ການແຂ່ງຂັນທົ່ວປະເທດກ່ຽວກັບການຖະແຫຼງຂ່າວການຕ່າງປະເທດປີ 2018 ສືບຕໍ່ເຊີດຊູບັນດາຜົນງານ, ບົດປະພັນ ແລະ ປຶ້ມດີເດັ່ນໃນຂົງເຂດຖະແຫຼງຂ່າວການຕ່າງປະເທດ

(VOVWORLD) - ວັນທີ 7 ມິຖຸນາ, ຄະນະໂຄສະນາສຶກສາສູນກາງພັກກອມມູນິດຫວຽດນາມ, ຄະນະຊີ້ນໍາວຽກງານຖະແຫຼງຂ່າວການຕ່າງປະເທດສູນກາງ ໄດ້ສົມທົບກັບສໍານັກຂ່າວສານຫວຽດນາມ ແລະ ບັນດາຫົວໜ່ວຍທີ່ກ່ຽວຂ້ອງ ຈັດຕັ້ງພິທີ ມອບລາງວັນການແຂ່ງຂັນທົ່ວປະເທດ ກ່ຽວກັບການຖະແຫຼງຂ່າວການຕ່າງປະເທດປີ 2018. 

       ເຂົ້າຮ່ວມພິທີ ມີທ່ານ ຫງວຽນຊວັນຟຸກ ນາຍົກລັດຖະມົນຕີຫວຽດນາມ, ທ່ານ ຫວໍວັນເຖື໋ອງ ຫົວໜ້າຄະນະໂຄສະນາສຶກສາສູນກາງ, ຫົວໜ້າຄະນະຊີ້ນໍາວຽກງານຖະແຫຼງຂ່າວການຕ່າງປະເທດ.

ການແຂ່ງຂັນທົ່ວປະເທດກ່ຽວກັບການຖະແຫຼງຂ່າວການຕ່າງປະເທດປີ 2018 ສືບຕໍ່ເຊີດຊູບັນດາຜົນງານ, ບົດປະພັນ ແລະ ປຶ້ມດີເດັ່ນໃນຂົງເຂດຖະແຫຼງຂ່າວການຕ່າງປະເທດ - ảnh 1ເຊີດຊູບັນດາຜົນງານ, ບົດປະພັນ ແລະ ປຶ້ມດີເດັ່ນໃນຂົງເຂດຖະແຫຼງຂ່າວການຕ່າງປະເທດ ປີ 2018 

        ການແຂ່ງຂັນໃນປີ 2018 ໄດ້ດຶງດູດຜົນງານຂອງນັກປະພັນ, ກຸ່ມນັກປະພັນ ຫຼາຍກວ່າ 1000 ຜົນງານ ທີ່ຂຶ້ນກັບອົງການສື່ມວນຊົນສູນກາງ ແລະ ທ້ອງຖິ່ນກວ່າ 130 ແຫ່ງ ແລະ ສໍານັກພິມ 12 ແຫ່ງໃນທົ່ວປະເທດ, ບັນດານັກຊ່ຽວຊານ, ນັກຂ່າວຕ່າງປະເທດ ແລະ ຊາວຫວຽດນາມ ຢູ່ຕ່າງປະເທດ. ບັນດາຜົນງານດັ່ງກ່າວ ມີ 8 ຮູບການ ດ້ວຍ 13 ພາສາ. ກ່າວຄໍາເຫັນທີ່ພິທີ, ທ່ານນາຍົກລັດຖະມົນຕີ ຫງວຽນຊວັນຟຸກ ກ່າວວ່າ:

        “ຜ່ານການຈັດຕັ້ງມາໄດ້ 5 ຄັ້ງຢ່າງຕໍ່ເນື່ອງ, ມາຮອດປັດຈຸບັນ, ການແຂ່ງຂັນທົ່ວປະເທດ ກ່ຽວກັບການຖະແຫຼງຂ່າວການຕ່າງປະເທດ ນັບມື້ນັບສະແດງໃຫ້ເຫັນອິດທິພົນຊື່ສຽງ, ເປັນໄມ້ຫຼາວັດແທກຄຸນນະພາບວຽກງານຖະແຫຼງຂ່າວການຕ່າງປະເທດຢ່າງມີປະສິດທິຜົນ, ປະກອບສ່ວນເພີ່ມທະວີການເຊື່ອມຕໍ່, ສົມທົບກັນລະຫວ່າງອົງການການທູດ ກັບອົງການສື່ມວນຊົນ, ລະຫວ່າງພາຍໃນປະເທດ ແລະ ຕ່າງປະເທດ. ບັນດາຜົນງານທີ່ສົ່ງເຂົ້າມາແຂ່ງຂັນໃນຄັ້ງນີ້ ໄດ້ຮັບການຕີລາຄາວ່າ ມີຄຸນນະພາບສູງກວ່າ, ໄດ້ເຕື້ອງເຖິງຢ່າງໃກ້ຊິດຕິດແທດ ແລະ ເລິກເຊິ່ງ, ຮອບດ້ານກວ່າ ກ່ຽວກັບບັນດາການຖະແຫຼງຂ່າວການຕ່າງປະເທດຂອງຫວຽດນາມ, ກາຍເປັນຂົວເຊື່ອມຕໍ່ລະຫວ່າງຫວຽດນາມ ກັບ ໂລກຢ່າງແທ້ຈິງ ແລະ ມີປະສິດທິຜົນ.”

        ຄະນະຈັດຕັ້ງ ໄດ້ຄັດເລືອກເອົາ 90 ຜົນງານທີ່ດີເດັ່ນທີ່ສຸດ ເພື່ອເຊີດຊູທີ່ພິທີມອບລາງວັນ ລວມມີ: ລາງວັນທີ 1 ມີ 8 ລາງວັນ, ລາງວັນທີ 2 ມີ 17 ລາງວັນ, ລາງວັນທີ 3 ມີ 25 ລາງວັນ ແລະ ລາງວັນຊົມເຊີຍມີ 40 ລາງວັນ. ວິທະຍຸກະຈາຍສຽງຫວຽດນາມ ມີ 14 ຜົນງານຍາດໄດ້ລາງວັນ; ສະເພາະ VOV5 ມີ 5 ຜົນງານໃນປະເພດກະຈາຍສຽງ, ປຶ້ມ, ສື່ເອເລັກໂຕນິກ, ໃນນັ້ນ ຜົນງານ “ຫວຽດນາມ ຫັນປ່ຽນຕົນເອງ ເພື່ອບໍ່ພາດໂອກາດໃນຍຸກ 4.0” ຍາດໄດ້ລາງວັນທີ 1 ໃນປະເພດກະຈາຍສຽງ. 

ຕອບກັບ

ຂ່າວ/ບົດ​ອື່ນ