(vovworld) – ໃນຂອບເຂດການຢ້ຽມຢາມ ແລະ ເຮັດວຽກຢູ່ລາວ ໃນລະຫວ່າງວັນທີ 23-28/12, ຕອນເຊົ້າວັນທີ 24/12, ຄະນະຜູ້ແທນສານປະຊາຊົນສູງສຸດ ຫວຽດນາມ ໂດຍທ່ານຮອງປະທານສານ ບຸ່ຍງອກຮ່ວາ ນຳໜ້າຄະນະ, ໄດ້ເຈລະຈາກັບຄະນະຜູ້ແທນສານປະຊາຊົນສູງສຸດ ລາວ, ໂດຍທ່ານຮອງປະທານສານ ຄຳພາ ແສງດາຣາ ເປັນຫົວໜ້າຄະນະ. 2 ຝ່າຍ ໄດ້ແຈ້ງໃຫ້ກັນຊາບສະພາບການເຄື່ອນໄຫວຂອງສານແຕ່ລະປະເທດ, ຕີລາຄາຄືນຜົນງານການຮ່ວມມືໃນໄລຍະຜ່ານມາ, ແບ່ງປັນບົດຮຽນໃນການພິພາກສາ ແລະ ການຄຸ້ມຄອງສານ, ການຈັດຕັ້ງບາງຊຸດເຝຶກອົບຮົມໃຫ້ພະນັກງານສານປະຊາຊົນສູງສຸດລາວ, ອັນໄດ້ນຳມາເຊິ່ງບັນດາຜົນປະໂຫຍດລະອຽດ, ແທດຈິງໃຫ້ທັງລະບົບສານຂອງ 2 ປະເທດ, ປະກອບສ່ວນ ຕັ້ງໜ້າເຂົ້າໃນການພັດທະນາລວມຂອງສາຍພົວພັນ, ຮ່ວມມືທີ່ເປັນມູນເຊື້ອ ລະຫວ່າງ 2 ປະເທດ. ໃນໄລຍະຈະມາເຖິງ, 2 ຝ່າຍຈະສືບຕໍ່ແລກປ່ຽນຄະນະຜູ້ແທນທຸກຂັ້ນ ເພື່ອແນໃສ່ແບ່ງປັນບົດຮຽນພິພາກສາ, ການປະຕິຮູບດ້ານຕຸລາການ; ສົມທົບກັບບັນດາອົງການທີ່ກ່ຽວຂ້ອງຂອງຫວຽດນາມ ສືບຕໍ່ຈັດຕັ້ງບັນດາຊຸດເຝຶກອົບຮົມໄລຍະສັ້ນໃຫ້ພະນັກງານຂະແໜງສານລາວ, ມຸ່ງໄປເຖິງບຳລຸງສ້າງຂັ້ນມະຫາວິທະຍາໄລໃຫ້ນັກສຶກສາລາວ. ທີ່ການເຈລະຈາ, 2 ຝ່າຍໄດ້ປຶກສາຫາລືກ່ຽວກັບວຽກງານຈັດຕັ້ງກອງປະຊຸມບັນດາແຂວງ ມີເສັ້ນຊາຍແດນລວມລະຫວ່າງ 3 ປະເທດ ລາວ, ຫວຽດນາມ ແລະ ກຳປູເຈຍ, ເຊິ່ງດຳເນີນໃນລະຫວ່າງວັນທີ 24-28/12 ຢູ່ນະຄອນຫຼວງວຽງຈັນ ແລະ ບາງວຽກງານທີ່ຂຶ້ນກັບການພິພາກສາ, ການຈັດຕັ້ງ ແລະ ການເຄື່ອນໄຫວຂອງສານປະຊາຊົນທຸກຂັ້ນຂອງລາວ.