ການຕ້ອນຮັບທ່ານນາຍົກລັດຖະມົນຕີ ຫງວຽນຊວນຟຸກ ທີ່ສະໜາມບິນ
|
(vovworld) -ຕອນບ່າຍວັນທີ 28/4 (ຕາມເວລາ ຫວຽດນາມ), ທ່ານນາຍົກລັດຖະມົນຕີ ຫງວຽນຊວນຟຸກ ແລະ ພັນລະຍາ ພ້ອມກັບຄະນະຜູ້ແທນ ຫວຽດນາມ ເຂົ້າຮ່ວມກອງປະຊຸມສຸດຍອດ ອາຊຽນ ຄັ້ງທີ 30 ແລະ ບັນດາກອງປະຊຸມສຸດຍອດກ່ຽວຂ້ອງ ໄດ້ໄປຮອດສະໜາມບິນສາກົນ Ninoy Aquino, ນະຄອນຫຼວງ ມານີລາ, ຕາມຄຳເຊື້ອເຊີນຂອງທ່ານປະທານາທິບໍດີ ສ. ຟີລິບປິນ Rodrigo Roa Duterte. ການຢ້ຽມຢາມດຳເນີນໃນວັນທີ 28 -29/4/2017.
ອອກຕ້ອນຮັບທ່ານນາຍົກລັດຖະມົນຕີ ຫງວຽນຊວນຟຸກ, ພັນລະຍາ ແລະ ຄະນະຜູ້ແທນ ຫວຽດນາມ ຢູ່ສະໜາມບິນສາກົນ Ninoy Aquino, ມີລັດຖະມົນຕີຄະນະລັດຖະບານ, ທີ່ປຶກສາການປ້ອງກັນຄວາມສະຫງົບແຫ່ງຊາດ ຟີລິບປິນ Hermoenes C.Esperon Jr, ທ່ານເອກອັກຄະລັດຖະທູດ ຫວຽດນາມ ປະຈຳ ຟີລິບປິນ ຫຼີກວກຕ໋ວນ, ທ່ານຮອງລັດຖະມົນຕີການຕ່າງເປັນປະເທດ ຫວຽດນາມ ຫງວຽນກວກຢູ້ງ ພ້ອມກັບພະນັກງານສະຖານທູດ ຫວຽດນາມ ປະຈຳ ຟີລິບປິນ.
ກອງປະຊຸມປີນີ້ ມີຫົວຂໍ້ວ່າ: “ຮ່ວມແຮງຮ່ວມໃຈປ່ຽນແປງ, ເຊື່ອມຈອດທົ່ວໂລກ”. ນີ້ແມ່ນກອງປະຊຸມທຳອິດໃນປີປະທານ ອາຊຽນ 2017 ຂອງ ຟີລິບປິນ.
ຕາມແຜນການແລ້ວ, ທ່ານນາຍົກລັດຖະມົນຕີ ຫງວຽນຊວນຟຸກ ຈະເຂົ້າຮ່ວມວາລະໄຂກອງປະຊຸມຄົບຄະນະ ແລະ ວາລະອັດກອງປະຊຸມສຸດຍອດ ອາຊຽນ ຄັ້ງທີ 30, ເຂົ້າຮ່ວມກອງປະຊຸມລະຫວ່າງບັນດາການນຳ ອາຊຽນ ກັບຜູ້ຕາງໜ້າຂອງສະມັດຊາລັດຖະສະພາລະຫວ່າງຊາດ ອາຊຽນ (AIPA), ເຂົ້າຮ່ວມກອງປະຊຸມລະຫວ່າງບັນດາການນຳ ອາຊຽນ ກັບບັນດາຜູ້ຕາງໜ້າຊາວໜຸ່ມ ອາຊຽນ, ພົບປະ 2 ຝ່າຍກັບບັນດາການນຳບາງປະເທດ ອາຊຽນ ແລະ ການເຄື່ອນໄຫວອື່ນໆອີກ.