(vovworld) – ຕອນເຊົ້າວັນທີ 27/07, ສະຫະພັນໃຫຍ່ແຮງງານຫວຽດນາມ ໄດ້ຈັດກອງປະຊຸມຍ້ອງຍໍຊົມເຊີຍປະທານກຳມະບານຂັ້ນຮາກຖານດີເດັ່ນທົ່ວປະເທດ. ເຂົ້າຮ່ວມ ແລະ ກ່າວຄຳເຫັນທີ່ກອງປະຊຸມ, ທ່ານນາງຮອງປະທານສະພາແຫ່ງຊາດຫວຽດນາມ ຕ່ອງທິຟ໋ອງ ໃຫ້ຂໍ້ສັງເກດວ່າ: ໃນໄລຍະ 85 ປີແຫ່ງການກໍ່ສ້າງ ແລະ ເຕີບໃຫຍ່, ຍາມໃດກຳມະບານຫວຽດນາມ ກໍ່ຕັ້ງໜ້າ ແລະ ຜັນຂະຫຍາຍບັນດາແຜນນະໂຍບາຍ, ແນວທາງຂອງພັກ, ນະໂຍບາຍ, ກົດໝາຍຂອງລັດຢ່າງທັນການ, ປຸກລະດົມບັນດາຂະບວນການແຂ່ງຂັນອອກແຮງງານເກັ່ງ, ຄົນງານມີຫົວຄິດປະດິດສ້າງເປັນປະຈຳ… ທ່ານນາງຮອງປະທານສະພາແຫ່ງຊາດ ຕ່ອງທິຟ໋ອງ ສະເໜີວ່າ.
“ກຳມະບານຕ້ອງສືບຕໍ່ເປັນເສນາທິການ, ສະເໜີຕໍ່ພັກ, ລັດ ກ່ຽວກັບບັນດາມາດຕະການແກ້ໄຂເພື່ອແກ້ໄຂບັນຫາປະຕິບັດນະໂຍບາຍເງິນເດືອນ, ເງິນບຳບັດ, ປະຕິບັດບັນດານະໂຍບາຍປະກັນສັງຄົມ, ປະກັນສຸຂະພາບ, ເບິ່ງແຍງດູແລຄົນເຈັບຍ້ອມຕິດພະຍາດອາຊີບ… ນີ້ແມ່ນບັນດາບັນຫາຮີບດ່ວນທີ່ສຸດຂອງຄົນງານ ເຊິ່ງບັນດາພະນັກງານກຳມະບານຂັ້ນຮາກຖານຕ້ອງເອົາໃຈໃສ່ເປັນພິເສດ. ອົງການກຳມະບານທຸກຂັ້ນ ຕ້ອງສົມທົບກັນໂຄສະນາ, ຜັນຂະຫຍາຍກົດໝາຍວ່າດ້ວຍກຳມະບານ (ສະບັບປັບປຸງ) ແລະ ກົດໝາຍວ່າດ້ວຍແຮງງານ (ສະບັບປັບປຸງ) ເປັນຢ່າງດີ ເພື່ອໃຫ້ຄົນງານ, ຜູ້ນຳໃຊ້ຄົນງານເຂົ້າໃຈ ແລະ ປະຕິບັດຢ່າງຖືກຕ້ອງ”.
ທ່ານນາງຮອງປະທານສະພາແຫ່ງຊາດ ຕ່ອງທິຟ໋ອງ ກໍ່ສະເໜີໃຫ້ສະຫະພັນໃຫຍ່ແຮງງານຫວຽດນາມ ຕ້ອງມີແຜນການຢ່າງລະອຽດ, ຊີ້ນຳວຽກງານພັດທະນາ ແລະ ປ່ຽນໃໝ່ເນື້ອໃນ, ວິທີການເຄື່ອນໄຫວກຳມະບານໃນບັນດາວິສາຫະກິດ…ຢ່າງຂ້ຽວຂາດ ເພື່ອໃຫ້ກຳມະບານເປັນຜູ້ຕາງໜ້າປົກປ້ອງສິດ ແລະ ຜົນປະໂຫຍດອັນຊອບທຳຂອງຄົນງານຢ່າງແທດຈິງ.