ການຮ່ວມມືສິນໃນນ້ຳ ຫວຽດນາມ - ອິນໂດເນເຊຍ

(vovworld)- ທຳ​ມະ​ຊາດ​ດົນ​ບັນ​ດານ​ໃຫ້​ຫວຽດ​ນາມ ມີ​ຝັ່ງ​ທະ​ເລ​ດ້ວຍ​ຄວາມ​ຍາວ​ເກືອບ 3200 ກິ​ໂລ​ແມັດ, ສ່ວນ​ອິນ​ໂດ​ເນ​ເຊຍ ແມ່ນ​ປະ​ເທດ ມີ​ເກາະ​ໃຫຍ່, ນ້ອຍ ກວ່າ 17.000 ແຫ່ງ ພ້ອມ​ກັບ​ແຫລ່ງ​ກຸ້ງ​ປາ​ອຸ​ດົມ​ສົມ​ບູນ. ອາດ​ຈ​ະ​ເຫັນ​ໄດ້​ວ່າ ນີ້​ແມ່ນ​ສອງ​ປະ​ເທດ​ມີ​ຄວາມ​ສາ​ມາດ​ບົ່ມ​ຊ້ອນ​ອັນ​ໃຫຍ່​ຫລວງ​ກ່ຽວ​ກັບ​ສິນ​ໃນ​ນ້ຳ. ເຖິງ​ຢ່າງ​ໃດ​ກໍ​ຕາມ, ການ​ຮ່ວມ​ມື​ດ້ານ​ສິນ​ໃນ​ນ້ຳ​ລະ​ຫວ່າງ ຫວຽດ​ນາມ ແລະ ອິນ​ໂດ​ເນ​ເຊຍ ຍັງ​ບໍ່​ທັນ​ພັດ​ທະ​ນາ​ສົມ​ກັບ​ຄວາມ​ສາ​ມາດ​ບົ່ມ​ຊ້ອນ​ຂອງ​ສອງ​ຝ່າຍ.

ການຮ່ວມມືສິນໃນນ້ຳ ຫວຽດນາມ - ອິນໂດເນເຊຍ - ảnh 1
ບັນ​ດາ​ຜູ້​ແທນ​ເຂົ້າ​ຮ່ວມກອງ​ປະ​ຊຸມ​ສຳ​ມະ​ນາຫັນ​ສິ່ງ​ທ້າ​ທາຍ​ເປັນ
​ກາ​ລ​ະ​ໂອ​ກາດ​ໃນ​ຂະ​ແຫນງ​ສິນ​ໃນ​ນ້ຳ ແລະ ການ​ເດີນ​ເຮືອ ໂດຍ
ສະ​ຖານ​ທູດ​ອິນ​ໂດ​ເນ​ເຊຍ ປະ​ຈຳ​ຫວຽດ​ນາມ ຈັດ​ຕັ້ງ
Huong Tra/VOV5

        ປີ 2010, ລັດ​ຖະ​ບານ​ຫວຽດ​ນາມ ແລະ ອິນ​ໂດ​ເນ​ເຊຍ ໄດ້​ລົງ​ນາມ​ໃນ​ບົດ​ບັນ​ທຶກ​ຊ່ວຍ​ຈຳ (MoU) ກ່ຽວ​ກັບ​ທະ​ເລ ແລະ ອາ​ຊີບ​ຫາ​ປາ. ເຖິງ​ຢ່າງ​ໃດ​ກໍ​ຕາມ, ເອ​ກະ​ສານ​ສະ​ບັບ​ນີ້ ປະ​ຈຸ​ບັນ​ໝົດ​ຜົນ​ສັກ​ສິດ​ແລ້ວ. ໃນ​ຂະ​ນະ​ນັ້ນ, ສອງ​ປະ​ເທດ ພວມ​ພິ​ຈາ​ລະ​ນາ​ເລື່ອງ​ສືບ​ຕໍ່​ລົງ​ນາມ​ໃນ​ບົດ​ບັນ​ທຶກ​ຊ່ວຍ​ຈຳ​ດັ່ງ​ກ່າວ ແຕ່​ຮອດ​ປີ 2016, ອິນ​ໂດ​ເນ​ເຊຍ ໄດ້​ອອກ​ດຳ​ລັດເລກ​ທີ 44, ໃນ​ນັ້ນ ຊີ້​ແຈ້ງວ່າ ອິນ​ໂດ​ເນ​ເຊຍ ຈະ​ບໍ່​ອອກ​ຫນັງ​ສື​ອະ​ນຸ​ຍາດ​ໃຫ້​ກຳ​ປັ່ນ​ຫາ​ປາ​ຕ່າງ​ປະ​ເທດ, ລວມ​ທັງ​ບັນ​ດາ​ວິ​ສາ​ຫະ​ກິດ​ມີ​ 100% ເງິນ​ລົງ​ທຶນ​ໂດຍ​ກົງ​ຂອງ​ຕ່າງ​ປະ​ເທດ​​ມາເຄື​່ອນ​ໄຫວ​ໃນ​ບັນ​ດາ​ເຂດ​ທະ​ເລ​ຂອງ​ ອິນ​ໂດ​ເນ​ເຊຍ. ນີ້​ແມ່ນ​ສອງ​ສາຍ​ເຫດ​ຕົ້ນ​ຕໍ​ພາ​ໄປ​ເຖິງ​ວົງ​ເງິນ​​ການ​ນຳ​ເຂົ້າ​ສົ່ງ​ອອກ​ສິນ​ໃນ​ນ້ຳ​ລະ​ຫວ່າງ​ສອງ​ປະ​ເທດ ຍັງ​ຈຳ​ກັດ​ຢູ່.

        ໄລ່​ມາ​ຮອດ​ເດືອນ 10/2016, ວົງ​ເງິນສິນ​ໃນ​ນ້ຳສອງຝ່າຍ​ຫວຽດ​ນາມ - ອິນ​ໂດ​ເນ​ເຊຍ ບັນ​ລຸ 40,8 ລ້ານ USD, ໃນ​ນັ້ນ ສິນ​ໃນ​ນ້ຳ ອິນ​ໂດ​ເນ​ເຊຍ​ສົ່ງ​ອອກ​ໄປ​ຍັງ​ຕະ​ຫລາດ​ຫວຽດ​ນາມ ບັນ​ລຸ​ເກືອບ 38 ລ້ານ USD, ແລະ ຈາກ​ຫວຽດ​ນາມ ສົ່ງ​ອອກ​ໄປ​ຍັງ ອິນ​ໂດ​ເນ​ເຊຍ ​ເກືອບ 4 ລ້ານ USD ແມ່ນ​ຕົວ​ເລກ​ຍັງ​ຈຳ​ກັດ​ຢູ່. ທ່ານ Ibnu Hadi, ເອກ​ອັກ​ຄະ​ລັດ​ຖະ​ທູດ ອິນ​ໂດ​ເນ​ເຊຍ​ ປະ​ຈຳ​ຫວຽດ​ນາມ ໃຫ້​ຮູ້​ວ່າ:

        “ປະ​ຈຸ​ບັນ, ຫວຽດ​ນາມ ແມ່ນ​ປະ​ເທດ​ມີ​ທ່າ​ແຮງ​ໃນ​ການ​ປຸງ​ແຕ່ງ​ບັນ​ດາ​ຜະ​ລິ​ດ​ຕະ​ພັນ​ສິນ​ໃນ​ນ້ຳ ແລະ ບັນ​ດາ​ຜະ​ລິດ​ຕະ​ພັນ​ປຸງ​ແຕ່ງ​ສິນ​ໃນ​ນ້ຳ​ຂອງ​ຫວຽດ​ນາມ ສົ່ງ​ອອກ​ໄປ​ຍັງ​ກວ່າ 170 ປະ​ເທດ ແລະ ບັນ​ດາ​ເຂດ​ແຄ້ວນ, ລວມ​ມີ ອາ​ຊີ​ຕາ​ເວັນ​ອອກ​ສ່ຽງ​ໃຕ້, ເອີ​ລົບ ແລະ ອາ​ຟ​ຼິ​ກາ. ໃນ​ຂະ​ນະ​ນັ້ນ, ອິນ​ໂດ​ເນ​ເຊຍ ແມ່ນ​ປະ​ເທດ​ສົ່ງ​ອອກ​ສິນ​ໃນ​ນ້ຳ​ໃຫຍ່​ທີ​ສອງ​ຂອງ​ໂລກ ຖັດ​ຈາກ ຈິນ. ເຖິງ​ຢ່າງ​ໃດ​ກ​ໍ​​ຕາມ ການ​ຮ່ວມ​ມື​ລະ​ຫວ່າງ​ສອງ​ປະ​ເທດ ພັດບໍ່​ທັນ​ໄດ້​ຮັບ​ການ​ຍູ້​ແຮງ.”

        ຕໍ່​ຫນ້າ​ສະ​ພບ​ການນີ້, ວັນ​ທີ 26/7/2016, ໃນ​ຂອບ​ເຂດກອງ​ປະ​ຊຸມ​ລັດ​ຖະ​ມົນ​ຕີ​ກ່ຽວ​ກັບ “ຕົ້ນ​ກຳ​ເນີດ​ຂອງ​ຜະ​ລິດ​ຕະ​ພັນ​ສິນ​ໃນ​ນ້ຳ” ແລະ “ກອງ​ປະ​ຊຸມ​ສຸດຍອດ​ສິນ​ໃນ​ນ້ຳ ອາ​ຊີ​ຕາ​ເວັນ​ອອກ​ສ່ຽງ​ໃຕ້ ແລະ ປາ​ຊີ​ຟີກ”, ທ່ານ​ຫວູ​ວັນ​ຕາມ, ຮອງ​ລັດ​ຖະ​ມົນ​ຕີ​ກະ​ຊວງ​ກະ​ສິ​ກຳ ແລະ ພັດ​ທະ​ນາ​ຊົນ​ນະ​ບົດ​ ຫວຽດ​ນາມ ແລະ ທ່ານ​ນາງ Susi Pudjiatuti, ລັດ​ຖະ​ມົນ​ຕີ​ກະ​ຊວງ​ທະ​ເລ ແລະ ສິນ​ໃນ​ນ້ຳ​ອິນ​ໂດ​ເນ​ເຊຍ ໄດ້​ມີ​ການ​ເຮັດ​ວຽກ​ນຳ​ກັນ ແລະ ​ເຫັນ​ດີ​ ສືບ​ຕໍ່​ເພີ່ມ​ທະ​ວີ​ການ​ຊຸກ​ຍູ້​ການ​ພົວ​ພັນ​ຮ່ວມ​ມື​ສິນ​ໃນ​ນ້ຳ ແລະ ຈະ​ລົງ​ນາມ​ໃນບົດ​ບັນ​ທຶກ​ຊ່ວຍ​ຈຳ​ແກ່​ໄລ​ຍະ​ຈະ​ມາ​ເຖິງ​ໂດ​ຍ​ໄວ. ເດືອນ 1 ຜ່ານ​ມາ, ລັດ​ຖະ​ບານ​ຫວຽດ​ນາມ ໄດ້​ອອກ​ມະ​ຕິ​ເລກ 02 ມອບ​ສິດ​ໃຫ້​ກະ​ຊວງ​ກະ​ສິ​ກຳ ແລະ ພັດ​ທະ​ນາ​ຊົນ​ນະ​ບົດ ເປັນ​ເຈົ້າ​ພາບ, ສົມ​ທົບ​ກັບ​ບັນ​ດາ​ອົງ​ການ​ກ່ຽວ​ຂ້ອງ​ເພື່ອ​ກ້າວ​ໄປ​ເຖິງ​ການ​ລົງ​ນາ​ມ​ໃນບົດ​ບັນ​ທຶກ​ຊ່ວຍ​ຈຳ​ກ່ຽວ​ກັບ​ທະ​ເລ ແລະ ອາ​ຊີບ​ຫາ​ປາ​ກັບ​ອິນ​ໂດ​ເນ​ເຊຍ.

        ນອກ​ນັ້ນ, ຫວຽດ​ນາມ ແລະ ອິນ​ໂດ​ເນ​ເຊຍ ຈະ​ພິ​ຈາ​ລະ​ນາ​ໂດຍ​ໄວ​ເພື່ອ​ເຊັນ​ບົດ​ບັນ​ທຶກ​ຊ່ວຍ​ຈຳ​ກ່ຽວ​ກັບ​ການ​ສ້າງ​ໂທ​ລະ​ສັບ​ສາຍ​ດ່ວນ​ເພື່ອ​ສົມ​ທົບ​ກັນ ແລະ ເພີ່ມ​ທະ​ວີ​ການ​ຄຸ້ມ​ຄອງ​ສິນ​ໃນ​ນ້ຳ ແລະ ສະ​ກັດ​ກັ້ນ​ການ​ກະ​ທຳຢ່າງ​ຜິດ​ກົດ​ໝາຍ. ທ່ານ ຫງວຽນ​ວຽດ​ແມ້ງ, ຮອງ​ເລ​ຂາ​ທິ​ການ​ໃຫຍ່​ສະ​ມາ​ຄົມ​ອາ​ຊີບ​ຫາ​ປາ​ຫວຽດ​ນາມ ສະ​ເຫນີ​ວ່າ:

        “ບົນ​ພື້ນ​ຖານ​ສອງ​ປະ​ເທດ​ໄດ​້​ສ້າງ​ກາ​ນ​ພົວ​ພັນ​ຄູ່​ຮ່ວມ​ມື​ຍຸດ​ທະ​ສາດ​​ແລ້ວ, ​ສະ​ນັ້ນ ສະ​ຫະ​ສະ​ມາ​ຄົມ​ສິນ​ໃນ​ນ້ຳ​ຫວຽດ​ນາມ ສະ​ເຫນີ ກະ​ຊວງ ທະ​ເລ ແລະ ສິນ​ໃນ​ນ້ຳ ອິນ​ໂດ​ເນ​ເຊຍ ພິ​ຈາ​ລະ​ນາ ແລະ ບຸ​ລິ​ມະ​ສິດ​ ກົນ​ໄກ​ພິ​ເສດ, ບັນ​ດາ​ມາດ​ຕາ​ບຸ​ລິ​ມະ​ສິດ​ການ​ລົງ​ທຶນ​ພິ​ເສດບໍ່​ຂຶ້ນ​ກັບ ດຳ​ລັດ​ເລກ​ທີ 44 ຢູ່​ເກາະ​ຈຳ​ນວນ​ຫນຶ່ງ​ຂອງ ອິນ​ໂດ​ເນ​ເຊຍ ຫລື ຢູ່​ເຂດ​ຫນຶ່ງ, ເຂດ​ຫາ​ປາ​ໃດ​ຫນຶ່ງ​ຖືກ​ຄວບ​ຄຸມ​ຢ່າງ​ເຂັ້ມ​ງວດ​ຕາມ​ການ​ກຳ​ນົດ​ຄຸ​້ມ​ຄອງ​ທີ່​ໄດ້​ຮັບ​ການ​ປະ​ກາດ​ໃຊ້​ໃຫ້​ແກ່​ບັນ​ດາ​ວິ​ສາ​ຫະ​ກິດ​ຫວຽດ​ນາມ ສາ​ມາດ​ຮ່ວມ​ທຸ​ລະ​ກິດ​ຮ່ວມ​ສຳ​ພັນ​ໃນ​ການ​ຂຸດ​ຄົ້ນ​, ລ້ຽງ​ປູກ​ສິນ​ໃນ​ນ້ຳຢ່າງ​ສະ​ດວກ ນຳ​ມາ​ເຊິ່ງ​ຜົນ​ປະ​ໂຫຍດ​ໃຫ້​ທັງ​ສອງ​ຝ່າຍ.”

        ທ່ານ  Ridwan Hassan ທີ່​ປຶກ​ສາ​ຂັ້ນ​ສູງ​ຂົງ​ເຂດ​ເສດ​ຖະ​ກິດ​ການ​ຕ່າງ​ປະ​ເທດ ສັງ​ກັດ​ກະ​ຊວງ​ການ​ຕ່າງ​ປະ​ເທດ ອິນ​ໂດ​ເນ​ເຊຍ ໃຫ້​ຮູ້​ວ່າ: ປະ​ຈຸ​ບັນ ອິນ​ໂດ​ເນ​ເຊຍ ພວມ​ເປີດ​ກວ້າງ​ປ​ະ​ຕູ​ດຶງ​ດູດ​ການ​ລົງ​ທຶນ ແລະ ຫວັງ​ວ່າ ໃນ​ປີ 2017 ຈະ​ມີ​ບັນ​ດາ​ນະ​ໂຍ​ບາຍ​ໃຫມ່​ເພື່ອ​ໃຫ້​ສອງ​ປະ​ເທດ​ພ້ອມ​ກັນ​ຮ່ວມ​ມື​ຂຸດ​ຄົ້ນ​ສິນ​ໃນ​ນ້ຳ. ປະ​ຈຸ​ບັນ  ບັນ​ດາ​ເຂດ​ຫາ​ປາ​ຢູ່ ອິນ​ໂດ​ເນ​ເຊຍ ໄດ້​ກຽມ​ພ້ອມ​ແລ້ວ, ຖ້າ​ຫາກ​ສະ​ເພາະ​ອິນ​ໂດ​ເນ​ເຊຍ ຂຸດ​ຄົ້ນ ຍາກ​ທີ່​ປະ​ຕິ​ບັດ​ໄດ້, ສະ​ນັ້ນ ຢາກ​ມີ​ການ​ຮ່ວມ​ມື​ລົງ​ທຶນ​ຍາວ​ນານ​ແຕ່ 10-20ປີ.

        “ພວກ​ຂ້າ​ພະ​ເຈົ້າ​ເຫັນ​ວ່າ ມີ​ຫລາຍ​ບໍ​ລິ​ສັດ​ຂອງ​ອິນ​ໂດ​ເນ​ເຊຍ ລົງ​ທຶນ​ຢູ່​ຫວຽດ​ນາມ ແລະ ຫວຽດ​ນາມ ສາ​ມາດ​ລົງ​ທຶນ​ຢູ່​ອິນ​ໂດ​ເນ​ເຊຍ, ພິ​ເສດ​ໃນ​ຂົງ​ເຂດ​ສິນ​ໃນ​ນ້ຳ. ເພາະ​ວ່າ ຫວຽດ​ນາມ ແມ່ນ​ປະ​ເທດ​ມີ​ຫລາຍ​ບົດ​ຮຽນ, ບັນ​ດາ​ວິ​ສາ​ຫະ​ກິດ​ຫວ​ຽດ​ນາມ ສາ​ມາດ​ລົງ​ທຶນ​ເຂົ້າ​ບັນ​ດາ​ໂຄງ​ການ​ສາງ​ແຊ​ເຢັນ​ຢູ່ ອິນ​ໂດ​ເນ​ເຊຍ ພ້ອມ​ທັງ​ພັດ​ທະ​ນາ​ເຕັກ​ໂນ​ໂລ​ຊີ​ລ້ຽງ​ປູກ​ສິນ​ໃນ​ນ້ຳ. ຄຽງ​ຄູ່​ກັນ​ນັ້ນ ສອງ​ປະ​ເທດ​ພ້ອມ​ກັນ​ເພີ່ມ​ທະ​ວີ​ການ​ຮ່ວມ​ມື​ໃນ​ຂະ​ແຫນງ​ການ​ເດີນ​ເຮືອ ແລະ ສິນ​ໃນ​ນ້ຳ, ພິ​ເສດ​ໃນ​ການ​ຕໍ່​ສູ້​ຕ້ານ​ການ​ຫາ​ປາ​ຢ່າງ​ຜິດ​ກົດ​ໝາຍ. ການ​ຮ່ວມ​ມືນີ້ບໍ່​ພຽງ​ແຕ່​ນຳ​ມາ​ເຊິ່ງ​ຜົນ​ປະ​ໂຫຍດ​ໃຫ້​ທັງ​ສອງ​ຝ່າຍ​ເທົ່າ​ນັ້ນ ຫາກ​ນັບ​ທັງ​ພາກ​ພື້ນ ອາ​ຊຽນ ອີກ​ດ້ວຍ.”

        ພ້ອມ​ກັບ​ຄວາມ​ມາ​ນະ​ພະ​ຍາ​ຍາມ​ເພື່ອ​ພັດ​ທະ​ນາ​ການ​ຮ່ວມ​ມື​ສິນ​ໃນ​ນ້ຳ​ສອງ​ຝ່າຍ, ຫວັງ​ວ່າ ການ​ປະ​ຕິ​ບັດ​ຄາດ​ໝາຍ​ບັນ​ລຸ​ວົງ​ເງິນ​ການ​ຄ້າ 10 ຕື້ USD ໃນ​ປີ 2018 ລະ​ຫວ່າງ​ຫວຽດ​ນາມ ແລະ ອິນ​ໂດ​ເນ​ເຊຍ ຈະ​ປະ​ກົດ​ຜົນ​ເປັນ​ຈິງ. 


ຕອບກັບ

ຂ່າວ/ບົດ​ອື່ນ