ທ່ານ ເຈີ່ນດ້າຍກວາງ ຕ້ອນຮັບທ່ານລັດຖະມົນຕີກະຊວງ
ການຕ່າງປະເທດ ລາວ ສະເຫຼີມໄຊ ກົມມະສິດ
(vovworld) – ຕອນບ່າຍວັນທີ 09/06 ຢູ່ຮ່າໂນ້ຍ, ທ່ານປະທານປະເທດ ຫວຽດນາມ ເຈີ່ນດ້າຍກວາງ ໄດ້ໃຫ້ການຕ້ອນຮັບທ່ານລັດຖະມົນຕີກະຊວງການຕ່າງປະເທດ ລາວ ສະເຫຼີມໄຊ ກົມມະສິດ ແລະ ທ່ານເອກອັກຄະລັດຖະທູດ ລາວ ປະຈຳ ຫວຽດນາມ ທອງສະຫວັນ ພົບວິຫານ ເຂົ້າຢ້ຽມຂ່ຳນັບ.
ທີ່ການຕ້ອນຮັບທ່ານລັດຖະມົນຕີການຕ່າງປະເທດ ລາວ ສະເຫຼີມໄຊ ກົມມະສິດ ທ່ານປະທານປະເທດ ເຈີ່ນດ້າຍກວາງ ເນັ້ນໜັກວ່າ: ຜົນສຳເລັດຂອງບັນດາການຢ້ຽມຢາມ ຫວຽດນາມ ຂອງທ່ານເລຂາທິການໃຫຍ່, ປະທານປະເທດ ບຸນຍັງ ວໍລະຈິດ ແລະ ທ່ານນາຍົກລັດຖະມົນຕີ ລາວ ທອງລຸນ ສີສຸລິດ ໃນໄລຍະຜ່ານມາ ໄດ້ນຳການພົວພັນ 2 ພັກ, 2 ລັດ, 2 ລັດຖະບານ ຂຶ້ນສູ່ລະດັບສູງໃໝ່. ຊົມເຊີຍໝາກຜົນແຫ່ງການເຈລະຈາລະຫວ່າງລັດຖະມົນຕີກະຊວງການຕ່າງປະເທດ 2 ປະເທດ, ທ່ານປະທານປະເທດ ເຈີ່ນດ້າຍກວາງ ຖືວ່າ: ບັນດາເນື້ອໃນ ແລະ ທິດທາງຮ່ວມມືຕ່າງໆໃນໄລຍະຈະມາເຖິງ ຈະຊ່ວຍຍົກສູງປະສິດທິຜົນການຮ່ວມມືລະຫວ່າງ 2 ກະຊວງການຕ່າງປະເທດກ່ວາອີກ, ພິເສດແມ່ນໃນສະພາບການ ລາວ ພວມຮັບບົດບາດເປັນປະທານ ອາຊຽນ. ທ່ານປະທານປະເທດ ເຈີ່ນດ້າຍກວາງ ໃຫ້ຮູ້ທ່ານຈະໄປຢ້ຽມຢາມ ລາວ ຢ່າງເປັນທາງການໃນເດືອນ 6 ນີ້.
ກ່ອນໜ້ານັ້ນ, ທີ່ການຕ້ອນຮັບທ່ານເອກອັກຄະລັດຖະທູດ ລາວ ທອງສະຫວັນ ພົບວິຫານ, ທ່ານປະທານປະເທດ ເຈີ່ນດ້າຍກວາງ ເຊື່ອໝັ້ນວ່າ: ດ້ວຍບົດຮຽນໃນວຽກງານການຕ່າງປະເທດ, ທ່ານເອກອັກຄະລັດຖະທູດ ຈະສຳເລັດໜ້າທີ່ປະຕິບັດງານຂອງຕົນຢູ່ ຫວຽດນາມ ຢ່າງດີເດັ່ນ, ປະກອບສ່ວນຢ່າງຕັ້ງໜ້າເຂົ້າໃນການປັບປຸງ ແລະ ພັດທະນາການພົວພັນແບບພິເສດ ຫວຽດນາມ - ລາວ.