ທ່ານເອກອັກຄະລັດຖະທູດຫວຽດນາມ ປະຈຳລາວ ຫງວຽນແມ້ງຮຸ່ງ
(vovworld) – ຕອນຄຳ່ວັນທີ 22/12, ສະຖານທູດຫວຽດນາມ ປະຈຳລາວ ໄດ້ຈັດຕັ້ງພິທີສະເຫຼີມສະຫຼອງ 70 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ. ທີ່ພິທີ, ທ່ານເອກອັກຄະລັດຖະທູດຫວຽດນາມ ປະຈຳລາວ ຫງວຽນແມ້ງຮຸ່ງ ຢືນຢັນວ່າ: ກອງທັບປະຊາຊົນຫວຽດນາມ ພວມໄດ້ຮັບການກໍ່ສ້າງເປັນກອງທັບຫຼວງ, ທັນສະໄໝເທື່ອລະກ້າວ ເພື່ອປະຕິບັດໜ້າທີ່ປົກປັກຮັກສາເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດຢ່າງໝັ້ນຄົງ; ເປັນເຈົ້າການ ແລະ ຕັ້ງໜ້າເຊື່ອມໂຍງເຂົ້າກັບສາກົນ; ເພີ່ມທະວີການຮ່ວມມືກັບກອງທັບບັນດາປະເທດ; ພິເສດແມ່ນກັບກອງທັບປະຊາຊົນລາວ. ທ່ານເອກອັກຄະລັດຖະທູດ ສະແດງຄວາມຮູ້ບຸນຄຸນຕໍ່ພັກ, ລັດ, ປະຊາຊົນ ແລະ ກອງທັບປະຊາຊົນລາວຢ່າງເລິກເຊິ່ງ ຊິ່ງຍາມໃດກໍ່ສາມັກຄີ, ຮຽງບ່າຮຽງໄຫຼ່ພ້ອມກັບຫວຽດນາມ ໃນພາລະກິດປົດປ່ອຍຊາດ, ສ້າງສາ ແລະ ປົກປັກຮັກສາປະເທດຊາດ, ຮັກສາສັນຕິພາບ, ການພັດທະນາປະເທດຂອງ 2 ຊາດ ຫວຽດນາມ-ລາວ ອ້າຍນ້ອງ.
ໃນຕອນຄຳ່ວັນດຽວກັນ ຢູ່ ພະນົມເປັນ, ສະຖານທູດຫວຽດນາມ, ທູດທະຫານຫວຽດນາມ ປະຈຳກຳປູເຈຍ ກໍ່ຈັດຕັ້ງພິທີສະເຫຼີມສະຫຼອງວັນສ້າງຕັ້ງກອງທັບປະຊາຊົນຫວຽດນາມ, ທ່ານເອກອັກຄະລັດຖະທູດຫວຽດນາມ ປະຈຳກຳປູເຈຍ ແທັ້ກຢື ໄດ້ທົບທວນຄືນວິວັດການສ້າງຕັ້ງ ແລະ ພັດທະນາຂອງກອງທັບປະຊາຊົນຫວຽດນາມ ໃນ 70 ປີຜ່ານມາ; ພ້ອມທັງສະແດງຄວາມຂອບອົກຂອບໃຈຕໍ່ການຊ່ວຍເຫຼືອອັນລ້ຳຄ່າ ເຊິ່ງປະຊາຊົນ ແລະ ກອງທັບກຳປູເຈຍ ໄດ້ສະຫງວນໃຫ້ແກ່ກອງທັບ ແລະ ປະຊາຊົນຫວຽດນາມ ນັບແຕ່ວັນສ້າງຕັ້ງມາຮອດປະຈຸບັນ.
ແລະກໍ່ໃນຕອນຄຳ່ວັນທີ 22/12, ສະຖານທູດ ແລະ ທູດທະຫານຫວຽດນາມ ປະຈຳຢູແກຼນ ໄດ້ຈັດຕັ້ງພິທີ ສະເຫຼີມສະຫຼອງ 70 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ (22/12/1944-22/12/2014) ແລະ 25 ປີແຫ່ງວັນທົ່ວປວງຊົນປ້ອງກັນຊາດ (22/12/1989-22/12/2014) ຢ່າງສົມກຽດ.
ກ່ອນໜ້ານັ້ນ, ວັນທີ 21/12, ປະຊາຄົມຊາວຫວຽດນາມ ອາໄສໃນຫຼາຍທ້ອງຖິ່ນຢູ່ເຢຍລະມັນ ກໍ່ຈັດຕັ້ງບັນດາການເຄື່ອນໄຫວສະເຫຼີມສະຫຼອງ 70 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ ແລະ 25 ປີແຫ່ງວັນທົ່ວປວງຊົນປ້ອງກັນຊາດ.