ກອງປະຊຸມສຳມະນາສາກົນກ່ຽວກັບການຕ້ານຄວາມອຶດຫິວ ທຸກຍາກ
ຜູ້ແທນເຂົ້າຮ່ວມກອງປະຊຸມສຳມະນາ
(ພາບ: thoibaonganhang.vn)
(vovworld) - ກອງປະຊຸມສຳມະນາສາກົນກ່ຽວກັບການຕ້ານຄວາມອຶດຫິວທຸກຍາກ ຖືກຈັດຕັ້ງຂຶ້ນໃນຕອນເຊົ້າວັນທີ 20/10, ຢູ່ນະຄອນ ໂຮ່ຈີມິນ, ດ້ວຍການເຂົ້າຮ່ວມຂອງບັນດາຄູອາຈານ, ນັກຄົ້ນຄ້ວາທີ່ມາຈາກບັນດາມະຫາວິທະຍຍາໄລຂອງບັນດາປະເທດຄື: ບັງກະລາເທດ, ອິນໂດເນເຊຍ, ມາເລເຊຍ, ຟິລິບປິນ, ອີນເດຍ, ໄທ ແລະ ຫວຽດນາມ. ບັນດາບົດລາຍງານທີ່ກອງປະຊຸມສຳມະນາໃຫ້ຮູ້ວ່າ: ເຖິງວ່າຫຼາຍປະເທດມີຜົນງານດີພໍສົນຄວນໃນການພັດທະນາເສດຖະກິດກໍ່ຕາມ, ແຕ່ສະພາບທຸກຍາກອຶດຫິວຍັງເປັນໄພນາບຂູ່ອັນໃຫຍ່ຫຼວງສຳລັບທົ່ວໂລກ, ແມ່ນສາຍເຫດພາໄປເຖິງການຂາດສະຖຽນລະພາບທາງສັງຄົມ ແລະ ໄພນາບຂູ່ຕໍ່ສັນຕິພາບ ແລະ ຄວາມສະຫງົບຂອງໂລກ. ພິເສດ, ພາຍຫຼັງວິກິດການການເງິນທົ່ວໂລກ, ບັນດາປະເທດພັດທະນາຕ້ອງປະເຊີນໜ້າກັບອັດຕາການຫວ່າງງານສູງ ແລະ ການເຕີບໂຕເສດຖະກິດອ່ອນດ້ອຍ. ສະເພາະ ຫວຽດນາມ, ໃນ 20 ປີຜ່ານມາ, ອັດຕາຜູ້ທຸກຍາກແຕ່ 60% ໄດ່້ຫຼຸດລົງເຫຼືອພຽງ 10%. ພາລະກິດຕ້ານອຶດຫິວທຸກຍາກພວມໄດ້ຮັບການປະຕິບັດຈາກລັດຖະບານ ຫວຽດນາມ ຢ່າງຂ້ຽວຂາດ. ກອງປະຊຸມສຳມະນາຄັ້ງນີ້ໄດ້ຮັບການຈັດຕັ້ງເພື່ອແນໃສ່ຊອກຫາບັນດາໂຄງການຮ່ວມມືລະຫວ່າງບັນດາຮາກຖານບຳລຸງສ້າງກ່ຽວກັບບັນດາບັນຫາລົງລ້າງຄວາມອຶດຫິວຫລຸດຜ່ອນຄວາມທຸກຍາກ, ຊຸກຍູ້ການຮ່ວມມືລະຫວ່າງບັນດາມະຫາວິທະຍາໄລ, ສ້າງບາດກ້າວສຳຄັນໃຫ້ແກ່ການພົວພັນຮ່ວມມືກັບບັນດາອົງການເອກະຊົນ, ບໍ່ຂຶ້ນກັບລັດຖະບານ ແລະ ລັດຖະບານໃນການໜູນຊ່ວຍບັນດາໂຄງການຍຸດທະສາດລົບລ້າງຄວາມອຶດຫິວ ຫລຸດຜ່ອນຄວາມທຸກຍາກໃນປະຈຸບັນ.