ບັ້ນຮົບ ໂຮ່ຈີມິນ, ເຊິ່ງແມ່ນບັ້ນຮົບສຸດທ້າຍຂອງກອງທັບປະຊາຊົນຫວຽດນາມ ໃນການບຸກໂຈມຕີ ແລະ ລຸກຮຶ້ຂຶ້ນຂະໜາດໃຫຍ່ລະດູບານໃໝ່ປີ 1975, ແມ່ນບັ້ນຮົບທີ່ມີໄລຍະເວລາສັ້ນສຸດໃນສົງຄາມຫວຽດນາມ. ພຽງແຕ່ດຳເນີນໃນເວລາ 6 ວັນ (26/4-30/4/1975) ເທົ່ານັ້ນ, ແຕ່ບັ້ນຮົບໄດ້ເປັນຂີດໝາຍອັນສະຫງ່າລາສີໃນປຫວັດສາດຫວຽດນາມ.
ກ່ອນໜ້ານັ້ນ, ພາຍຫຼັງໄຊຊະນະຂອງບັ້ນຮົບປົດປ່ອຍໄຕງວຽນ, ກົມການເມືອງ ແລະ ສູນກາງພັກກອມມູນິດຫວຽດນາມ ໄດ້ກຳນົດ: “ນັບແຕ່ຈຸດເວລານີ້, ຈະເລີ່ມດຳເນີນບັ້ນຮົບຍຸດທະສາດສຸດທ້າຍຂອງກອງທັບ ປະຊາຊົນຫວຽດນາມ“. ວັນທີ 14/4/1975, ກົມການເມືອງຕົກລົງຕັ້ງຊື່ໃຫ້ບັ້ນຮົບປົດປ່ອຍໄຊງ່ອນ - ຢາດິ້ງ ແມ່ນ “ບັ້ນຮົບ ໂຮ່ຈີມິນ“, ແຜນຮ່າງບັ້ນຮົບໄດ້ຮັບການຮັບຮອງເອົາຄັ້ງສຸດທ້າຍ.
ລົດຖັງບຸກເຂົ້າທຳນຽບເອກະລາດ
|
ເວລາ 17 ໂມງວັນທີ 26/4/1975, ການບຸກໂຈມຕີຢືດເອົາໄຊງ່ອນເລີ່ມປະຕິບັດ, ເປີດສາກໃຫ້ບັ້ນຮົບໂຮ່ຈີມິນ ປະຫວັສາດ. ການບຸກໂຈມຕີດ້ານການທະຫານຂອງເຫຼົ່າຮົບປະສົມໄດ້ໜູນຊ່ວຍ, ສ້າງທ່າໃຫ້ການລຸກຮຶ້ຂຶ້ນຂອງມະຫາຊົນ, ທຳລາຍລະບົບອຳນາດການປົກຄອງ ສາທາລະນະລັດຫວຽດນາມ.
ນັບແຕ່ວັນທີ 26-28/4, ກອງທັບປະຊາຊົນຫວຽດນາມ ບຸກໂຈມຕີໃສ່ຂະໜານປ້ອງກັນຮອບນອກຂອງສັດຕູ, ປິດລ້ອມໄຊງ່ອນໃຫ້ຕົກຢູ່ໂດດດຽວ, ສ້າງທ່າສະດວກເພື່ອດຳເນີນການບຸກໂຈມຕີໃນທົ່ວສະໜົມຮົບ.
ວັນທີ 29/4, ບັ້ນຮົບດ້ານການທະຫານດ້ວຍ 5 ປີກໄດ້ສະກັດຕີ ແລະ ດັບສູນບັນດາກອງພົນທະຫານເຮືອສູ້ຮົບທາງບົກ, ບັນດາກອງພົນນ້ອຍ, ທະຫານມ້າ, ທຳລາຍບັນດາສະໜາມຍີງປືນໃຫຍ່, ຕີຢືດຄອງປົດ, ຄ້າຍ, ຢືດຄອງບັນດາຂົວແຄມນະຄອນໄຊງ່ອນ.
ວັນທີ 30/4/1975, ບັນດາພົນລະພາກຫຼວງຂອງກອງທັບປະຊາຊົນຫວຽດນາມ ສົບທົບກັນສູ້ຮົບຢືດເອົາບັນດາຈຸດໝາຍສຳຄັນ, ຈັບຕົວຄະນະລັດຖະບານ ສ. ຫວຽດນາມ ທັງໝົດ, ບັງຄັບປະທານາທິບໍດີອຳນາດການປົກຄອງ ສ. ຫວຽດນາມ ເຢືອງວັນມິງ ຕ້ອງອອກຖະແຫຼງການຍອມຈຳນົນ.
ໃນບັ້ນຮົບນີ້, ກອງທັບປະຊາຊົນຫວຽດນາມ ແລະ ບັນດາກຳລັງທ້ອງຖີ່ນ ໄດ້ປົດປ່ອຍນະຄອນໄຊງ່ອນ - ຢາດິ້ງ ແລະ ບັນດາແຂວງເຕິນອານ, ກ່ໍກົງ, ເຫົ້າເຫງັຍ, ໄຕນິງ, ບິ່ງເຢືອງ, ບຽນຮ່ວາ, ລອງແຄ໋ງ, ບ່າເຮ້ຍ, ວຸ້ງເຕົ່າຢ່າງສົມບຸນ, ສ້າງເງື່ອນໄຂໃຫ້ກອງທັບ ແລະ ປະຊາຊົນບັນດາທ້ອງຖີ່ນ ປົດປ່ອຍເຂດທົ່ງພຽງແມ່ນຳ້ຂອງໃນວັນທີ 30/4 ແລະ ວັນທີ 1/5/1975.
ໄຊຊະນະຂອງການບຸກໂຈມຕີ ແລະ ລຸກຮຶ້ຂຶ້ນຂະໜາດໃຫຍ່ໃນລະດູບານໃໝ່ປີ 1975 ແມ່ນຈຸດສູງແຫ່ງສິລະປະການທະຫານຂອງສົງຄາມປະຊາຊົນ, ຢືນຢັນບັນດາຄຸຸນຄ່າທີ່ເປັນມູນເຊື້ອ ແລະ ບົດຮຽນປະຫວັດສາດກ່ຽວກັບເອກະລາດ, ເສລີພາບຂອງຊາວຫວຽດນາມລຸ່ນຕ່າງໆ.