ບັນດາປະເທດອີຢູບັນລຸໄດ້ຂໍ້ຕົກລົງສຳຄັນກ່ຽວກັບການປ່ຽນແປງຂອງດິນຟ້າອາກາດ
ປະທານຄະນະກຳມະການເອີລົບ Jose Manuel Barroso
ແລະ ທ່ານປະທານສະພາເອີລົບ Herman Van Rompuy
(ພາບ: AFP/TTXVN)
(vovworld) – ຕອນເຊົ້າວັນທີ 24/10, ການນຳບັນດາປະເທດສະຫະພາບເອີລົບ (ອີຢູ) ບັນລຸໄດ້ຂໍ້ຕົກລົງຫລຸດຜ່ອນປະລິມານອາຍແກັດທີ່ກໍ່ມົນລະພິດເຮືອນແກ້ວໃນປີ 2030 ລົງຢ່າງໜ້ອຍສຸດແມ່ນ 40% ເມື່ອທຽບໃສ່ປີ 1990. ຂໍ້ມູນດັ່ງກ່າວໂດຍທ່ານປະທານສະພາເອີລົບ Herman Van Rompuy ປະກາດໃນວັນດຽວກັນທາງອີນເຕີເນັດ. ຕາມທ່ານ Rompuy ແລ້ວ, ວົງການການນຳ ອີຢູ ຍັງເຫັນດີເປັນເອກະສັນນຳກັນຕໍ່ 2 ຈຸດໝາຍອື່ນໃນປີ 2030, ນັ້ນແມ່ນເພີ່ມການນຳໃຊ້ພະລັງງານທີ່ອາດຈະຜະລິດຄືນໃໝ່ໄດ້ 27% ແລະ ເພີ່ມປະສິດທິຜົນການນຳໃຊ້ພະລັງງານຂຶ້ນຢ່າງໜ້ອຍສຸດ 27% ເມື່ອທຽບໃສ່ປົກກະຕິ. ນອກຈາກນັ້ນ, ບັນດາການນຳ ອີຢູ ກໍ່ໃຫ້ຄຳໝັ້ນສັນຍາຊຸກຍູ້ສາຍສຳພັນຂ້າມຊາຍແດນເພື່ອປັບປຸງແຫຼ່ງສະໜອງພະລັງງານລະຫວ່າງບັນດາປະເທດສະມາຊິກ. ບັນດາຂໍ້ຕົກລົງນີ້ບັນລຸໄດ້ພາຍຫຼັງຫຼາຍຊົ່ວໂມງທີ່ຖົກຖຽງກັນລະຫວ່າງບັນດາການນຳ ອີຢູ ທີ່ກອງປະຊຸມສຸດຍອດພວມຈັດຕັ້ງຢູ່ ບຣຸກແຊນ, ປະເທດ ແບນຊິກ.