(vovworld) - ໃນຂອບເຂດກອງປະຊຸມລັດຖະມົນຕີປ້ອງກັນປະເທດອາຊຽນຄັ້ງທີ 10 (ADMM 10), ຕອນບ່າຍວັນທີ 25/05, ຢູ່ນະຄອນຫຼວງວຽງຈັນ, ລາວ, ໄດ້ດຳເນີນກອງປະຊຸມບໍ່ເປັນທາງການລັດຖະມົນປ້ອງກັນປະເທດອາຊຽນ - ຈີນ ຄັ້ງທີ 6. ຢູ່ທີ່ນີ້, ທ່ານລັດຖະມົນຕີປ້ອງກັນປະເທດຈີນ ຈາງວານແຈ໋ວງ ສະເໜີໃຫ້ບັນດາປະເທດອາຊຽນ ແລະ ຈີນ ຕ້ອງເພີ່ມທະວີການຮ່ວມມື ຜ່ານບັນດາການເຄື່ອນໄຫວລາດຕາເວນຮ່ວມ, ຕ້ານກໍ່ການຮ້າຍ, ການຊ້ອມຮົບຮ່ວມບົນທະເລ… ບັນດາລັດຖະມົນຕີປ້ອງກັນປະເທດອາຊຽນ ແລະ ຈີນ ລ້ວນແຕ່ຕີລາຄາສູງບົດບາດສຳຄັນໃນການຮ່ວມມືດ້ານປ້ອງກັນຊາດປ້ອງກັນຄວາມສະຫງົບ, ຖືວ່າ, ປະຈຸບັນ ພາກພື້ນຍັງມີສັນຕິພາບ ແລະ ສະຖຽນລະພາບ, ແຕ່ວ່າ, ໄພນາບຂູ່ເຖິງສັນຕິພາບ ແລະ ສະຖຽນລະພາບຍັງຊ້ອນແຝງຢູ່. ບັນດາລັດຖະມົນຕີຢືນຢັນປະຕິບັດບັນດາຄຳໝັ້ນສັນຍາພາກພື້ນ, ແກ້ໄຂບັນດາບັນຫາໂດຍສັນຕິວິທີ, ບໍ່ນາບຂູ່ ແລະ ບໍ່ນຳໃຊ້ອາວຸດ, ພ້ອມທັງດຳເນີນບັນດາການຮ່ວມມືຢ່າງແທດຈິງ ແລະ ລະອຽດກວ່າ.
ກ່າວຄຳເຫັນທີ່ກອງປະຊຸມບໍ່ເປັນທາງການລັດຖະມົນຕີປ້ອງກັນປະເທດອາຊຽນ - ຈີນ, ທ່ານລັດຖະມົນຕີກະຊວງປ້ອງກັນປະເທດຫວຽດນາມ, ພົນເອກ ໂງຊວນລິກ ໄດ້ສະໜັບສະໜູນບົດບາດໃຈກາງຂອງອາຊຽນ ໃນພາກພື້ນ, ພິເສດແມ່ນການປະກອບສ່ວນຢ່າງຕັ້ງໜ້າເຂົ້າໃນບັນດາກົນໄກຮ່ວມມືດ້ານປ້ອງກັນປະເທດ ໂດຍອາຊຽນ ສວມບົດບາດເປັນເຈົ້ານຳພາຄື ADMM+ ແລະ ARF ໃນໄລຍະຜ່ານມາ. ທ່ານລັດຖະມົນຕີ ໂງຊວນລິກ ຖືວ່າ, ນອກຈາກຄວາມມານະພະຍາຍາມຂອງອາຊຽນ ຍັງຮຽກຮ້ອງການໜູນຊ່ວຍ, ການປະກອບສ່ວນຂອງບັນດາຄູ່ຮ່ວມມືພາຍນອກອາຊຽນ, ພິເສດແມ່ນຈີນ. ທ່ານລັດຖະມົນຕີ ໂງຊວນລິກ ໄດ້ຍົກອອກ 2 ຂໍ້ສະເໜີ: ທີ່ 1 ແມ່ນຕ້ອງຮັກສາບັນດາມາດຕະການແລກປ່ຽນ, ທາບທາມຄວາມເຫັນເພື່ອແບ່ງປັນຂໍ້ມູນຜ່ານຫຼາຍຮູບແບບ, ທັງ 2 ຝ່າຍ ແລະ ຫຼາຍຝ່າຍ, ຕັ້ງໜ້າຄົ້ນຄວ້າການສ້າງໂທລະສັບສາຍດ່ວນລະຫວ່າງລັດຖະມົນຕີປ້ອງກັນປະເທດບັນດາປະເທດອາຊຽນ ແລະ ລັດຖະມົນຕີກະຊວງປ້ອງກັນປະເທດຈີນ. ທີ່ 2 ແມ່ນ, ສືບຕໍ່ຊຸກຍູ້ບັນດາມາດຕະການສ້າງຄວາມໄວ້ເນື້ອເຊື່ອໃຈຜ່ານບັນດາການເຄື່ອນໄຫວໃນພູມີປະເທດຕົວຈິງ, ພິເສດແມ່ນຢູ່ທະເລ, ໃນນັ້ນສະເໜີກ່ຽວກັບການເປີດກວ້າງຂອບເຂດນຳໃຊ້ປະມວນຂໍ້ກຳນົດຫຼິກເວັ້ນບັນດາການກະທຳຜິດໂດຍບັງເອີ້ນຢູ່ທະເລ (CUES) ໃຫ້ກ່ຳປັ່ນລັດຖະການຂອງອາຊຽນ ແລະ ຈີນ ກໍຄືສ້າງປະມວນຂໍ້ກຳນົດທີ່ຄ້າຍຄືກັນໃຫ້ເຮືອບິນຢູ່ເຂດທະເລຕາເວັນອອກ ແມ່ນໜ້າສົນໃຈທີ່ສຸດ; ຖ້າໄດ້ຮັບການຜັນຂະຫຍາຍ, ສິ່ງດັ່ງກ່າວຈະປະກອບສ່ວນສຳຄັນເຂົ້າໃນການຫຼຸດຜ່ອນໄພທີ່ພາໄປເຖິງການຄິດໄລ່ຢ່າງຜິດພາດ.