(vovworld) - ໃນຂອບເຂດກອງປະຊຸມຄະນະກຳມະການປະສານງານເຂດສາມຫຼ່ຽມພັດທະນາກຳປູເຈຍ - ລາວ - ຫວຽດນາມ ຄັ້ງທີ 8, ວັນທີ 6/12, ຢູ່ນະຄອນ ກອນຕູມ ໄດ້ດຳເນີນກອງປະຊຸມຂັ້ນນັກວິຊາການ 3 ຫຼ່ຽມພັດທະນາ ດ້ວຍການເຂົ້າຮ່ວມຂອງທ່ານຮອງລັດຖະມົນຕີກະຊວງແຜນການ ແລະ ການລົງທຶນຫວຽດນາມ, ລາວ ແລະ ລັດຖະມົນຕີກະຊວງແຜນການກຳປູເຈຍ. ກອງປະຊຸມໄດ້ສຸມໃສ່ຕີລາຄາສະພາບການປະຕິບັດບັນດາຂໍ້ຕົກລົງເຊິ່ງການນຳ 3 ປະເທດໄດ້ອະນຸມັດຜ່ານ, ຜ່ານນັ້ນ, ຊອກຫາບັນດາມາດຕະການຮ່ວມມືທີ່ມີປະສິດທິຜົນໃນຂົງເຂດປ້ອງກັນຄວາມສະຫງົບ, ການຕ່າງປະເທດ, ເສດຖະກິດ, ສິ່ງແວດລ້ອມ, ສັງຄົມ ໃນເຂດ 3 ຫຼ່ຽມພັດທະນາໄລຍະຈະມາເຖິງ. ທ່ານ ໜູພອນ ເຂັມມະໄລ, ຫົວໜ້າພະແນກແຜນການ ແລະ ການລົງທຶນແຂວງ ເຊກອງ, ສປປ ລາວ ໃຫ້ຮູ້ວ່າ.
“ການລົງທຶນຂອງຫວຽດນາມ ໃນແຂວງເຊກອງມີ 14 ໂຄງການ, ດ້ວຍຍອດຈຳນວນເງິນລົງທຶນປະມານ 500 ລ້ານ USD, ເມື່ອທຽບໃສ່ບັນດານັກລົງທຶນອື່ນໆ ແມ່ນຢືນອັນດັບໜຶ່ງ. ແຫຼ່ງເງິນລົງທຶນ ແລະ ບັນດາໂຄງການຂອງນັກລົງທຶນຫວຽດນາມ ໄດ້ປະກອບສ່ວນເຂົ້າໃນການພັດທະນາເສດຖະກິດ, ສັງຄົມ, ໂດຍສະເພາະໄດ້ເຮັດໃຫ້ເຂດຊົນນະບົດມີໜ້າໃໝ່, ສ້າງວຽກເຮັດງານທຳ ແລະ ຮັບປະກັນຊີວິດການເປັນຢູ່ຂອງປະຊາຊົນໃນແຂວງເປັນປົກກະຕິ.”
ບັນດາຜູ້ແທນໄດ້ເປັນເອກະພາບສະເໜີປະຕິບັດບາງມາດຕະການແກ້ໄຂ, ທິດທາງຮ່ວມມືໃນໄລຍະຈະມາເຖິງ ເພື່ອຮັບປະກັນໃຫ້ແກ່ການປະຕິບັດແຜນສັງລວມພັດທະນາເສດຖະກິດສັງຄົມຢູ່ເຂດ 3 ຫຼ່ຽມພັດທະນາໃຫ້ຖືກທິດ ແລະ ບັນລຸຄາດໝາຍທີ່ໄດ້ວາງອອກ. ໃນນັ້ນ, 3 ປະເທດເຫັນດີເປັນເອກະພາບຮັກສາອັດຕາເຕີບໂຕເສດຖະກິດສະເລ່ຍຢູ່ໃນລະດັບແຕ່ 10 – 11%/ປີ ແລະ ລາຍຮັບສະເລ່ຍຕໍ່ຫົວຄົນບັນລຸ 1.300 USD ໃນປີ 2015.