ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸ້ງ
ແລະ ທ່ານນາຍົກລັດຖະມົນຕີໄທ ປຣາຢຸດ ຈັນໂອຈາ
(ພາບ:Đức Tám – TTXVN)
(vovworld) - ໂດຍໄດ້ຮັບຄຳເຊີນຂອງທ່ານນາຍົກລັດຖະມົນຕີໄທ ປຣາຢຸດ ຈັນໂອຈາ, ວັນທີ 23/7, ທ່ານນາຍົກລັດຖະມົນຕີຫວຽດນາມ ຫງວຽນເຕິນຢຸ້ງ ແລະ ພັນລະຍາພ້ອມກັບຄະນະຜູ້ແທນຂັ້ນສູງຫວຽດນາມ ໄດ້ໄປຢ້ຽມຢາມລາຊະອານາຈັກໄທຢ່າງເປັນທາງການ. ພາຍຫຼັງພິທີຕ້ອນຮັບ, ທ່ານນາຍົກລັດຖະມົນຕີຫວຽດນາມ ຫງວຽນເຕິນ ຢຸ້ງ ໄດ້ມີການເຈລະຈາກັບທ່ານນາຍົກລັດຖະມົນຕີໄທ ປຣາຢຸດ ຈັນໂອຈາ; ພ້ອມກັບບັນດາສະມາຊິກລັດຖະບານ 2 ປະເທດດຳເນີນການປະຊຸມຄະນະລັດຖະບານລວມຫວຽດນາມ-ໄທ ຄັ້ງທີ 3.
ທີ່ການເຈລະຈາ ແລະ ການປະຊຸມຄະນະລັດຖະບານລວມ, ນາຍົກລັດຖະມົນຕີທັງ 2 ທ່ານ ແຈ້ງໃຫ້ກັນຮັບຊາບ ກ່ຽວກັບສະພາບການພັດທະນາຂອງແຕ່ລະປະເທດ. ທ່ານນາຍົກລັດຖະມົນຕີ ຫງວຽນເຕິນຢຸ້ງ ຢືນຢັນວ່າ: ຍາມໃດຫວຽດນາມ ກໍຖືເປັນສຳຄັນການຮັກສາ ແລະ ພັດທະນາສາຍພົວພັນມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານບົນຈິດໃຈຄູ່ຮ່ວມມືຍຸດທະສາດກັບໄທ, ສະໜັບສະໜູນໄທ ມີບົດບາດ ແລະ ປະກອບສ່ວນຢ່າງຕັ້ງໜ້າເຂົ້າໃນການຮັກສາສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ໃນໂລກ. ທ່ານນາຍົກລັດຖະມົນຕີໄທ ປຣາຢຸດ ຈັນໂອຈາ ສະແດງຄວາມປາດຖະໜາຢາກພ້ອມກັບຫວຽດນາມ ຮ່ວມມືຢ່າງແໜ້ນແຟ້ນ ເພື່ອແນໃສ່ນຳການພົວພັນ 2 ປະເທດໃຫ້ພັດທະນານັບມື້ນັບຮອບດ້ານ, ມີປະສິດທິຜົນ ແລະ ແທດຈິງກ່ວາ. ນາຍົກລັດຖະມົນຕີ 2 ທ່ານ ໄດ້ເປັນເອກະພາບນຳກັນ ວາງອອກບັນດາທິດທາງຮ່ວມມືໃຫຍ່ໃນໄລຍະຈະມາເຖິງ ເພື່ອແນໃສ່ເຮັດໃຫ້ການພົວພັນຄູ່ຮ່ວມມືຍຸດທະສາດ ຫວຽດນາມ-ໄທ ເລິກເຊິ່ງ ແລະ ມີປະສິດທິຜົນກ່ວາອີກ. ກ່ຽວກັບດ້ານການເມືອງ, 2 ຝ່າຍເຫັນດີເປັນເອກະສັນເພີ່ມທະວີການແລກປ່ຽນບັນດາຄະນະຜູ້ແທນຂັ້ນສູງ ແລະ ທຸກຂັ້ນ; ປະຕິບັດໂຄງການດຳເນີນງານຜັນຂະຫຍາຍການພົວພັນຄູ່ຮ່ວມມືຍຸດທະສາດ ຫວຽດນາມ-ໄທ ໄລຍະ 2014-2018 ເປັນຢ່າງດີ. ກ່ຽວກັບດ້ານເສດຖະກິດ, 2 ຝ່າຍເຫັນດີເປັນເອກະສັນສູ້ຊົນນຳວົງເງິນການຄ້າ 2 ຝ່າຍຂຶ້ນ 20 ຕື້ USD ໃນປີ 2020. 2 ຝ່າຍກໍເຫັນດີເພີ່ມທະວີການຮ່ວມມືລະຫວ່າງບັນດາທ້ອງຖິ່ນຂອງ 2 ປະເທດ ກໍຄືຍູ້ແຮງການພົວພັນແລກປ່ຽນປະຊາຊົນ.
ນາຍົກລັດຖະມົນຕີທັງ 2 ທ່ານກໍ່ແລກປ່ຽນບັນດາບັນຫາສາກົນ ແລະ ພາກພື້ນເຊິ່ງທັງ 2 ຝ່າຍຕ່າງໆມີຄວາມສົມໃຈຢ່າງເລິກເຊິ່ງ, ກ້ວາງຂວາງ. 2 ຝ່າຍຢືນຢັນຄືນທັດສະນະ ຊຶ່ງໄດ້ຍົກອອກໃນຖະແຫຼງການຂອງປະທານກອງປະຊຸມຂັ້ນສູງ ອາຊຽນ 26 ຢູ່ ກົວລາລຳເປີປະເທດ ມາເລເຊຍ (ເດືອນ 4 /2015); ຢືນຢັນຄຳໝັ້ນສັນຍາສືບຕໍ່ຮ່ວມມືຢ່າງແໜ້ນແຟ້ນນຳກັນ ແລະ ກັບບັນດາປະເທດ ອາຊຽນ ອື່ນໆ ເພື່ອແນໃສ່ຊຸກຍູ້ການປະຕິບັດຈຸດໝາຍສ້າງຕັ້ງປະຊາຄົມ ອາຊຽນ ໃນທ້າຍປີ 2015 ແລະ ໄລຍະຕໍ່ໄປ; ພ້ອມທັງຮັກສາບົດບາດນຳພາ ແລະ ໃຈກາງຂອງ ອາຊຽນ ໃນບັນຫາຍຸດທະສາດຕ່າງໆຢູ່ພາກພື້ນ. 2 ຝ່ານເນັ້ນໜັກເຖິງ: ຄວາມຈຳເປັນຂອງເລື່ອງບັນດາຝ່າຍທີ່ກ່ຽວຂ້ອງຮັບປະກັນປະຕິບັດຢ່າງຄົບຖ້ວນ ແລະ ມີປະສິດທິຜົນ ຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC); ກໍ່ສ້າງ, ຮັກສາ ແລະ ເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ; ລະງົບໃຈ ແລະ ບໍ່ນຳໃຊ້ ຫຼື ຂົ່ມຂູ່ນຳໃຊ້ກຳລັງອາວຸດ; ແກ້ໄຂການຂັດແຍ້ງກັນຜ່ານບັນດາມາດຕະການສັນຕິພາບ, ເໝາະສົມກັບກົດໝາຍສາກົນ, ໃນນັ້ນມີສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລ 1982 (UNCLOS); ເພີ່ມທະວີການເຈລະຈາ ແລະ ທາບທາມຄຳເຫັນເພື່ອບັນລຸໄດ້ປະມວນຂໍ້ກຳນົດກ່ຽວກັບການປະພຶດຢູ່ທະເລຕາເວັນອອກ (COC).
ສິ້ນສຸດກອງປະຊຸມ, ນາຍົກລັດຖະມົນຕີທັງ 2 ທ່ານໄດ້ເປັນສັກຂີພິຍານພິທີລົງນາມບັນດາຂໍ້ຕົກລົງຮ່ວມມື, ລວມມີ: ຖະແຫຼງການຮ່ວມກ່ຽວກັບກອງປະຊຸມຄະນະລັດຖະບານຮ່ວມ ຫວຽດນາມ - ໄທ ຄັ້ງທີ 3, ບົດບັນທຶກຊ່ວຍຈຳກ່ຽວກັບການຮ່ວມມືແຮງງານ; ຂໍຕົກລົງກ່ຽວກັບການຮັບສະໝັກແຮງງານ; ບົດບັນທຶກຊ່ວຍຈຳກ່ຽວກັບການຮ່ວມມືລະຫວ່າງແຂວງ ລອງອານ (ຫວຽດນາມ) ແລະ ແຂວງ ຕຣາດ (ໄທ); ບົດບັນທຶກຊ່ວຍຈຳກ່ຽວກັບການຮ່ວມມືລະຫວ່າງແຂວງ ກອນຕູມ (ຫວຽດນາມ) ແລະ ແຂວງ ອຸບົນ ຣາດຈະທານີ (ໄທ). ພາຍຫຼັງພິທີລົງນາມ, 2 ຝ່າຍໄດ້ຈັດຕັ້ງກອງປະຊຸມຂ່າວກ່ຽວກັບການຢ້ຽມຢາມ ໄທ ຢ່າງເປັນທາງການຂອງທ່ານ ນາຍົກລັດຖະມົນຕີ ຫງວຽນເຕີ໋ນຢູງ ແລະ ໝາກຜົນຂອງກອງປະຊຸມຄະນະລັດຖະບານຮ່ວມ ຫວຽດນາມ - ໄທ ຄັ້ງທີ 3, ອອກແຈ້ງການສື່ມວນຊົນຮ່ວມກ່ຽວກັບການຢ້ຽມຢາມດັ່ງກ່າວ. ກ່າວຄວາມເຫັນທີ່ການປະຊຸມຂ່າວ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ, ໃຫ້ຮູ້ວ່າ:
“ມາຮອດປະຈຸບັນ, ໄທແມ່ນຄູ່ຮ່ວມມືດ້ານການຄ້າໃຫຍ່ກວ່າໝູ່ຂອງຫວຽດນາມໃນບັນດາປະເທດອາຊຽນ. ປີ 2015, ການຄ້າ 2 ສົ້ນລະຫວ່າງສອງປະເທດອາດຈະບັນລຸໄດ້ 12 ຕື້ USD ເພີ່ມຂຶ້ນປະມານ 13%-15% ເມື່ອທຽບໃສ່ປີ 2014. ດັ່ງນັ້ນຮອດປີ 2020 ວົງເງິນການຄ້າສອງສົ້ນອາດຈະບັນລຸໄດ້ 20 ຕື້ USD, ປະຈຸບັນ, ໄທຢືນອັນດັບ 10 ໃນຈຳນວນ 103 ປະເທດ ແລະ ເຂດແຄວ້ນທີ່ລົງທຶນໂດຍກົງເຂົ້າຫວຽດນາມ, ດ້ວຍຍອດຈຳນວນທຶນປະມານ 7 ຕື້ USD. ຫວຽດນາມ ຈະສ້າງທຸກເງື່ອນໄຂສະດວກໃຫ້ບັນດານັກລົງທຶນໄທລົງທຶນສຳເລັດຜົນຢູ່ຫວຽດນາມ ແລະ ຫວັງວ່າ ໄທ ຈະກາຍເປັນໜຶ່ງໃນບັນດາປະເທດລົງທຶນແຖວໜ້າຢູ່ຫວຽດນາມໃນອະນາຄົດ“.