ພິທີປຸກລະດົມປີສາມັກຄີມິດຕະພາບ
ຫວຽດນາມ - ລາວ, ລາວ - ຫວຽດນາມ 2017
(vovworld) - ໃນຂອບເຂດການຢ້ຽມຢາມ ສປປ ລາວ ຢ່າງເປັນທາງການ, ວັນທີ 26/04 ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ແລະ ທ່ານນາຍົກລັດຖະມົນຕີ ລາວ ທອງລຸນ ສີສຸລິດ ເປັນປະທານຮ່ວມພິທີປຸກລະດົມປີສາມັກຄີມິດຕະພາບ ຫວຽດນາມ - ລາວ, ລາວ - ຫວຽດນາມ 2017. ນີ້ແມ່ນເຫດການສຳຄັນ ນອນໃນບັນດາການເຄື່ອນໄຫວສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດ ແລະ 40 ປີແຫ່ງວັນເຊັນສົນທິສັນຍາມິດຕະພາບ ແລະ ຮ່ວມມື ຫວຽດນາມ - ລາວ. ກ່າວຄຳເຫັນທີ່ພິທີ, ທ່ານນາຍົກລັດຖະມົນຕີ ລາວ ທອງລຸນ ສີສຸລິດ ຢືນຢັນວ່າ ພິທີປຸກລະດົມປີສາມັກຄີມິດຕະພາບ ຫວຽດນາມ - ລາວ, ລາວ - ຫວຽດນາມ 2017 ແມ່ນສານ ແລະ ເຜີຍໃຫ້ປະຊາຊົນ 2 ປະເທດ ແລະ ໃນທົ່ວໂລກຮັບຮູ້ກ່ຽວກັບຄວາມໝາຍ, ຄວາມສຳຄັນຂອງສາຍພົວພັນມິດຕະພາບຍິ່ງໃຫຍ່, ນ້ຳໃຈສາມັກຄີແບບພິເສດ ແລະ ການຮ່ວມມືຮອບດ້ານ ລາວ - ຫວຽດນາມ.
ສ່ວນທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ໄດ້ເຊີດຊູຄວາມໝາຍ ແລະ ຄວາມສຳຄັນຂອງປີສາມັກຄີມິດຕະພາບ ຫວຽດນາມ - ລາວ, ລາວ - ຫວຽດນາມ 2017 ແລະ ເນັ້ນໜັກວ່າ ເຫດການນີ້ ແມ່ນຂີດໝາຍແຫ່ງການພັດທະນາກະໂດດຂັ້ນຂອງສາຍພົວພັນແບບພິເສດລະຫວ່າງ 2 ປະເທດ. ທ່ານນາຍົກລັດຖະມົນຕີ ຫວຽດນາມ ຫງວຽນຊວນຟຸກ ກ່າວວ່າ:
“ຕາງໜ້າໃຫ້ການນຳຂັ້ນສູງ 2 ປະເທດ, ມື້ນີ້ ຂ້າພະເຈົ້າ ແລະ ທ່ານນາຍົກລັດຖະມົນຕີ ລາວ ທອງລຸນ ສີສຸລິດ ຂໍປຸກລະດົມປີສາມັກຄີມິດຕະພາບ ຫວຽດນາມ - ລາວ, ລາວ - ຫວຽດນາມ 2017 ຢ່າງເປັນທາງການ. ຂ້າພະເຈົ້າເຊື່ອໝັ້ນວ່າ ດ້ວຍການຮ່ວມມືຢ່າງແໜ້ນແຟ້ນລະຫວ່າງ 2 ຝ່າຍ, ປີສາມັກຄີມິດຕະພາບ ຫວຽດນາມ - ລາວ, ລາວ - ຫວຽດນາມ 2017 ຈະສຳເລັດຜົນຢ່າງຈົບງາມ, ປະກອບສ່ວນເຮັດໃຫ້ສາຍພົວພັນມິດຕະພາບທີ່ເປັນມູນເຊື້ອ ແລະ ນ້ຳໃຈສາມັກຄີແບບພິເສດ ຫວຽດນາມ - ລາວ ໝັ້ນຄົງຂະໜົງແກ່ນຈົນຊົ່ວກາລະນານ”.
ນາຍົກລັດຖະມົນຕີທັງ 2 ທ່ານເຊື່ອໝັ້ນວ່າ ບັນດາການເຄື່ອນໄຫວໃນປີສາມັກຄີມິດຕະພາບ ຫວຽດນາມ - ລາວ 2017 ຈະປະກອບສ່ວນໂຄສະນາ, ສຶກສາຢ່າງເລິກເຊິ່ງກ້ວາງຂວາງກ່ຽວກັບປະຫວັດສາດການພົວພັນແບບພິເສດ ຫວຽດນາມ - ລາວ, ລາວ - ຫວຽດນາມ ເພື່ອໃຫ້ປະຊາຊົນທຸກຊັ້ນວັນນະຂອງ 2 ປະເທດເຂົ້າໃຈຢ່າງເລິກເຊິ່ງ ແລະ ມີຄວາມເອກອ້າງທະນົງໃຈກ່ຽວກັບສາຍພົວພັນອັນດີງາມ ບໍລິສຸດຜຸດຜ່ອງຂອງ 2 ປະເທດ. ຜ່ານນັ້ນ ຕ້ອງມີຄວາມຮັບຜິດຊອບປົກປັກຮັກສາ, ເພີ່ມພູນຄູນສ້າງ, ເສີມຂະຫຍາຍສາຍພົວພັນອັນລ້ຳຄ່ານີ້ກ່ວາອີກ.