ທ່ານນາຍົກລັດຖະມົນຕີໄທປະກາດບໍ່ລາອອກຈາກຕຳແໜ່ງໂດຍບໍ່ຫົວຊາຕໍ່ຜົນການລົງປະຊາມະຕິ
ທ່ານ ປາຢຸດ ຈັນໂອຊາ ນາຍົກລັດຖະມົນຕີໄທ
(ພາບສຳນັກຂ່າວສານຫວຽດນາມ)
(vovworld) – ທ່ານ ປາຢຸດ ຈັນໂອຊາ ນາຍົກລັດຖະມົນຕີໄທ ປະກາດບໍ່ລາອອກຈາກຕຳແໜ່ງ ຖ້າປະຊາຊົນປະເທດນີ້ ປະຕິເສດຮ່າງລັດຖະທຳມະນູນ ໃນການລົງປະຊາມະຕິ ໃນເດືອນ 8 ທີ່ຈະມາເຖິງ. ເມື່ອຕອບສຳພາດຕໍ່ວົງການນັກຂ່າວ ໃນວັນທີ 27/6, ທ່ານນາຍົກລັດຖະມົນຕີ ປາຢຸດ ໃຫ້ຮູ້ຕື່ມອີກວ່າ ອຳນາດການປົກຄອງໄທ ຈະດຳເນີນການປະຕິຮູບດ້ານການເມືອງ ແລະ ເສດຖະກິດ ກ່ອນການເລືອກຕັ້ງທົ່ວປະເທດ ຄາດຄະເນວ່າຈະຈັດຕັ້ງ ໃນປີ 2017. ຮ່າງລັດຖະທຳມະນູນໃໝ່, ໂດຍຄະນະກຳມະການຮຽບຮຽງລັດຖະທຳມະນູນ (CDC) ໄທ ປະກາດໃນວັນທີ 29/3 ຜ່ານມາ, ໄດ້ຮັບຄວາມຫວັງຈະເປັນມາດຕະການແກ້ໄຂ ໃຫ້ວິກິດການດ້ານການເມືອງ ທີ່ແກ່ຍາວມາເປັນເວລາໜຶ່ງທົດສະວັດ ຢູ່ໄທ. ຮ່າງລັດຖະທຳມະນູນສະບັບນີ້ມີຄວາມໜາ 105 ໜ້າ ດ້ວຍ 279 ຂໍ້ມາດຕາ ຈະຖືກຍົກອອກມາລົງປະຊາມະຕິ ໃນວັນທີ 7/8 ຈະມາເຖິງ. ຖ້າວ່າຮ່າງລັດຖະທຳມະນູນດັ່ງກ່າວ ໄດ້ຮັບການຮັບຮອງເອົາ ໃນການລົງປະຊາມະຕິ, ການເລືອກຕັ້ງທົ່ວປະເທດ ຈະໄດ້ຮັບການຈັດຕັ້ງຂື້ນ ໃນເດືອນ 7/2017 ຄື ທ່ານນາຍົກລັດຖະມົນຕີ ປາຢຸດ ໄດ້ໃຫ້ຄຳໝັ້ນສັນຍາ.