(vovworld) - ວັນທີ 16/01, ຢູ່ເຊີອຸ່ນ, ເມື່ອຕອບສຳພາດຕໍ່ສື່ມວນຊົນ, ທ່ານເອກອັກຄະລັດຖະທູດຫວຽດນາມ ປະຈຳສ.ເກົາຫຼີ ຟ້າມຮິວຈິ໋ ໃຫ້ຮູ້ວ່າ, ການພົວພັນຄູ່ຮ່ວມມືຍຸດທະສາດຫວຽດນາມ - ສ.ເກົາຫຼີ ໃນຊຸມປີຜ່ານມາ, ພິເສດແມ່ນໃນປີ 2016, ສືບຕໍ່ໄດ້ຮັບການປັບປຸງ ແລະ ພັດທະນາທຸກດ້ານ, ໂດຍສະເພາະແມ່ນໃນຂົງເຂດຮ່ວມມືດ້ານເສດຖະກິດ. ທ່ານເອກອັກຄະລັດຖະທູດ ຟ້າມຮິວຈິ໋ ຢືນຢັນວ່າ, ການພົວພັນລະຫວ່າງຫວຽດນາມ ແລະ ສ.ເກົາຫຼີ ສືບຕໍ່ມີບັນດາບາດກ້າວພັດທະນາຢ່າງແຮງ. ກ່ຽວກັບດ້ານການຄ້າ, ວົງເງິນການຄ້າ 2 ສົ້ນໃນຊຸມປີຜ່ານມາສືບຕໍ່ເພີ່ມຂຶ້ນຢ່າງລ້ຽນຕິດ ແລະ ສາມາດລື່ນກາຍຄາດໝາຍ 70 ຕື້ USD ໃນປີ 2020 ຄືການນຳຂັ້ນສູງ 2 ປະເທດໄດ້ຕົກລົງນຳກັນ. ໃນຂົງເຂດລົງທຶນ, ກະແສການລົງທຶນຂອງບັນດາວິສາຫະກິດສ.ເກົາຫຼີ ເຂົ້າຫວຽດນາມ ສືບຕໍ່ເພີ່ມຂຶ້ນ. ໄລ່ຮອດໄລຍະປະຈຸບັນ, ໄດ້ມີ 5.000 ໂຄງການລົງທຶນ ດ້ວຍຍອດມູນຄ່າກວ່າ 50 ຕື້ USD. ຕາມ ທ່ານເອກອັກຄະລັດຖະທູດ ຟ້າມຮິວຈິ໋ ແລ້ວ, ເພື່ອສືບຕໍ່ພັດທະນາການພົວພັນຄູ່ຮ່ວມມືຍຸດທະສາດລະຫວ່າງຫວຽດນາມ - ສ.ເກົ າຫຼີ ໃນໄລຍະຈະມາເຖິງ ຄວນເອົາໃຈໃສ່ເປັນພິເສດເຖິງ 3 ເສົ້າຄ້ຳຕົ້ນຕໍຄືການພົວພັນດ້ານການເມືອງ, ການຮ່ວມມືດ້ານເສດຖະກິດ ແລະ ວັດທະນະທຳ.