(vovworld) – ຕອນບ່າຍວັນທີ 30/07, ຢູ່ນະຄອນຫຼວງວຽງຈັນ, ທ່ານນາຍົກລັດຖະມົນຕີລາວ ທອງສິງ ທຳມະວົງ ແລະ ທ່ານນາງປະທານສະພາແຫ່ງຊາດລາວ ປານີ ຢາທໍ່ຕູ້ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງກະຊວງຍຸຕິທຳຫວຽດນາມ ໂດຍທ່ານ ຮ່າຮຸ່ງເກື່ອງ, ລັດຖະມົນຕີກະຊວງຍຸຕິທຳ ເປັນຫົວໜ້າຄະນະ. ໃນຂອບເຂດການຢ້ຽມຢາມ ແລະ ເຮັດວຽກຢູ່ລາວ ແຕ່ວັນທີ 27 – 31/07, ທ່ານລັດຖະມົນຕີ ຮ່າຮຸ່ງເກື່ອງ ໄດ້ແຈ້ງໃຫ້ຊາບບາງຈຸດພົ້ນເດັ່ນຂອງເສດຖະກິດສັງຄົມຫວຽດນາມ ແລະ ໝາກຜົນການເຈລະຈາກັບກະຊວງຍຸຕິທຳລາວ ແລະ ກອງປະຊຸມຍຸຕິທຳບັນດາແຂວງເຂດຊາຍແດນຫວຽດນາມ - ລາວຄັ້ງທີ 2; ຢືນຢັນ 2 ຝ່າຍຈະເພີ່ມທະວີການຮ່ວມມື, ສ້າງເງື່ອນໄຂສະດວກທີ່ສຸດໃຫ້ປະຊາຊົນຢູ່ລຽບຕາມເສັ້ນຊາຍແດນ 2 ປະເທດມີຊີວິດເປັນປົກກະຕິ, ມີຄວາມສົມບຸນພູນສຸກ, ຕັດສິນໃຈພ້ອມກັນກໍ່ສ້າງເສັ້ນຊາຍແດນຫວຽດນາມ - ລາວ ເປັນເສັ້ນຊາຍແດນແຫ່ງສັນຕິພາບ ແລະ ພັດທະນາ. ທ່ານລັດຖະມົນຕີ ຮ່າຮຸ່ງເກື່ອງ ເຊື່ອໝັ້ນວ່າ ສະພາແຫ່ງຊາດລາວ ຈະບັນລຸຜົນສຳເລັດໃນບົດບາດເປັນປະທານກອງປະຊຸມໃຫຍ່ລັດຖະສະພາລະຫວ່າງຊາດອາຊຽນ (AIPA) ຄັ້ງທີ 35, ເຊິ່ງຈະຈັດຂຶ້ນໃນເດືອນ 09/2014.
ບັນດາການນຳລາວ ຢືນຢັນວ່າ ພັກ, ລັດ ແລະ ປະຊາຊົນລາວ ຈະເຮັດຈົນສຸດຄວາມສາມາດຂອງຕົນ ພ້ອມກັບພັກ, ລັດ ແລະ ປະຊາຊົນຫວຽດນາມ ຮັກສາ, ເພີ່ມພູນຄູນສ້າງໃຫ້ສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງລາວ - ຫວຽດນາມ ຂຽວສົດງົດງາມ ແລະ ໝັ້ນຄົງຂະໜົງແກ່ນໄປຊົ່ວກາລະນານ.