(ທ່ານປະທານປະເທດເຈີນດ້າຍກວາງ
ເຈລະຈາກັບປະທານາທິບໍດີ Tony Tan Keng Yam)
(vovworld)- ຕອນເຊົ້າວັນທີ 29/8, ພາຍຫລັງພິທີຕ້ອນຮັບທ່ານປະທານປະເທດເຈີນດ້າຍກວາງ ແລະ ພັນລະຍາ, ທ່ານປະທານປະເທດເຈີນດ້າຍກວາງ ໄດ້ເຈລະຈາກັບປະທານາທິບໍດີ Tony Tan Keng Yam. ທີ່ການເຈລະຈາ, ປະທານາທິບໍດີ ສິງກະໂປ ສະແດງຄວາມເຊື່ອໝັ້ນວ່າ ການຢ້ຽມຢາມຈະປະສົບຜົນສຳເລັດຢ່າງຈົບງາມ, ປະກອບສ່ວນສຳຄັນ ນຳການພົວພັນຄູ່ຮ່ວມມືຍຸດທະສາດລະຫວ່າງສິງກະໂປ ແລະ ຫວຽດນາມ ພັດທະນາຂຶ້ນສູ່ລະດັບສູງໃຫມ່. ປະທານາທິບໍດີ Tony Tan Keng Yam ຢືນຢັນ: ວິສາຫະກິດ ສິງກະໂປ ມີຄວາມພຶງພໍໃຈກ່ຽວກັບສະພາບແວດລ້ອມແຫ່ງການດຳເນີນທຸລະກິ.ດ ແລະ ການລົງທຶນຢູ່ຫວຽດນາມ ແລະ ຈະສືບຕໍ່ເປີດກວ້າງການພົວພັນຮ່ວມມືເສດຖະກິດກັບຫວຽດນາມ. ທ່ານປະທານປະເທດເຈີນດ້າຍກວາງ ຢືນຢັນນະໂຍບາຍສະເຫມີຕົ້ນສະເຫມີປາຍຂອງຫວຽດນາມ ແມ່ນຖືເປັນສຳຄັນ ແລະ ຊຸກຍູ້ການພົວພັນຄູ່ຮ່ວມມືຍຸດທະສາດກັບສິງກະໂປນັບມື້ນັບມີປະສິດທິຜົນ.
ການນຳ 2 ທ່ານໄດ້ແລກປ່ຽນກ່ຽວກັບສະພາບການຂອງພາກພື້ນ ແລະ ສາກົນຢ່າງເລິກເຊິ່ງ, ກວ້າງຂວາງ, ເຫັນດີຈະສືບຕໍ່ສົມທົບກັນ ແລະ ສະໜັບສະໜູນເຊິ່ງກັນຢູ່ບັນດາເວທີປາໄສພາກພື້ນ ແລະ ສາກົນ. 2 ຝ່າຍເຫັນດີຊຸກຍູ້ການເພີ່ມທະວີຄວາມສາມັກຄີ ແລະ ຮັກສາບົດບາດໃຈກາງຂອງອາຊຽນ ໃນໂຄງປະກອບຄວາມໝັ້ນຄົງຢູ່ພາກພື້ນ. 2 ຝ່າຍຢືນຢັນຫຼັກໝັ້ນລວມຂອງອາຊຽນ ໃນການແກ້ໄຂບັນດາການຂັດແຍ້ງຢູ່ພາກພື້ນ, ເນັ້ນໜັກເຖິງຄວາມສຳຄັນຂອງການຮັກສາສັນຕິພາບ, ສະຖຽນລະພາບ, ຄວາມໝັ້ນຄົງຢູ່ທະເລຕາເວັຍນອອກ; ຫັນດີຊຸກຍູ້ການແກ້ໄຂການຂັດແຍ້ງກັນຢູ່ທະເລຕາເວັນອອກໂດຍສັນຕິວິທີ; ພ້້ອມກັບຝ່າຍຕ່າງໆປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ, ບັນລຸໄດ້ກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ໂດຍໄວ.
ແລະກໍໃນຕອນເຊົ້າວັນທີ 29/08, ທ່ານປະທານປະເທດ ເຈີນດ້າຍກວາງ ແລະ ພັນລະຍາ ໄດ້ໄປວາງພວງມາລາຢູ່ອະນຸສາວະລີປະທານໂຮ່ຈິມິນ ໃນສວນສາທາລະນະ ຕໍ່ໜ້າຫໍພິພິດຕະພັນ ສີວິໄລອາຊີ.
ສອງຝ່າຍເຫັນດີເປັນເອກະພາບ ຄວນເພີ່ມທະວີການແລກປ່ຽນ ຄະນະຜູ້ແທນຂັ້ນສູງ ແລະ ທຸກຂັ້ນ ເພື່ອແນໃສ່ຊຸກຍູ້ບັນດາການຮ່ວມມືລະອຽດ ຂອງແຕ່ລະຂະແໜງ ແລະ ແຕ່ລະຂົງເຂດ. ທ່ານ ປະທານປະເທດ ເຈີ່ນດ້າຍກວາງ ຕີລາຄາສູງ ການທີ່ສິງກະໂປ ຍາມໃດກໍ່ເປັນຄູ່ຮ່ວມມືການຄ້າ ແລະ ການລົງທຶນ ແຖວໜ້າ ຂອງຫວຽດນາມ ໃນຫຼາຍປີຜ່ານມາ. ສອງຝ່າຍ ກໍ່ໄດ້ເຫັນດີເປັນເອກະພາບ ເພີ່ມທະວີການຮ່ວມມື ໃນບັນດາຂົງເຂດອື່ນໆເຊັ່ນ: ການປ້ອງກັນຊາດ, ປ້ອງກັນຄວາມສະຫງົບ, ການສຶກສາ, ທ່ອງທ່ຽວ, ວັດທະນະທຳ, ການພົບປະແລກປ່ຽນປະຊາຊົນ.
ໃນວັນດຽວກັນ, ທ່ານ ປະທານປະເທດ ເຈີ່ນດ້າຍກວາງ ໄດ້ພົບປະແລກປ່ຽນຄວາມເຫັນກັບ ທ່ານ ນາຍົກລັດຖະມົນຕີ ຫຼີຊຽນຫລົງ. ທ່ານ ຫຼີຊຽນຫລົງ ໄດ້ສະແດງຄວາມເຊື່ອໝັ້ນການຢ້ຽມຢາມ ຈະເປັນການກອບສ່ວນ ເຮັດໃຫ້ການພົວພັນຄູ່ຮ່ວມມືຍຸດທະສາດ ສິງປະໂປ-ຫວຽດນາມ ໃນທຸກຂົງເຂດ ເລິກເຊິ່ງກວ່າອີກ. ທ່ານ ນາຍົກລັດຖະມົນຕີ ຫຼີຊຽນຫລົງ ຢືນຢັນວ່າ: ຈະສະໜັບສະໜູນ ແລະ ໜູນຊ່ວຍຫວຽດນາມ ຈັດຕັ້ງກອງປະຊຸມສຸດຍອດ ຂອງເວທີປາໄສເສດຖະກິດອາຊີ-ປາຊີຟິກ (APEC) ປີ 2017 ໃຫ້ປະສົບຜົນສຳເລັດຢ່າງຈົບງາມ. ທ່ານ ປະທານປະເທດ ເຈີ່ນດ້າຍກວາງ ຕີລາຄາສູງ ຕໍ່ເລື່ອງລັດຖະບານສິງກະໂປ ໄດ້ຊ່ວຍບຳລຸງສ້າງ, ຍົກສູງລະດັບຄວາມຮູ້ ໃຫ້ບັນດາສະມາຊິກພັກ ຊັ້ນກາງ-ສູງ ຂອງພັກກອມມູນິດຫວຽດນາມ; ເຫັນດີເປັນເອກະພາບ ສອງຝ່າຍຄວນເປີດກວ້າງ ແລະ ເຮັດໃຫ້ການພົວພັນນີ້ ເລິກເຊິ່ງກວ່າອີກ ໃນໄລຍະຈະມາເຖິງ.