(vovworld) - ງານຊຸມນຸມມິດຕິງສະເຫຼີມສະຫຼອງ 70 ປີແຫ່ງວັນເລືອກຕັ້ງທົ່ວປະເທດຄັ້ງທຳອິດຂອງສະພາແຫ່ງຊາດ ຫວຽດນາມ (6/1/1946 – 6/1/2016) ຖຶກຈັດຕັ້ງໃນຕອນເຊົ້າວັນທີ 6/1, ຢູ່ສຳນັກງານສະພາແຫ່ງຊາດ. ເຂົ້າຮ່ວມພິທີມີການນຳພັກ, ລັດ, ສະພາແຫ່ງຊາດ, ແນວໂຮມປະເທດຊາດ ຫວຽດນາມ, ນອກຈາກນັ້ນຍັງມີທ່ານປະທານສະພາແຫ່ງຊາດລາຊະອານາຈັກ ກຳປູເຈຍ Heng Samrin, ທ່ານນາງປະທານສະພາແຫ່ງຊາດ ລາວ ປານີ ຢ່າທໍ່ຕູ້ ແລະ ບັນດາສະມາຊິກສະພາແຫ່ງຊາດ ຫວຽດນາມ ຈາກຊຸດທີ 1 ຫາ ຊຸດທີ 13.
ກ່າວຄຳເຫັນໄຂງານຊຸມນຸມມິດຕິງ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ຢັ້ງຢືນວ່າ: ວັນທີ 6/1/1946 ເປັນຂີດໝາຍຮູ່ງເຮືອງເຫຼືອເຫຼື້ອມໃນປະຫວັດສາດ ຫວຽດນາມ, ເປັນຂີດໝາຍບາດກ້າວພັດທະນາຢ່າງກະໂດດຂັ້ນກ່ຽວກັບລະບອບປະຊາທິປະໄຕ, ເປີດໄລຍະພັດທະນາໃໝ່ຂອງປະເທດ ຫວຽດນາມ. ທ່ານເລຂາທິການໃຫຍ່ ຫງວຽນຟູ໋ຈ້ອງ, ຢັ້ງຢືນວ່າ:
“ຍາມໃດສະພາແຫ່ງຊາດກໍ່ເປັນບ່ອນເຕົ້າໂຮມກຸ່ມກ້ອນມະຫາສາມັກຄີທົ່ວປວງຊົນ. ສະພາແຫ່ງຊາດຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ. ນັບແຕ່ຊຸດທີ 1, ໃນໂຄງປະກອບ ແລະ ວິທີການຈັດຕັ້ງຂອງສະພາແຫ່ງຊາດໄດ້ສະແດງໃຫ້ເຫັນລັກສະນະເປັນຕົວແທນໃຫ້ເຈດຈຳນົງ, ຄວາມມຸ່ງມາດປາດຖະໜາ ແລະ ສິດເປັນເຈົ້າຂອງປະຊາຊົນ, ຕິດພັນຢ່າງສະໜິດແໜ້ນກັບປະຊາຊົນ.”
ຕາມທ່ານເລຂາທິການໃຫຍ່ ຫງວຽນຟູ໋ຈ້ອງ ແລ້ວ, ໃນສະພາບການປະຈຸບັນ, ທົ່ວພັກ, ທົ່ວກອງທັບ, ທົ່ວປວງຊົນ ຫວຽດນາມ ຕ້ອງສາມັກຄີຢ່າງແໜ້ນແຟ້ນ, ຍາດແຍ່ງກາລະໂອກາດສະດວກ, ມານະພະຍາຍາມຜ່ານຜ່າທຸກໆຄວາມຫຍຸ້ງຍາກເພື່ອໃຫ້ປະເທດຊາດພັດທະນາໄວ ແລະ ໝັ້ນຄົງ. ທ່ານເລຂາທິການໃຫຍ່ ຫງວຽນຟູ໋ຈ້ອງ ຊີ້ແຈ້ງວ່າ:
“ປີ 2016 ແລະ ຊຸມປີຕໍ່ໄປ, ທົ່ວພັກ, ທົ່ວປະຊາຊົນ ແລະ ທົ່ວກອງທັບ ຫວຽດນາມ ມີໜ້າທີ່ມານະພະຍາຍາມສູ້ຊົນຜັນຂະຫຍາຍປະຕິບັດມະຕິຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກ ແລະ ແຜນການພັດທະນາເສດຖະກິດ - ສັງຄົມໄລຍະ 5 ປີ 2016 – 2020 ເຊິ່ງຈຸດສຸມແມ່ນສືບຕໍ່ພັດທະນາເສດຖະກິດສັງຄົມໄວ ແລະ ຍືນຍົງ, ຮັກສາເສດຖະກິດມະຫາພາກເປັນປົກກະຕິ, ຍູ້ແຮງການປະຕິບັດບັນດາບາດບຸກທະລຸຍຸດທະສາດ, ສ້າງໂຄງປະກອບພື້ນຖານເສດຖະກິດຄືນໃໝ່ຕິດພັນກັບການປ່ຽນໃໝ່ຮູບແບບການເຕີບໂຕ, ຍົກສູງປະສິດທິພາບ, ຄຸນນະພາບ, ປະສິດທິຜົນ ແລະ ກຳລັງແກ່ງແຍ້ງຂອງພື້ນຖານເສດຖະກິດ. ພັດທະນາວັດທະນະທຳ, ປະຕິບັດຄວາມກ້າວໜ້າ ແລະ ຄວາມຍຸຕິທຳທາງສັງຄົມ, ຍົກສູງຊີວິດການເປັນຢູ່ຂອງປະຊາຊົນ.”