ທ່ານເລຂາທິການໃຫຍ່ຫງວຽນຟູ໋ຈ້ອງເດີນທາງເຖິງປັກກິ່ງເລີ່ມຕົ້ນການຢ້ຽມຢາມສປຈີນຢ່າງເປັນທາງການ

ວັນພະຫັດ ທີ 12 ມັງກອນ ຄ.ສ. 2017 | 17:38:23

(ທ່ານເລຂາທິການໃຫຍ່ຫວຽນຟູ໋ຈ້ອງ ແລະ
ຄະນະຜູ້ແທນຂັ້ນສູງຫວຽດນາມ ໄດ້ໄປເຖິງນະຄອນຫຼວງປັກກິ່ງ)

(vovworld) – ຕອນທ່ຽງວັນທີ 12/1 ທ່ານເລຂາທິການໃຫຍ່ຄະນະບໍລິຫານງານສູນກາງພັກຄອມມູນິດຫວຽດນາມ ຫວຽນຟູ໋ຈ້ອງ ແລະ ຄະນະຜູ້ແທນຂັ້ນສູງຫວຽດນາມ ໄດ້ໄປເຖິງນະຄອນຫຼວງປັກກິ່ງ, ເລີ່ມຕົ້ນການຢ້ຽມຢາມສປຈີນຢ່າງເປັນທາງການ ຕາມຄຳເຊີນຂອງທ່ານ ເລຂາທິການໃຫຍ່ຄະນະບໍລິຫານງານສູນກາງພັກຄອມມູນິດຈີນ, ປະທານປະເທດ ສປຈີນ ສີຈີ້ນຜິງ . ຕ້ອນຮັບທ່ານ ເລຂາທິການໃຫຍ່ ຫວຽນຟູ໋ຈ້ອງ ແລະ ຄະນະຜູ້ແທນຂັ້ນສູງຫວຽດນາມ ຢູ່ສະໜາມບິນປັກກິ່ງ ມີທ່ານ ຊຸງເທົາ, ຫົວໜ້າຄະນະຕິດຕໍ່ພົວພັນຕ່າງປະເທດສູນກາງຈີນ, ເອກອັກຄະລັດຖະທູດ ຈີນ ປະຈຳຫວຽດນາມ ຄຸງແຊວຢູງ, ທ່ານ ເອກອັກຄະລັດຖະທູດຫວຽດນາມປະຈຳຈີນ ດັ້ງມິງຄອຍ ພ້ອມກັບພະນັກງານ, ປະຊາຊົນຊາວຫວຽດນາມທີ່ພວມດຳລົງຊີວິດ, ປະຕິບັດງານ, ຮ່ຳຮຽນຢູ່ຈີນເປັນຈໍານວນຫຼວງຫຼາຍ. ການຢ້ຽມຢາມໄດ້ດຳເນີນກົງກັບ 2 ປະເທດພວມກະກຽມສະເຫຼີມສະຫຼອງ 67 ປີ ແຫ່ງການສ້າງຕັ້ງການພົວພັນທາງການທູດຫວຽດນາມ-ຈີນ, ປະຊາຊົນ 2 ປະເທດພວມກະກຽມຕ້ອນຮັບບຸນປີໃໝ່ປະຈຳຊາດ, ການຢ້ຽມຢາມຢ່າງເປັນທາງການໃນຄັ້ງນີ້ຂອງ ທ່ານເລຂາທິການໃຫຍ່ ຫວຽນຟູ໋ຈ້ອງ ມີຄວາມໝາຍສຳຄັນ, ກຳນົດທິດພັດທະນາຢ່າງປອດໃສ, ຍາວນານໃຫ້ການພົວພັນຫວຽດນາມ-ຈີນ.

ພິທີຕ້ອນຮັບທ່ານເລຂາທິການໃຫຍ່ ຫງວຽນຟູຈ້ອງ ແລະ ຄະນະຜູ້ແທນຂັ້ນສູງຫວຽດນາມ ໄດ້ຈັດຂຶ້ນຢ່າງສົມກຽດຢູ່ຫໍສະພາປະຊາຊົນຈີນ ຕາມພິທີການສູງສຸດສະຫງວນໃຫ້ແກ່ປະມຸກລັດ. ທ່ານປະທານປະເທດຈີນ ສີຈິ້ນຜິງ ເປັນເຈົ້າພາບພິທີຕ້ອນຮັບ. ພາຍຫລັງພິທີຕ້ອນຮັບທ່ານເລຂາທິການໃຫຍ່, ປະທານປະເທດຈີນ ສີຈີ້ນຜິງນຳຫນ້າຄະນະຜູ້ແທນຂັ້ນສູງຈີນ ແລະ ທ່ານເລຂາທິການໃຫຍ່ ຫງວຽນຟູຈ້ອງນຳຫນ້າຄະນະຜູ້ແທນຂັ້ນສູງ ຫວຽດນາມ ໄດ້ດຳເນີນການເຈລະຈາຂັ້ນສູງ.

ຕອນບ່າຍວັນດຽວກັນ, ພາຍຫລັງສິ້ນສຸດການເຈລະຈາ, ທ່ານເລຂາທິການໃຫຍ່ ຫງວຽນຟູຈ້ອງ ແລະ ທ່ານເລຂາທິການໃຫຍ່, ປະທານປະເທດຈີນ ສີຈີ້ນຜິງ ໄດ້ເປັນສັກຂີພີຍານພິທີລົງນາມໃນເອກະສານຮ່ວມມື 15 ສະບັບລະຫວ່າງ ຫວຽດນາມ ແລະ ຈີນ. ໃນນັ້ນມີ ຂໍ້ຕົກລົງຮ່ວມມືບຳລຸງສ້າງພະນັກງານຂັ້ນສູງລະຫວ່າງສອງພັກ, ບົດບັນທຶກຊ່ວຍຈຳການຮ່ວມມືລະຫວ່າງຄະນະເສດຖະກິດສູນກາງກັບສູນຄົ້ນຄ້ວາພັດທະນາລັດຖະບານຈີນ, ວິໄສທັດຮ່ວມກ່ຽວກັບການຮ່ວມມືປ້ອງກັນປະເທດລະຫວ່າງກະຊວງປ້ອງກັນປະເທດຫວຽດນາມ ແລະ ກະຊວງປ້ອງກັນປະເທດຈີນຮອດປີ 2025, ສັນຍາແມ່ການຮ່ວມມືດ່ານຊາຍແດນທາງບົກລະຫວ່າງກະຊວງປ້ອງກັນປະເທດຫວຽດນາມ ແລະ ກົມໃຫຍ່ພາສີຈີນ, ບົດບັນທຶກຊ່ວຍຈຳກ່ຽວກັບແຜນການຮ່ວມມືໄລຍະ 2017-2021 ລະຫວ່າງສະຫະພັນບັນດາອົງການຈັດຕັ້ງມິດຕະພາບຫວຽດນາມ ແລະ ສະມາຄົມມິດຕະພາບການຕ່າງປະເທດປະຊາຊົນຈີນ, ຂໍ້ຕົກລົງການຮ່ວມມືລະຫວ່າງວິທະຍຸກະຈາຍສຽງຫວຽດນາມ ແລະ ວິທະຍຸກະຈາຍສຽງສາກົນຈີນ.