ຜູ້ຕາງໜ້າຄະນະຈັດຕັ້ງສະແດງການສະໜັບສະໜູນປະຊາຄົມ ຊາວ ຫວຽດນາມ ຢູ່ ເຊັກໂກ ສຳລັບຄຳຕັດສິນຂອງ PCA
(vovworld) – ຕອນບ່າຍວັນທີ 23/8, ຢູ່ສະໜາມຫຼວງ ປຣາຮາ, ກຸ່ມອ້າຍນ້ອງເພື່ອບ້ານເກີດເມືອງນອນ ແລະ ສະມາຄົມຊາວ ຫວຽດນາມ ຢູ່ນະຄອນ Chomutov ທີ່ ສ.ເຊັກໂກ ໄດ້ສົມທົບກັນຈັດຕັ້ງງານໂຮມຊຸມນຸມມິດຕິງສະໜັບສະໜູນຄຳຕັດສິນຂອງສານອະນຸຍາໂຕຕຸລາການ ຢູ່ ລາໄຮ (ປະເທດ ໂຮນລັງ) ກ່ຽວກັບທະເລຕາເວັນອອກ. ທ່ານ ຟ້າມຮົ່ງທ໋າຍ, ຜູ້ຕາງໜ້າຄະນະຈັດຕັ້ງ, ໄດ້ສະຫລຸບຫຍໍ້ບັນດາຄຳຕັດສິນໃນວັນທີ 12/7 ຂອງສານອະນຸຍາໂຕຕຸລາການກ່ຽວກັບກໍລະນີຟ້ອງຮ້ອງຈີນ ຂອງ ຟີລິບປິນ. ທ່ານເນັ້ນໜັກວ່າ: ຄຳຕັດສິນຂອງສານໄດ້ປະຕິເສດຄຳຮຽກສິດ “ເສັ້ນ 9 ຕອນ” ຂອງ ຈີນ, ປະຕິເສດຖະແຫຼງການກ່ຽວກັບ “ສິດປະຫວັດສາດ” ຂອງ ຈີນສຳລັບບັນດາຊັບພະຍາກອນຢູ່ເຂດທະເລດ້ວຍອັນໄດ້ເອີ້ນວ່າ “ເສັ້ນ 9 ຕອນ”… ຄະນະຈັດຕັ້ງໄດ້ອອກຖະແຫຼງການເປັນພາສາ ອັງກິດ ແລະ ພາສາ ເຊັກໂກ ຊົມເຊີຍເລື່ອງສານອະນຸຍາໂຕຕຸລາການ ອອກຄຳຕັດສິນກ່ຽວກັບການຂັດແຍ້ງກັນຢູ່ທະເລຕາເວັນອອກ, ສະໜັບສະໜູນການແກ້ໄຂການຂັດແຍ້ງກັນດ້ວຍມາດຕະການສັນຕິພາບບົນພື້ນຖານກົດໝາຍສາກົນ, ສະເໜີບັນດາປະເທດ, ບັນດາຝ່າຍກ່ຽວຂ້ອງຕ້ອງເຄົາລົບ ແລະ ປະຕິບັດຄຳຕັດສິນຂອງສານອະນຸຍາໂຕຕຸລາການ ແລະ ສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລ (UNCLOS), ຮຽກຮ້ອງໃຫ້ຈີນ ຈົ່ງຢຸດຕິບັນດາການເຄື່ອນໄຫວດ້ານການທະຫານ, ການເຄື່ອນໄຫວເພີ່ມທະວີຄວາມເຄັ່ງຕຶງກໍ່ຄືການເຄື່ອນໄຫວນາບຂູ່ຊາວປະມົງຫາປາຢູ່ທະເລຕາເວັນອອກ.