(vovworld) - ຕອນເຊົ້າວັນທີ 05/12, ຢູ່ຮ່າໂນ້ຍ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ເຂົ້າຮ່ວມເວທີປາໄສວິສາຫະກິດ (VBF). ເວທີປາໄສປີນີ້ມີຫົວຂໍ້ວ່າ “ຍົກສູງບົດບາດທີ່ຕັ້ງເຂດເສດຖະກິດພາກເອກະຊົນ”.
ກ່າວຄຳເຫັນທີ່ເວທີປາໄສ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ຍົກອອກ 7 ບັນຫາເຊິ່ງບັນດານັກລົງທຶນຍົກອອກມາ ແລະ ປຶກສາຫາລື. ນັ້ນແມ່ນເພີ່ມທະວີກຳລັງຄວາມສາມາດໃຫ້ບັນດາວິສາຫະກິດຂະໜາດນ້ອຍ ແລະ ກາງ; ຊຸກຍູ້ອຸດສາຫະກຳສຳຮອງ; ພັດທະນາຕະຫຼາດທຶນ; ພະລັງງານສະອາດ ແລະ ພະລັງງານຜະລິດຄືນໃໝ່… ທ່ານນາຍົກລັດຖະມົນຕີ ຢືນຢັນວ່າ, ຫວຽດນາມ ໃຫ້ຄຳໝັ້ນສັນຍາສືບຕໍ່ປັບປຸງລະບອບເສດຖະກິດການຕະຫຼາດ, ນະໂຍບາຍກົດໝາຍ, ປະຕິຮູບດ້ານການບໍລິການ, ສ້າງສະພາບແວດລ້ອມແຫ່ງການລົງທຶນ ດຳເນີນທຸລະກິດຢ່າງສະດວກ… ທ່ານນາຍົກລັດຖະມົນຕີ ຫງວຽນຊວນຟຸກ ຮຽກຮ້ອງໃຫ້ປະຊາຄົມວິສາຫະກິດຫວຽດນາມ ເປັນເຈົ້າການ, ຕັ້ງໜ້າເຂົ້າຮ່ວມວິວັດການສ້າງໂຄງປະກອບພື້ນຖານເສດຖະກິດຢ່າງເລິກເຊິ່ງກວ່າ ຜ່ານການຫັນບັນດາການເຄື່ອນໄຫວລົງທຶນເປັນຫຼາຍຮູບຫຼາຍແບບ, ໃນນັ້ນເອົາໃຈໃສ່ເຖິງຮູບການຮ່ວມມືພາກລັດ - ເອກະຊົນ (PPP). ສຳລັບປະຊາຄົມວິສາຫະກິດຕ່າງປະເທດ. ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ.
“ສຳລັບຝ່າຍວິສາຫະກິດລົງທຶນຕ່າງປະເທດ FDI, ລັດຖະບານປາດຖະໜາໃຫ້ມີການຢືດໝັ້ນການຮ່ວມມືລົງທຶນ, ມີຄວາມເຊື່ອໝັ້ນຕໍ່ບັນດາການປະຕິຮູບຂອງຫວຽດນາມ, ຍູ້ແຮງການມອບສົ່ງເຕັກໂນໂລຊີທີ່ກ້າວໜ້າ, ບຳລຸງສ້າງແຫຼ່ງຊັບພະຍາກອນມະນຸດ, ແບ່ງປັນບົດຮຽນໃນການຄຸ້ມຄອງ, ມີຄວາມຮັບຜິດຊອບຕໍ່ສັງຄົມ, ຮ່ວມແຮງຮ່ວມໃຈພ້ອມກັບຫວຽດນາມ ປົກປັກຮັກສາຊັບພະຍາກອນທຳມະຊາດ, ລັກສະນະໝັ້ນຄົງຂອງສິ່ງແວດລ້ອມ ແລະ ຄວາມປອດໂປ່ງຂອງສະພາບແວດລ້ອມແຫ່ງການດຳລົງຊີວິດໃຫ້ແກ່ຫວຽດນາມ. ພວກເພື່ອນຈົ່ງມາຫວຽດນາມ ດ້ວຍເຕັກໂນໂລຊີທີ່ທັນສະໄໝ, ການຄຸ້ມຄອງກ້າວໜ້າ ແລະ ຫົວໃຈ, ໝາຍຄວາມວ່າຍົກສູງມາດຕະຖານ, ຄຸນສົມບັດໃນການດຳເນີນທຸລະກິດ ແລະ ວັດທະນະທຳວິສາຫະກິດ”.
ສິ້ນສຸດບົດກ່າວປາໄສ, ທ່ານນາຍົກລັດຖະມົນຕີ ຫງວຽນຊວນຟຸກ ເນັ້ນໜັກວ່າ, ລັດຖະບານຫວຽດນາມ ຈະມານະພະຍາຍາມເຄື່ອນໄຫວ ເພື່ອໃຫ້ປະຊາຄົມວິສາຫະກິດຫວຽດນາມ ສາມາດຕິດພັນນຳກັນພ້ອມກັນຮ່ວມມື, ເຕີບໃຫຍ່, ເຂັ້ມແຂງຢູ່ພາຍໃນປະເທດ, ໃນພື້ນຖານເສດຖະກິດແຫ່ງຊາດຫວຽດນາມ ແລະ ອອກສູ່ໂລກໃຫ້ສຳເລັດຜົນ.