ການຮ່ວມມືປ້ອງກັນຊາດແມ່ນເນື້ອໃນສຳຄັນໃນການພົວພັນລະຫວ່າງຫວຽດນາມ-ລາວ
ພາບປະກອບ
(vovworld) – ຕອນບ່າຍວັນທີ 8/7, ຢູ່ຮ່າໂນ້ຍ, ພົນໂທ ເລຮື້ວດຶກ, ຮອງລັດຖະມົນຕີກະຊວງປ້ອງກັນປະເທດ ຫວຽດນາມ ໄດ້ໃຫ້ການຕ້ອນຮັບທ່ານພັນເອກ ຄຳແດງ ແພງວິໄລ, ຫົວໜ້າກົມແຜນການ - ການເງິນກອງທັບປະຊາຊົນ ລາວ, ເນື່ອງໃນໂອກາດມາຢ້ຽມຢາມ ແລະ ເຮັດວຽກຢູ່ ຫວຽດນາມ. ທ່ານ ພົນໂທ ເລຮື້ວດຶກ ເນັ້ນໜັກວ່າ: ລັດຖະບານ, ປະຊາຊົນ ແລະ ກອງທັບປະຊາຊົນ ຫວຽດນາມ ຍາມໃດກໍ່ຖືເປັນສຳຄັນ, ຮັກສາ ແລະ ພັດທະນາສາຍພົວພັນສາມັກຄີແບບພິເສດກັບ ລັດຖະບານ, ປະຊາຊົນ ແລະ ກອງທັບປະຊາຊົນ ລາວ ອ້າຍນ້ອງ, ພ້ອມທັງຢືນຢັນວ່າ: ການຮ່ວມມືດ້ານປ້ອງກັນຊາດແມ່ນໜຶ່ງໃນບັນດາເນື້ອໃນສຳຄັນໃນການພົວພັນລະຫວ່າງ 2 ປະເທດ. ການຮ່ວມມືປ້ອງກັນຊາດ ປະກອບສ່ວນປັບປຸງ, ເພີ່ມທະວີຄວາມສະຫງົບ, ການເມືອງ, ສ້າງກອງທັບຂອງແຕ່ລະປະເທດມີກຳລັງແຮງຢ່າງພຽງພໍເພື່ອປົກປັກຮັກສາເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນ, ປະກອບສ່ວນເຮັດໃຫ້ກົນອຸບາຍຂອງບັນດາກຳລັງທີ່ເປັນປໍລະປັກ, ປະຕິການແບ່ງແຍກນ້ຳໃຈມິດຕະພາບ, ສາມັກຄີລະຫວ່າງປະຊາຊົນ ແລະ ກອງທັບ ຫວຽດນາມ - ລາວ ໃຫ້ປະລາໄຊ. ທ່ານ ພົນໂທ ເລຮື້ວດຶກ, ປາດຖະໜາວ່າ: ກົມການເງິນ ກະຊວງປ້ອງກັນປະເທດ ຫວຽດນາມ ແລະ ກົມແຜນການ - ການເງິນກອງທັບປະຊາຊົນ ລາວ ສົມທົບກັນຢ່າງແໜ້ນແຟ້ນ, ສ້າງແຜນການຜັນຂະຫຍາຍປະຕິບັດບັນດາເນື້ອໃນທີ່ໄດ້ເຕື້ອງເຖິງໃນບົດບັນທຶກຊ່ວຍຈຳເຊິ່ງ 2 ຝ່າຍຫາກໍ່ເຊັນໃນວັນດຽວກັນໂດຍໄວ.