ທ່ອງທ່ຽວຕ້ອງກາຍເປັນຂະແໜງປາຍແຫຼມຂອງຫວຽດນາມ
(ທ່ານນາຍົກລັດຖະມົນຕີຫວຽນຊວນຟຸກ
ເຂົ້າຮ່ວມກອງປະຊຸມສະຫຼຸບວຽກງານວັດທະນະທຳ, ກິລາ, ແລະ ທ່ອງທ່ຽວ)
(vovworld) – ຕອນເຊົ້າ ວັນທີ 12/1 ຢູ່ຮ່າໂນ້ຍ, ທ່ານນາຍົກລັດຖະມົນຕີຫວຽນຊວນຟຸກ, ທ່ານຮອງນາຍົກລັດຖະມົນຕີ ຫວູດຶກດາມ ໄດ້ເຂົ້າຮ່ວມກອງປະຊຸມສະຫຼຸບວຽກງານວັດທະນະທຳ, ກິລາ, ແລະ ທ່ອງທ່ຽວ ປີ 2016, ຜັນຂະຫຍາຍໜ້າທີ່ປີ 2017 ຂອງກະຊວງວັດທະນະທຳ, ກິລາ ແລະ ທ່ອງທ່ຽວ.
ກ່າວຄຳເຫັນຊີ້ນຳກອງປະຊຸມ, ທ່ານນາຍົກລັດຖະມົນຕີຫວຽນຊວນຟຸກ ຕີລາຄາສູງບັນດາໝາກຜົນຂອງຂະແໜງໃນປີຜ່ານມາ. ເຖິງຢ່າງໃດກໍ່ຕາມ, ທ່ານນາຍົກລັດຖະມົນຕີຖືວ່າ: ເຖິງວ່າຄວາມສາມາດບົ່ມຊ້ອນ ແລະ ທ່າໄດ້ປຽບພັດທະນາໃຫຍ່ແຕ່ກຳລັງແກ້ງແຍ້ງຂອງຂະແໜງທ່ອງທ່ຽວຍັງຕ່ຳ ແລະ ຍັງບໍ່ທັນກາຍເປັນຂະແໜງເສດຖະກິດປາຍແຫຼມໃນຈຸດເວລາື ປະຈຸບັນກໍ່ຕາມ. ແຕ່ເພື່ອບັນລຸຈຸດໝາຍນຳການທ່ອງທ່ຽວໃຫ້ກາຍເປັນຂະແໜງເສດຖະກິດປາຍແຫຼມຂອງຫວຽດນາມ, ທ່ານນາຍົກລັດຖະມົນຕີຖືວ່າ ຂະແໜງທ່ອງທ່ຽວຄວນຕອບໃຫ້ໄດ້ 5 ຄຳຖາມ:
“ ຄຳຖາມທີ 1 ແມ່ນເຮັດແນວໃດເພື່ອໃຫ້ນັກທ່ອງທ່ຽວຮູ້ຈັກເຖິງຫວຽດນາມ, ມາຢ້ຽມຢາມສະຖານທີ່ທ່ອງທ່ຽວນັບມື້ນັບຫຼາຍກວ່າ ? ເຮັດແນວໃດເພື່ອໃຫ້ນັກທ່ອງທ່ຽວຢູ່ຢ້ຽມຢາມເປັນເວລາດົນກວ່າ ? ເຮັດແນວໃດເພື່ອໃຫ້ນັກທ່ອງທ່ຽວໃຊ້ຈ່າຍເງິນຫຼາຍກວ່າແທນທີ່ໃຫ້ບໍ່ມີຫຍັງເພື່ອໃຊ້ຈ່າຍ ? ແລະ ເຮັດແນວໃດເພື່ອໃຫ້ນັກທ່ອງທ່ຽວໄດ້ເລົ່າຄືນບັນດາເລື່ອງລາວທ່ອງທ່ຽວທີ່ຈັບອົກຈັບໃຈຕໍ່ໝູ່ເພື່ອນທີ່ເຕັມໄປດ້ວຍຄວາມກະຕືລືລົ້ນຢາກມາທ່ຽວ ? ພາບພົດຫວຽດນາມຕົ້ນຕໍແມ່ນຢູ່ບັນຫານັ້ນ, ນຳວັດທະນະທຳຫວຽດນາມອອກສູ່ຕ່າງປະເທດແມ່ນຜ່ານບັນຫານັ້ນ. ຄໍຖາມສຸດທ້າຍແມ່ນ ເຮັດແນວໃດເພື່ອໃຫ້ນັກທ່ອງທ່ຽວກັບຄືນມາທ່ອງທ່ຽວໃໝ່ອີກ ໃນເວລາໄວທີ່ສຸດ”
ປີ 2016 ຈຳນວນນັກທ່ອງທ່ຽວສາກົນມາຢ້ຽມຢາມຫວຽດນາມບັນລຸລະດັບສະຖິຕິ ດ້ວຍ 10 ລ້ານເທື່ອຄົນ, ເພີ່ມຂຶ້ນ 26% ເມື່ອທຽບໃສ່ປີ 2015. ລວມຍອດລາຍຮັບຈາກການທ່ອງທ່ຽວບັນລຸກວ່າ 400.000 ຕື້ດົ່ງ, ບັນລຸຄາດໝາຍທີ່ໄດ້ວາງອອກກ່ອນກຳນົດເວລາ 4 ປີ.