(ທ່ານເລຂາທິການໃຫຍ່, ປະທານປະເທດ ສປປ ລາວ ຈູມມາລີ ໄຊຍະສອນ
ຕອນຮັບເລຮົ່ງແອງ, ຜູ້ປະຈຳການຄະນະເລຂາສູນກາງພັກກອມມູນິດຫວຽດນາມ)
(vovworld) - ໂດຍຮັບຄຳເຊີນຂອງພັກ, ລັດລາວ, ຄະນະຜູ້ແທນຂັ້ນສູງພັກ, ລັດ ຫວຽດນາມ ໂດຍທ່ານ ເລຮົ່ງແອງ, ຜູ້ປະຈຳການຄະນະເລຂາສູນກາງພັກກອມມູນິດຫວຽດນາມ, ນຳໜ້າ ໄດ້ໄປລາວເຂົ້າຮ່ວມບັນດາການເຄື່ອນໄຫວສະເຫຼີມສະຫຼອງ 40 ປີ ແຫ່ງວັນຊາດ ປະເທດ ສປປ ລາວ (2/12/1975-2/12/2015). ວັນທີ 1/12, ຢູ່ນະຄອນຫຼວງວຽງຈັນ, ທ່ານເລຂາທິການໃຫຍ່, ປະທານປະເທດ ສປປ ລາວ ຈູມມາລີ ໄຊຍະສອນ; ທ່ານນາຍົກລັດຖະມົນຕີ ທອງສິງ ທຳມະວົງ; ທ່ານນາງຮອງປະທານສະພາແຫ່ງຊາດ ປານີ ຢາທໍ່ຕູ້ ໄດ້ໃຫ້ການຕ້ອນຮັບຄະນະ.
ທີ່ການພົບປະຕ່າງໆ, ທ່ານເລຮົ່ງແອງ ໄດ້ອວຍພອນບັນດາຜົນງານອັນໃຫຍ່ຫຼວງ ເຊິ່ງພັກ, ລັດ ແລະ ປະຊາຊົນ ລາວຍາດມາໄດ້ໃນ 40 ປີຜ່ານມາ, ພິເສດແມ່ນໃນ 30 ປີ ແຫ່ງການດຳເນີນພາລະກິດປ່ຽນໃໝ່ປະເທດຊາດ, ເນັ້ນໜັກວ່າ, ບັນດາໄຊຊະນະອັນໃຫຍ່ຫຼວງນັ້ນ ແມ່ນປະຖົມປັດໃຈອັນໝັ້ນຄົງເພື່ອນຳພາລະກິດປ່ຽນໃໝ່ຢູ່ລາວກ້າວ ເຂົ້າສູ່ໄລຍະພັດທະນາໃໝ່, ພ້ອມທັງປະກອບສ່ວນຢ່າງຕັ້ງໜ້າເຂົ້າໃນການປັບປຸງ ແລະ ເພີ່ມທະວີສາຍພົວພັນສາມັກຄີແບບພິເສດຫວຽດນາມ - ລາວ, ປະກອບສ່ວນຮັກສາສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ຢູ່ໃນໂລກ. ທ່ານເລຮົ່ງແອງ ຢືນຢັນວ່າ, ສາຍພົວພັນສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງຫວຽດນາມ - ລາວ ແມ່ນຊັບສົມບັດອັນລ້ຳຄ້າຂອງ 2 ຊາດ, ບໍ່ວ່າໃນສະພາບໃດ, ຫວຽດນາມ ກໍຈະເຮັດຈົນສຸດຄວາມສາມາດຂອງຕົນພ້ອມກັບລາວ ປັບປຸງ ແລະ ພັດທະນາການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງຫວຽດນາມ ລາວ ໃຫ້ເລິກເຊິ່ງ, ກວ້າງຂວາງ.
ທ່ານເລຂາທິການໃຫຍ່, ປະທານປະເທດລາວ ຈູມມາລີ ໄຊຍະສອນ; ທ່ານນາຍົກລັດຖະມົນຕີ ທອງສິງທຳມະວົງ; ທ່ານນາງປະທານສະພາແຫ່ງຊາດ ປານີ ຢາທໍ່ຕູ້, ຢືນຢັນວ່າ, ພັກ, ລັດ ແລະ ປະຊາຊົນລາວ ຍາມໃດກໍຮັກສາການພົວພັນສາມັກຄີແບບພິເສດລະຫວ່າງຫວຽດນາມ - ລາວ ແລະ ພ້ອມກັບຫວຽດນາມ ເພີ່ມພູນຄູນສ້າງສາຍພົວພັນສາມັກຄີແບບພິເສດນີ້ໃຫ້ຂຽວສົດງົດງາມ, ໝັ້ນຄົງຂະໜົງແກ່ນໄປຊົ່ວກາລະນານ.