(vovworld) - ງານໂຮມຊຸມນຸມ, ສວນສະໜາມ ສະເຫຼີມສະຫຼອງ 40 ປີແຫ່ງວັນປົດປ່ອຍພາກໃຕ້, ໂຮມປະເທດຊາດເປັນເອກະພາບ (30/4/1975-30/4/2015) ຖືກຈັດຕັ້ງໃນຕອນເຊົ້າວັນທີ 30/4 ຢູ່ນະຄອນ ໂຮ່ຈີມິນ. ເຂົ້າຮ່ວມພິທີມີທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ, ທ່ານປະທານປະເທດ ເຈືອງເຕິ໋ນຊາງ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ, ທ່ານປະທານສະພາແຫ່ງຊາດ ຫງວຽນຊິງຮຸ່ງ ແລະ ບັນດາການນຳພັກ, ລັດ, ສະພາແຫ່ງຊາດ, ອະດີດການນຳພັກ, ລັດ, ສະພາແຫ່ງຊາດ, ການນຳ, ອະດີດການນຳກະຊວງ, ຂະແໜງການສູນກາງ, ບັນດານາຍພົນ, ອະດີດນັກຮົບ, ແມ່ຫວຽດນາມວິລະຊົນ, ແລະ ຜູ້ຕາງໜ້າປະຊາຊົນທຸກຊັ້ນວັນນະ ກໍ່ຄືບັນດາຄະນະຜູ້ແທນສາກົນຄື, ລາວ, ກຳປູເຈຍ, ກູບາ… ໄດ້ເຂົ້າຮ່ວມຢ່າງພ້ອມພຽງ.
ອ່ານສຸນທອນພົດນະພິທີ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ໄດ້ຊີ້ແຈ້ງຄວາມໝາຍອັນໃຫຍ່ຫຼວງຂອງມະຫາໄຊໃນລະດູບານໃໝ່ 1975.
“ມະຫາໄຊໃນລະດູບານໃໝ່ 1975 ແມ່ນປະຫວັດສາດອັນສະຫງ່າລາສີໃນປະຫວັດແຫ່ງການສ້າງສາ ແລະ ປົກປັກຮັກສາປະເທດຊາດ. ພວກເຮົາໄດ້ປະຕິບັດສຳເລັດພາລະກຳປະຫວັດສາດອັນສະຫງ່າລາສີນັ້ນແມ່ນປົດປ່ອຍພາກໃຕ້ຢ່າງສົມບຸນ, ໂຮມປະເທດຊາດເປັນເອກະພາບ, ນຳປະເທດຫວຽດນາມກ້າວເຂົ້າສູ່ສັງກາດໃໝ່, ສັງກາດແຫ່ງເອກະລາດ, ເອກະພາບ ແລະ ພ້ອມກັນກໍ່ສ້າງປະເທດຫວຽດນາມ, ປະຊາຊົນຮັ່ງມີ, ປະເທດຊາດເຂັ້ມແຂງ, ປະຊາທິປະໄຕ, ຍຸຕິທຳ, ສີວິໄລ“.
ທ່ານນາຍົກລັດຖະມົນຕີ ຫງວຽນເຕິ໋ນຢຸງ ກໍ່ຂອບອົກຂອບໃຈບັນດາປະເທດສັງຄົມນິຍົມ, ພິເສດແມ່ນປະເທດໂຊວຽດ, ຈີນ, ບັນດາອົງການຈັດຕັ້ງ ແລະ ປະຊາຊົນຜູ້ຮັກຫອມສັນຕິພາບໃນໂລກ ທີ່ໄດ້ສະໜັບສະໜູນ, ຊ່ວຍເຫຼືອນັບທັງດ້ານວັດຖຸ, ຈິດໃຈຢ່າງສຸດຈິດສຸດໃຈໃຫ້ແກ່ການຕໍ່ສູ້ອັນເປັນທຳ ເພື່ອຍາດເອົາເອກະລາດແຫ່ງຊາດ, ໂຮມປະເທດຊາດເປັນເອກະພາບຂອງຫວຽດນາມ. ໃນໄລຍະປະຈຸບັນ, ທ່ານນາຍົກລັດຖະມົນຕີ ຫງວຽນເຕິ໋ນຢຸງ ເນັ້ນໜັກວ່າ:
“ໂດຍເສີມຂະຫຍາຍນຳ້ໃຈ ມະຫາໄຊໃນລະດູບານໃໝ່ 1975, ທົ່ວພັກ, ທົ່ວກອງທັບ ແລະ ທົ່ວປວງຊົນໝັ້ນໝາຍພ້ອມກັນຮ່ວມແຮງຮ່ວມໃຈ, ພະຍາຍາມສູ້ຊົນ, ປະຕິບັດໃຫ້ໄດ້ຄວາມມຸ້ງຫວັງຂອງປະທານ ໂຮ່ຈີມິນທີ່ວ່າ ກໍ່ສ້າງປະເທດໃຫ້ພັດທະນາ ແລະ ສວຍງາມກວ່າເກົ່າ. ທົ່ວພັກ, ທົ່ວກອງທັບ ແລະ ທົ່ວປວງຊົນ, ແຕ່ລະຄົນຈົ່ງພ້ອມກັນຍູ້ແຮງຮອບດ້ານພາລະກິດປ່ຽນໃໝ່, ນຳປະເທດໃຫ້ພັດທະນາກາຍເປັນປະເທດອຸດສາຫະກຳຕາມທິດທັນສະໄໝໂດຍໄວ“.
ຖັດມາຜູ້ຕາງໜ້ານັກຮົບເກົ່າ, ພົນຕີ ຫງວຽນວັນທ້າຍໄດ້ປະກອບຄຳເຫັນຫວນຄືໄຊຊະນະປະຫວັດສາດອັນສະຫງ່າລາສີວັນທີ 30/4. ນັກສຶກສາ ຫງວຽນບາວເຟືອງຖູຍ, ມະຫາວິທະຍາໄລກົດໝາຍນະຄອນ ໂຮ່ຈີມິນ, ຕາງໜ້າໃຫ້ໄວໜຸ່ມທົ່ວປະເທດກ່າວຄວາມເຫັນ, ໂດຍຊີ້ແຈ້ງວ່າ, ໄວໜຸ່ມຫວຽດນາມໃຫ້ຄຳໝັ້ນສັນຍາສືບທອດມູນເຊື້ອ, ປະກອບສ່ວນເຂົ້າພາລະກິດສ້າງສາປະເທດຊາດ, ເຮັດໃຫ້ປະຊາຊົນຮັ່ງມີ, ປະເທດຊາດເຂັ້ມແຂງ, ສັງຄົມຍຸຕິທຳ,ປະຊາທິປະໄຕ ແລະ ສີວິໄລ.
ສຸດທ້າຍແມ່ນການສວນສະໜາມສະແດງກຳລັງດ້ວຍການເຂົ້າຮ່ວມຂອງກຳລັງປະກອບອາວຸດປະຊາຊົນ (ທະຫານ, ຕຳຫຼວດ, ກອງຫຼອນ…) ບັນດາກຳລັງມະຫາຊົນ: ກຳມະກອນ, ຊາວກະສີກອນ, ປັນຍາຊົນ, ນັກທຸລະກິດ, ແນວໂຮມປະເທດຊາດ, ສະມາຄົມນັກຮົບເກົ່າ, ສະມາຄົມອະດີດຊາວໜຸ່ມຕະລຸມບ່ອນ, ສະມາຄົມແມ່ຍິງ, ຊາວໜຸ່ມ…
ຕອນຄຳ່ວັນທີ 30/4, ນະຄອນໂຮ່ຈິມິນ, ຮ່າໂນ້ຍ ຈັດຕັ້ງການຍິງບັ້ງໄຟດອກເພື່ອຊົມເຊີຍ40 ປີແຫ່ງວັນປົດປ່ອຍພາກໃຕ້, ໂຮມປະເທດຊາດເປັນເອກະພາບ.