ​ພາ​ແຫ່ງ​ຊາດ​ມີ​ຄວາມ​ກະ​ຕື​ລື​ລົ້ນ​ໃນ​ບັນ​ດາ​ການ​ເຄື​່ອນ​ໄຫວ​ຂອງ​ອົງ​ການ​ຕົວ​ແທນ​ປະ​ຊາ​ຊົນ, ນຳ​ຄວາມ​ມຸ່ງ​ຫວັງ​ຂອງ​ປະ​ຊາ​ຊົນ​ມາ​ສູ່​ສະ​ພາ​ແຫ່ງ​ຊາດ, ຕັດ​ສິນ​ໃຈ​ຕ້ານ​ການ​ສໍ້​ລາດ​ບັງຫຼວງ. ນັ້ນ​ແມ່ນ​ຄວາມ​ຄອງ​ຄອຍຂອງ​ປະ​ຊາ​ຊົນ ”

        ສ່ວນທ່ານ ຫງວ​ຽນ​ຫງອກ​ແທ່ງ ຜູ້​ມີ​ສິດ​ເລືອກ​ຕັ້ງແຂ​ວງ​ຟູ້​ເຖາະ ເປີດ​ເຜີຍ​ວ່າ :

       “ ຂ້າ​ພະ​ເຈົ້າ​ເຫັນ​ວ່າ​ຜູ້​ອອກ​ສະ​ໝັກ​ຮັບ​ເລືອກ​ຕັ້ງໄດ້​ເຕື້ອງ​ເຖິງ​ລະ​ອຽດ​ກ່ຽວ​ກັບ​ຂົງ​ເຂດ​ຂອງ​ຕົນ. ຖ້າ​ຫາກ​ບັນ​ດາ​ຜູ້​ອອກ​ສະ​ໝັກ​ຮັບ​ເລືອກ​ຕັ້ງ​ເຮັດ​ໄດ້​ເຊັ່ນ​ນັ້ນ ແລະ ສາ​ມາດ​ປະ​ຕິ​ບັດ​ຕາມ​ຄຳ​ໝັ້ນ​ໝາຍ​ຂອງ​ຕົນ​ນັ້ນ, ພວກ​ຂ້າ​ພະ​ເຈົ້າ​ກໍ​ຊົມ​ເຊີຍ​ຢ່າງ​ສຸດ​ໃຈ ແລະ ເຊື່ອ​ແນ​ວ່າ ຈະ​ເຮັດ​ໃຫ້​ສະ​ພາບ​ເສດ​ຖະ​ກິດ-ສັງ​ຄົມ ແລະ ທຸກ​ດ້ານ​ຂອງ​ປະ​ເທດ​ຊາດ​ປ່ຽນ​ແປງ​ໄປ. ຂ້າ​ພະ​ເຈົ້າ​ຫວັງ​ວ່າ ​ຖ້າ​ຫາກບັນ​ດາ​ຜູ້​ອອກ​ສະ​ໝັກ​ຮັບ​ເລືອກ​ຕັ້ງໄດ້​ຮັບ​ການ​ເລືອກ​ຕັ້ງ​ນັ້ນ, ຈະ​ປະ​ຕິ​ບັດ​ຄຳ​ໝັ້ນ​ໝາຍ​ຂອງ​ຕົນ​ເປັນ​ຢ່າງ​ດີ ແລະ ເຊື່ອວ່າ ເຂົາ​ເຈົ້າ​ຈະ​ປະ​ຕິ​ບັດ​ວຽກ​ງານ​ເປັນ​ຢ່າງດີ ” 

      ​ສະ​ພາ​ແຫ່ງ​ຊາດ​ຫວຽດ​ນາມ​ໄດ້​ຜ່ານ 13 ອາ​ຍຸ​ການ. ສຳ​ລັບ ສະ​ພາ​ແຫ່ງ​ຊາດແຕ່​ລະ​ຊຸດ, ສະ​ພາບ​ການ ແລະ ໜ້າ​​ທີ່ໃໝ່​ພັດ​ວາງ​ອອກ​ຄວາມ​ຮັບ​ຜິດ​ຊອບ​ໃໝ່ ແຕ່​ປະ​ຊາ​ຊົນ​ຍາມ​ໃດ​ກໍ​ເຊື່ອ​ໝັ້ນ​ບັນ​ດາ​ຜູ້​ແທນ​ປະ​ຊາ​ຊົນ​ຈະ​ສຸມ​ຈິດ​ສຸມ​ໃຈ​ຮັບ​ໃຊ້​ປະ​ຊາ​ຊົນ. ຄວາມ​ເຊື່ອ​ໝັ້ນ​ນີ້​ຈະ​ເປັນ​ກຳ​ລັງ​ໜູນ​ເພື່ອ​ໃຫ້​ຜູ້​ແທນ​ປະ​ຊາ​ຊົນ​ແຕ່​ລະ​ທ່ານ​ປະ​ຕິ​ບັດ​ໂຄງ​ການ​ດຳ​ເນີນ​ງານ​ຂອງ​ຕົນ​ຢ່າງ​ມີ​ປະ​ສິດ​ທິ​ຜົນ, ສົມ​ກັບ​ເປັນ​ຄວາມ​ເຊື່ອໝັ້ນ​ຂອງ ຜູ້​ມີ​ສິດ​ເລືອກ​ຕັ້ງ ແລະ ປະ​ຊາ​ຊົນ.

ຕອບກັບ

ຂ່າວ/ບົດ​ອື່ນ