(vovworld) - ລັດຖະບານອາເມລິກາ ເດັດດຽວປະຕິເສດບໍ່ອອກວີຊາໃຫ້ທ່ານເອກອັກຄະລັດຖະທູດອີຣານ ຄົນໃໝ່ປະຈຳສະຫະປະຊາຊາດ Hamid Aboutalebi ດ້ວຍເຫດຜົນທີ່ວ່າ ເຈົ້າໜ້າທີ່ຜູ້ນີ້ມີສ່ວນກ່ຽວຂ້ອງເຖິງວິກິດການຕົວປະກັນອາເມລິກາ ຢູ່ອີຣານ ເມື່ອປີ 1979. ກ່າວຄຳເຫັນຕໍ່ວົງການນັກຂ່າວ ໃນວັນທີ 15/04, ຢູ່ນະຄອນຫຼວງ ວໍຊິງເຕັນ, ໂຄສົກກະຊວງການຕ່າງປະເທດອາເມລິກາ ທ່ານນາງ Jen Psaki ຊີ້ແຈ້ງວ່າ ເລື່ອງອາເມລິກາ ອອກວີຊາໃຫ້ເຈົ້າໜ້າທີ່ການທູດອີຣານ ທີ່ເຄີຍຍ້ອມຮັບມີສ່ວນກ່ຽວຂ້ອງເຖິງເຫດຢືດຄອງສະຖານທູດອາເມລິກາ ປະຈຳ ເຕເຣຣານ ກ່ອນນີ້ 35 ປີ ແມ່ນສິ່ງທີ່ບໍ່ສາມາດຮັບຮູ້ໄດ້. ທ່ານນາງ Psaki ກໍ່ເນັ້ນໜັກວ່າ ອາເມລິກາ ເດັດດຽວຮັກສາຫຼັກໝັ້ນຂອງຕົນໃນບັນຫາດັ່ງກ່າວ.
ທ່ານອຸປະທູດຊົ່ວຄາວ ຄະນະຜູ້ແທນປະຈຳການອີຣານ ຢູ່ສະຫະປະຊາຊາດ Hossein Dehghani ໃຫ້ຮູ້ວ່າ ອີຣານ ມີຄວາມວິຕົກກັງວົນຕໍ່ເລື່ອງປະຕິເສດອອກວີຊາຂອງປະເທດເຈົ້າພາບ, ພ້ອມທັງຢືນຢັນວ່າ ການກະທຳນີ້ໄດ້ລະເມີດບັນດາຄຳໝັ້ນສັນຍາຂອງອາເມລິກາ ຕາມກົດໝາຍສາກົນ ແລະ ຂໍ້ຕົກລົງກັບສະຫະປະຊາຊາດ.