( vovworld ) - ສະເຫຼີມສະຫຼອງ 83 ປີແຫ່ງວັນສ້າງຕັ້ງອົງການກຳມະບານຫວຽດນາມ (28/7/1929 – 28/7/2012), ຕອນເຊົ້າວັນທີ 28/7 ຢູ່ຮ່າໂນ້ຍ, ສະຫະພັນໃຫຍ່ແຮງງານຫວຽດນາມ ໄດ້ຈັດຕັ້ງກອງປະຊຸມຍ້ອງຍໍສັນລະເສີນພະນັກງານກຳມະບານຂັ້ນຮາກຖານທີ່ດີເດັ່ນທົ່ວປະເທດຄັ້ງທີ 2. ທີ່ກອງປະຊຸມ, ມີພະນັກງານກຳມະບານຂັ້ນຮາກຖານທີ່ດີເດັ່ນ 110 ຄົນໄດ້ຮັບການເຊີດຊູ. ນີ້ແມ່ນບັນດາພະນັກງານກຳມະບານດີເດ່ັນ, ມີວິທີການ ແລະ ທັກສະໃນການເຄື່ອນໄຫວວຽກງານກຳມະບານ, ມີນ້ຳໃຈຮັບຜິດຊອບ, ໃກ້ຊິດກັບກຳມະກອນ, ຜູ້ອອກແຮງງານ; ກ້າເສຍສະຫຼະສິດຜົນປະໂຫຍດສ່ວນຕົວເພື່ອເກັ້ຍກ່ອມຕໍ່ສູ້ປົກປ້ອງສິດ, ຜົນປະໂຫຍດອັນຊອບທຳຂອງຜູ້ອອກແຮງງານ; ມີການປະກອບສ່ວນຫຼາຍຢ່າງເຂົ້າໃນການສ້າງຂະບວນການກຳມະກອນຜູ້ອອກແຮງງານ ແລະ ຈັດຕັ້ງອົງການກຳມະບານເຂົ້ມແຂງ. ກ່າວຄຳເຫັນທີ່ກອງປະຊຸມ, ທ່ານນາງຮອງປະທານສະພາແຫ່ງຊາດ Nguyen Thi Kim Ngan ໄດ້ເນັ້ນໜັກວ່າ.
“ ຍາມໃດພັກ, ລັດ ແລະ ປະຊາຊົນກໍມີຄວາມໄວ້ເນື້ອເຊື່ອໃຈຕໍ່ຊົນຊັ້ນກຳມະກອນ ແລະ ອົງການກຳມະບານ; ພ້ອມກັນນັ້ນ ຮຽກຮ້ອງເຮັດແນວໃດເພື່ອໃຫ້ອົງການກຳມະບານ ປະຕິບັດບົດບາດໜ້າທີ່ຂອງຕົນ ເພື່ອສືບຕໍ່ສ້າງຊົນຊັ້ນກຳມະກອນຫວຽດນາມ. ຂ້າພະເຈົ້າຫວັງວ່າ ໃນໄລຍະຈະມາເຖິງ, ອົງການຈັດຕັ້ງກຳມະບານຫວຽດນາມ ຈະສົມເປັນບ່ອນອີງຂອງກຳມະກອນ, ພະນັກງານ ແລະ ຜູ້ອອກແຮງງານ. ເປັນຂົວເຊື່ອມຕໍ່ລະຫວ່າງພັກ ແລະ ຊົນຊັ້ນກຳມະກອນຢ່າງແທດຈິງ ”.