(vovworld) – ເນື່ອງໃນໂອກາດສະເຫຼີມສະຫຼອງ 40 ປີແຫ່ງວັນປົດປ່ອຍພາກໃຕ້ ຢ່າງສົມບູນ, ໂຮມປະເທດ ຫວຽດນາມ ເປັນເອກະພາບ (30/4/1975 – 30/4/2015), ບັນດາການເຄືອນໄຫວຢ່າງສົມກຽດ ແລະ ອຸດົມສົມບູນໄດ້ຮັບການຈັດຕັ້ງໃນຫຼາຍປະເທດໃນໂລກຄື: ໂມຊຳບິກ, ເບລາຣຸດ, ເມກຊີໂກ, ລັດເຊຍ, ຮູງກາຣີ, ອານເຊຣີ… ສະຖານທູດ ຫວຽດນາມ ປະຈຳ ໂມຊຳບິກ, ເບລາຣຸດ, ຮູງກາຣີ, ອານເຊຣີ ໄດ້ສົມທົບກັບບັນດາສະມາຄົມຊາວ ຫວຽດນາມ, ບັນດາສະມາຄົມມິດຕະພາບ, ຈັດຕັ້ງພິທີສະເຫຼີມສະຫຼອງດ້ວຍການມີໜ້າຂອງບັນດາເອກອັກຄະລັດຖະທູດ, ພາລະກອນສະຖານທູດ, ຊາວ ຫວຽດນາມ ດຳລົງຊີວິດຢູ່ປະເທດຕ່າງໆ, ກໍ່ຄືເພື່ອນມິດປະເທດປະຈຳຖີ່ນເປັນຈຳນວນຫຼວງຫຼາຍ.
ທີ່ພິທີສະເຫຼີມສະຫຼອງໄຊຊະນະ 30/4 ຢູ່ ໂມຊຳບິກ, ທ່ານເອກອັກຄະລັດຖະທູດ ຫວຽດນາມ ປະຈຳ ໂມຊຳບິກ ຫງວຽນວັນຈູງ ໄດ້ທົບທວນຄືນປະຫວັດສາດທີ່ສະຫງ່າລາສີຂອງຊາດດ້ວຍໄຊຊະນະລະດູບານໃໝ່ປີ 1975 ແລະ ຄວາມໝາຍອັນຍິ່ງໃຫຍ່ຂອງວັນປົດປ່ອຍພາກໃຕ້, ໂຮມປະເທດ ຫວຽດນາມ ເປັນເອກະພາບ.
ທີ່ການປະຊຸມຂ່າວຢູ່ນະຄອນຫຼວງ ອານເຊຣີ ປະເທດ ອານເຊຣີ ເນື່ອງໃນໂອກາດສະເຫຼີມສະຫຼອງ 40 ປີແຫ່ງວັນປົດປ່ອຍພາກໃຕ້, ໂຮມປະເທດຊາດເປັນເອກະພາບ, ທ່ານເອກອັກຄະລັດຖະທູດ ຫວຽດນາມ ປະຈຳ ອານເຊຣີ ຫວູເທ໋ຮຽບ ໄດ້ແນະນຳບັນດາຜົນງານສຳຄັນໃນຂົງເຂດພົວພັນພາຍໃນ ແລະ ຕ່າງປະເທດເຊິ່ງ ປະຊາຊົນ ຫວຽດນາມ ບັນລຸໄດ້ໃນ 40 ປີຜ່ານມານັບແຕ່ເມື່ອປະເທດໄດ້ໂຮມເປັນເອກະພາບ, ພາຍຫຼັງໄຊຊະນະວັນທີ 30/4/1975.
ຢູ່ເບລາຣຸດ, ຜູ້ຕາງໜ້າກຸ່ມສະມາຊິກມິດຕະພາບຮ່ວມມືກັບສະພາແຫ່ງຊາດ ຫວຽດນາມ, ຮອງປະທານກຳມາທິການພົວພັນຕ່າງປະເທດສະພາຕ່ຳ ເບລາຣຸດ, ທ່ານ Vitaly Busco ໄດ້ຊົມເຊີຍ ຫວຽດນາມ ເນື່ອງໃນໂອກາດສະເຫຼີມສະຫຼອງວັນປົດປ່ອຍພາກໃຕ້ ຫວຽດນາມ ຢ່າງສົມບູນ, ໂຮມປະເທດຊາດເປັນເອກະພາບ.
ສ່ວນຢູ່ ຮູງກາຣີ, ເຂົ້າຮ່ວມພິທີສະເຫຼີມສະຫຼອງ 40 ປີແຫ່ງວັນປົດປ່ອຍພາກໃຕ້ ຢ່າງສົມບູນ, ໂຮມປະເທດ ຫວຽດນາມ ເປັນເອກະພາບ ມີບັນດານັກຮົບເກົ່າເຄີຍເຂົ້າຮ່ວມຄະນະກຳມະການ 4 ຝ່າຍຕິດຕາມກວດກາການປະຕິບັດສັນຍາ ປາຣີ ຢູ່ ຫວຽດນາມ. ເຂົາເຈົ້າພ້ອມກັນແບ່ງປັນຄວາມພາກພູມໃຈດ້ວຍບັນດາໝາກຜົນພັດທະນາເສດຖະກິດ - ສັງຄົມຂອງ ຫວຽດນາມ ພາຍຫຼັງ 40 ປີ.