ນາໂຕປະກາດທິດທາງໃໝ່ກ່ອນທີ່ຈັດກອງປະຊຸມສຸດຍອດ
ພາບປະກອບ(vovworld) – ວັນທີ 1/9, ທ່ານເລຂາທິການໃຫຍ່ອົງການ ນາໂຕ Anders Fogh Rasmussen ປະກາດວ່າ: ນາໂຕ ຈະປະຕິບັດບົດບັນທຶກຮ່ວມມືກັບ ລັດເຊຍ ແຕ່ຈະສ້າງແຜນການເຄື່ອນໄຫວເພື່ອກຽມພ້ອມປົກປ້ອງບັນດາປະເທດສະມາຊິກຕໍ່ໜ້າໄພນາບຂູ່ຈາກປະເທດ ເອີລົບຕາເວັນອອກນີ້. ກ່າວຄຳເຫັນທີ່ການປະຊຸມຂ່າວຢູ່ນະຄອນຫຼວງ ບຣຸກແຊນ, ປະເທດ ແບນຊິກ, ທ່ານ Rasmussen ໃຫ້ຮູ້ວ່າ: ທີ່ກອງປະຊຸມສຸດຍອດຈະມາເຖິງ, ການນຳ ນາໂຕ ຈະຮັບຮອງເອົາເລື່ອງສ້າງຕັ້ງ “ແຜນການເຄື່ອນໄຫວກຽມພ້ອມ” ນີ້ເພື່ອແນ່ໃສ່ຜັນຂະຫຍາຍກຳລັງ ແລະ ອຸປະກອນທີ່ເໝາະສົມຢູ່ສະຖານທີ່ຕ່າງໆໃນໄລຍະເວລາເໝາະສົມ. ທ່ານເນັ້ນໜັກວ່າ: ນາໂຕ ບໍ່ຢາກບຸກໂຈມຕີບໍ່ວ່າປະເທດໃດ ແຕ່ບັນດາໄພນາບຂູ່ນັບມື້ນັບປະກົດອອກຢ່າງຈະແຈ້ງ ເຮັດໃຫ້ ນາໂຕ ຕ້ອງເຄື່ອນໄຫວເພື່ອປົກປ້ອງບັນດາປະເທດສະມາຊິກຂອງຕົນ. ກຳລັງໃໝ່ຈະລວມມີພົນທະຫານນັບພັນຄົນ ທີ່ບັນດາປະເທດສະມາຊິກປະກອບສ່ວນຕາມກົນໄກພັດປ່ຽນກັນ, ໂດຍກອງທັບອາກາດ ແລະ ກອງທັບເຮືອຊ່ວຍໜູນ. ນີ້ຈະແມ່ນກຳລັງປາຍແຫຼມເພື່ອໃຫ້ ນາໂຕອາດສາມາດຜັນຂະຫຍາຍໃນຮອບເວລາແຕ່ 2 ຫາ 3 ວັນຢູ່ບໍ່ວ່າສະຖານທີ່ໃດໃນຜືນແຜ່ນດິນຂອງບັນດາປະເທດພັນທະມິດຖືກນາບຂູ່.