ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງ ແລະ ທ່ານນາຍົກລັດຖະມົນຕີ ມາເລເຊຍ Dato Sri Mohd Najib Tun Razak
(ພາບ: http://baodientu.chinhphu.vn/)
|
(vovworld)- ຕອນເຊົ້າວັນທີ 4/4, ພິທີຕ້ອນຮັບທ່ານນາຍົກລັດຖະມົນຕີ ມາເລເຊຍ Dato Sri Mohd Najib Tun Razak ໄດ້ຖືກຈັດຂຶ້ນຢ່າງສົມກຽດຢູ່ສຳນັກງານປະທານປະເທດຫວຽດນາມ. ພາຍຫຼັງພິທິຕ້ອນຮັບ, ທ່ານນາຍົກ ລັດຖະມົນຕີຫວຽດນາມ ຫງວຽນເຕີ້ນຢຸງ ແລະ ທ່ານນາຍົກລັດຖະມົນຕີ ມາເລເຊຍ Dato Sri Mohd Najib Tun Razak ໄດ້ດຳເນີນການເຈລະຈາ.
ທີ່ການເຈລະຈາ, ທ່ານນາຍົກລັດຖະມົນຕີຫວຽດນາມ ຫງວຽນເຕີ້ນຢຸງໄດ້ຕີລາຄາສູງເລື່ອງ ມາເລເຊຍແມ່ນໜຶ່ງໃນບັນດາຄູ່ຮ່ວມມືດ້ານການຄ້າ ແລະ ນັກລົງທຶນອັນດັບໜຶ່ງຂອງຫວຽດນາມ. ການນຳ 2 ປະເທດໄດ້ເຫັນດີເປັນເອກສັນສູ້ຊົນຍົກວົງເງິນການຄ້າ 2 ສົ້ນໃຫ້ຂຶ້ນເຖິງ 11 ຕື້ USD ກ່ອນປີ 2015; ສົ່ງເສີມ ແລະ ສ້າງເງື່ອນໄຂໃຫ້ແກ່ບັນດາວິສາຫະກິດ 2 ປະເທດເພີ່ມທະວີການຄ້າ, ການລົງທຶນຊຶ່ງກັນ ແລະ ກັນ. ທ່ານນາຍົກລັດຖະມົນຕີຂອງ 2 ປະເທດໄດ້ເຫັນດີເປັນເອກສັນກັນດຳເນີນການລົງນາມໃນບົດບັນທຶກຄວາມເຂົ້າໃຈ MOU ສະເພາະການຄ້າຂາຍເຂົ້າສານ; ພ້ອມທັງສືບຕໍ່ຊຸກຍູ້ການຮ່ວມມືໃນບັນດາຂົງເຂດຄືແຮງງານ, ກະສີກຳ, ນ້ຳມັນອາຍແກັສ, ການສຶກສາ, ກົດໝາຍ, ຍຸຕິທຳ...
ໃນຂອບເຂດການຢ້ຽມຢາມຫວຽດນາມຢ່າງເປັນທາງການຂອງ ທ່ານນາຍົກ ລັດຖະມົນຕີ ມາເລເຊຍ Dato Sri Mohd Najib Tun Razak, 2 ປະເທດຫວຽດນາມ ແລະ ມາເລເຊຍໄດ້ອອກຖະແຫຼງການຮ່ວມ.
ກ່ຽວກັບການພົວພັນລະຫວ່າງຫວຽດນາມ ແລະ ມາເລເຊຍ, ຖະແຫຼງການຮ່ວມໄດ້ຢືນຢັນວ່າ 2 ຝ່າຍ ຕົກລົງກັນສືບຕໍ່ເພີ່ມທະວີການແລກປ່ຽນບັນດາຄະນະຜູ້ແທນຂັ້ນສູງ ແລະ ຂັ້ນຕ່າງໆໄປມາຢ້ຽມຢາມກັນ, ຍູ້ແຮງການຮ່ວມມືໃນບັນດາຂົງເຂດ ແລະ ພົວພັນແລກປ່ຽນປະຊາຊົນ; ດຳເນີນກອງປະຊຸມຄັ້ງທີ 5 ຄະນະກຳມາທິການປະສົມ ຫວຽດນາມ - ມາເລເຊຍ ກ່ຽວກັບການຮ່ວມມືດ້ານເສດຖະກິດ, ວິທະຍາສາດ ແລະ ເຕັກນິກແນໃສ່ສືບຕໍ່ຊຸກຍູ້ ແລະ ເປີດກ້ວາງການພົວພັນຮ່ວມມືລະຫວ່າງ 2 ປະເທດໃນຂົງເຂດນີ້.
ຫວຽດນາມ ແລະ ມາເລເຊຍໄດ້ເຫັນດີເປັນເອກະສັນເພີ່ມທະວີການຮ່ວມມືຫຼາຍກ່ວາອີກໃນຂົງເຂດປ້ອງກັນຊາດປ້ອງກັນຄວາມສະຫງົບ, ເຫັນດີນຳກັນຍູ້ໄວການລົງນາມໃນບົດບັນທຶກຄວາມເຂົ້າໃຈກ່ຽວກັບການປ້ອງກັນ ແລະ ຕ້ານອາດຊະຍາກຳຂ້າມຊາດ. 2 ຝ່າຍຢືນຢັນສືບຕໍ່ສ້າງເງື່ອນໄຂສະດວກໃຫ້ແກ່ບັນດານັກລົງທຶນ 2 ປະເທດ ຊອກຫາກາລະໂອກາດລົງທຶນ ແລະ ດຳເນີນທຸລະກິດຢູ່ແຕ່ລະປະເທດ...
ກ່ຽວກັບບັນຫາພາກພື້ນ ແລະ ສາກົນ, ຫວຽດນາມ ແລະ ມາເລເຊຍ ໄດ້ເຫັນດີເປັນເອກະສັນເພີ່ມທະວີການຮ່ວມມືລະຫວ່າງ 2 ປະເທດໃນບັນດາເວທີປາໄສພາກພື້ນ ແລະ ສາກົນ, ພ້ອມກັນສົມທົບກັບປະເທດອື່ນໆໃນກຸ່ມອາຊຽນ ກໍ່ສ້າງປະຊາຄົມອາຊຽນໃຫ້ໝັ້ນຄົງ, ເຂັ້ມແຂງ ແລະ ສາມັກຄີໃນປີ 2015. ຫວຽດນາມ ແລະ ມາເລເຊຍຢືນຢັນຄືນເຖິງຄວາມສຳຄັນຂອງການເຊີດຊູຄວາມເປັນເອກະພາບ ແລະ ບົດບາດໃຈກາງຂອງອາຊຽນໃນການຮັກສາສັນຕິພາບ, ສະຖຽນລະພາບ ແລະ ຄວາມເສລີໃນການເດີນທະເລ ແລະ ທາງອາກາດຢູ່ເຂດທະເລຕາເວັນອອກ. ຫວຽດນາມ ແລະ ມາເລເຊຍຮຽກຮ້ອງໃຫ້ບັນດາຝ່າຍທີ່ກ່ຽວຂ້ອງຈົ່ງແກ້ໄຂການພິພາດກັນຜ່ານມາດຕະການໂດຍສັນຕິວິທີ, ສອດຄ່ອງກັບຫຼັກການທີ່ໄດ້ຮັບການຮອງຮັບຂອງກົດໝາຍສາກົນ, ຫຼີກລ່ຽງການນຳໃຊ້ກຳລັງອາວຸດຫຼືນາບຂູ່ນຳໃຊ້ກຳລັງອາວຸດ ແລະ ລະງັບໃຈໃນການກະທຳ.
ກ່ຽວກັບສັນຍາຄູ່ຮ່ວມມືຂ້າມປາຊີຟິກ TPP , ຫວຽດນາມ ແລະ ມາເລເຊຍ ໄດ້ເຫັນດີເປັນເອກະສັນເພີ່ມທະວີການຮ່ວມມືຊຸກຍູ້ໃຫ້ການເຈລະຈາສຳເລັດໂດຍໄວ ແລະ ຮັບປະກັນການສະຫງວນຄວາມພິບໄຫວ, ເວລາຫັນປ່ຽນທີ່ເໝາະສົມ, ໜູນຊ່ວຍດ້ານເຕັກນິກ ແລະ ຍົກສູງຄວາມສາມາດປະຕິບັດໃຫ້ບັນດາປະເທດພວມພັດທະນາ.
ແລະກໍໃນ ຕອນບ່າຍວັນທີ 4/4, ຢູ່ຮ່າໂນ້ຍ, ທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ້ຈ້ອງ, ທ່ານປະທານປະເທດຫວຽດນາມ ເຈືອງເຕີ້ນຊາງກໍໄດ້ໃຫ້ການຕ້ອນຮັບທ່ານນາຍົກລັດຖະມົນຕີ ມາເລເຊຍ Dato Sri Mohd Najib Tun Razak ຢ່າງສະໜິດສະໜົມ.