ທ່ານ ຫວູດຶກດາມ ພົບປະກັບ ທ່ານ Henry Van Thio
(ພາບ: VGP)
(vovworld)- ໃນວັນທີ 31/7, ຢູ່ Yangon, ມຽນມາ, ທ່ານ ຫວູດຶກດາມ ຮອງນາຍົກລັດຖະມົນຕີຫວຽດນາມ ໄດ້ມີການພົບປະກັບ ທ່ານ Henry Van Thio ຮອງປະທານາທິບໍດີມຽນມາ ຢ່າງເປັນທາງການ, ເນື່ອງໃນໂອກາດເຂົ້າຮ່ວມເວທີປາໄສ “4 ປະເທດ - ຈຸດນັດພົບດຽວ”. ທ່ານ ຫວູດຶກດາມ ຮອງນາຍົກລັດຖະມົນຕີ ຢືນຢັນວ່າ: ຫວຽດນາມຕີລາຄາສູງການພົວພັນຮ່ວມມືມິດຕະພາບທີເປັນມູນເຊື້ອ ລະຫວ່າງ ຫວຽດນາມ ແລະ ມຽນມາ ໃນຫຼາຍກວ່າ 40 ປີຜ່ານມາ ແລະ ຈະຮ່ວມກັນມານະພະຍາຍາມ ນຳເອົາການພົວພັນສອງປະເທດ ໃຫ້ພັດທະນາຢ່າງເຂັ້ມແຂງ, ເຂົ້າສູ່ລວງເລິກ ໃນໄລຍະຈະມາເຖິງ. ທ່ານ ຫວູດຶກດາມ ຮອງນາຍົກລັດຖະມົນຕີ ສະເໜີ ມຽນມາສືບຕໍ່ສ້າງເງື່ອນໄຂ, ສະໜັບສະໜູນວິສາຫະກິດຫວຽດນາມ ລົງທຶນ, ດຳເນີນທຸລະກິດ ຢູ່ ມຽນມາ, ເປັນຕົ້ນແມ່ນໃນບັນດາຂົງເຂດທະນາຄານ, ການບິນ, ໂທລະຄົມ, ຊັບພະຍາກອນໂລຫະ, ການທ່ອງທ່ຽວ ແລະ ກະສິກຳ; ສະແດງຄວາມພ້ອມແລ້ວທີ່ຈະແບ່ງປັນບົດຮຽນ ກັບມຽນມາ ໃນບັນດາຂົງເຂດທີ່ຫວຽດນາມ ມີທ່າແຮງບົ່ມຊ້ອນ ເຊັ່ນ: ປູກ ແລະ ປຸງແຕ່ງຢາງພາລາ, ກາເຟ, ພິກໄທ ສົ່ງອອກ. ທ່ານ Henry Van Thio ຮອງປະທານາທິບໍດີມຽນມາ ເຊື່ອໝັ້ນວ່າ: ການພົວພັນມິດຕະພາບຍາວນານ ຫວຽດນາມ-ມຽນມາຈະພັດທະນາຢ່າງໄວວາ ແລະ ນັບມື້ນັບເປີດກວ້າງໃນທຸກຂົງເຂດ.
ສອງຝ່າຍເຫັນດີເປັນເອກະພາບ ເພີ່ມທະວີການຮ່ວມມື ໃນບັນດາຂົງເຂດນັບແຕ່ດ້ານການເມືອງ, ການປ້ອງກັນຊາດ, ປ້ອງກັນຄວາມສະຫງົບ, ການຄ້າ, ການລົງທຶນ, ກະສິກຳ, ການຄົມມະນາຄົມຂົນສົ່ງ, ການທ່ອງທ່ຽວ, ທະນາຄານ, ໂທລະຄົມ…; ໃນນັ້ນມີເລື່ອງຍູ້ແຮງການແລກປ່ຽນຄະນະຜູ້ແທນຂັ້ນສູງ ແລະ ທຸກຂັ້ນ ແລະ ການພົບປະແລກປ່ຽນປະຊາຊົນ. ສອງຝ່າຍກໍ່ໄດ້ແລກປ່ຽນຄວາມຄິດຄວາມເຫັນ ກ່ຽວກັບບັນດາບັນດາພາກພື້ນ ແລະ ສາກົນ ທີ່ມີຄວາມສົນໃຈຮ່ວມກັນ; ເຫັນດີເປັນເອກະພາບສືບຕໍ່ສົມທົບກັນຢ່າງແໜ້ນແຟ້ນ ໃນຂອບເຂດອາຊຽນ ແລະ ຢູ່ບັນດາເວທີປາໄສພາກພື້ນ ແລະ ສາກົນ, ຍົກສູງຄວາມສາມັກຄີໃນອາຊຽນ, ຮັກສາບົດບາດສູນກາງຂອງອາຊຽນ, ຮັບປະກັນສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ.
ເນື່ອງໃນໂອກາດນີ້, ທ່ານ ຫວູດຶກດາມ ຮອງນາຍົກລັດຖະທົນຕີ ພ້ອມດ້ວຍ ທ່ານ Henry Van Thio ຮອງປະທານາທິບໍດີມຽນມາ ໄດ້ເຂົ້າຮ່ວມພິທີເປີດສະຫຼອງສາຂາທະນາຄານລົງທຶນ ແລະ ພັດທະນາຫວຽດນາມ (BIDV) ແລະ ພິທີເປີດສະຫຼອງ ໂຮງແຮມ Melia-Hoang Anh Gia Lai ຢູ່ ນະຄອນຫຼວງ Yangon. ທ່ານ ຫວູດຶກດາມ ຮອງນາຍົກລັດຖະທົນຕີ ກໍ່ໄດ້ໃຫ້ການຕ້ອນຮັບ ບັນດາວິສາຫະກິດໃຫຍ່ ຂອງຫວຽດນາມ ທີ່ພວມເຄື່ອນໄຫວດຳເນີນທຸລະກິດ ຢູ່ ມຽນມາ.