ປະທານສະພາແຫ່ງຊາດຫງວຽນຊິງຮຸ່ງເຈລະຈາກັບທ່ານປະທານສະພາແຫ່ງຊາດລາວປານີຢາທໍ່ຕູ້
ທ່ານປະທານສະພາແຫ່ງຊາດ ຫງວຽນຊິງຮຸ່ງ ຕ້ອນຮັບ
ທ່ານນາງ ປານີ ຢາທໍ່ຕູ້, ປະທານສະພາແຫ່ງຊາດລາວ
(ພາບ:Nhan Sáng/TTXVN)
(vovworld) - ໂດຍໄດ້ຮັບຄຳເຊີນຂອງທ່ານສະພາແຫ່ງຊາດຫວຽດນາມ ຫງວຽນຊິງຮຸ່ງ, ຄະນະຜູ້ແທນຂັ້ນສູງສະພາແຫ່ງຊາດລາວ ໂດຍທ່ານນາງ ປານີ ຢາທໍ່ຕູ້, ປະທານສະພາແຫ່ງຊາດລາວ ນຳໜ້າໄດ້ມາຮອດ ຮ່າໂນ້ຍ ເລີ່ມຕົ້ນການຢ້ຽມຢາມ ຫວຽດນາມ ຢ່າງເປັນທາງການ. ຕອນເຊົ້າວັນທີ 30/3, ຢູ່ ຮ່າໂນ້ຍ, ພາຍຫຼັງພິທີຕ້ອນຮັບຢ່າງເປັນທາງການ, ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ແລະ ທ່ານນາງປະທານສະພາແຫ່ງຊາດລາວ ໄດ້ດຳເນີນການເຈລະຈາ. ທ່ານປະທານສະພາແຫ່ງຊາດຫວຽດນາມ ຫງວຽນຊິງຮຸ່ງ ສະແດງຄວາມເຊື່ອໝັ້ນວ່າ: ຄະນະຜູ້ແທນຂັ້ນສູງສະພາແຫ່ງຊາດລາວ ຈະປະກອບສ່ວນຢ່າງຕັ້ງໜ້າເພື່ອໃຫ້ກອງປະຊຸມໃຫຍ່ IPU-132 ປະສົບຜົນສຳເລັດ. ທ່ານນາງປະທານສະພາແຫ່ງຊາດລາວ ປານີ ຢາທໍ່ຕູ້ ສະໜັບສະໜູນ ແລະ ຊົມເຊີຍກອງປະຊຸມໃຫຍ່ IPU-132 ວາງອອກຖະແຫຼງຮ່າໂນ້ຍ. ນີ້ຈະແມ່ນຖະແຫຼງການທີ່ສຳຄັນ, ທັນການໃນສະພາບການໂລກພວມຢືນຢູ່ຕໍ່ໜ້າຄວາມຫຍຸ້ງຍາກ ແລະ ສິ່ງທ້າທາຍນາໆປະການ, ກໍ່ຄືພວມມຸ່ງໄປເຖິງບັນດາຄາດໝາຍພັດທະນາຢ່າງໝັ້ນຄົງ.
ປະທານສະພາແຫ່ງຊາດທັງ 2 ທ່ານ ສະແດງຄວາມເພິ່ງພໍໃຈກ່ຽວກັບບັນດາໝາກຜົນອັນດີງາມໃນການພົວພັນລະຫວ່າງ 2 ປະເທດ, 2 ສະພາແຫ່ງຊາດໃນທຸກຂົງເຂດ. 2 ຝ່າຍເຫັນດີເປັນເອກະສັນສືບຕໍ່ປັບປຸງ ແລະ ເພີ່ມທະວີການພົວພັນມິດຕະພາບ, ມູນເຊື້ອ, ສາມັກຄີແບບພິເສດ ແລະ ການຮ່ວມມືຮອບດ້ານນັບທັງຂົງເຂດ 2 ຝ່າຍ ແລະ ຫຼາຍຝ່າຍ; ສືບຕໍ່ປະຕິບັດບັນດາຂໍ້ຕົກລົງລະຫວ່າງ 2 ສະພາແຫ່ງຊາດຢ່າງມີປະສິດທິຜົນ; ແລກປ່ຽນຄະນະຜູ້ແທນຂັ້ນສູງສະພາແຫ່ງຊາດ, ສະພາປະຊາຊົນທຸກຂັ້ນ, ເພີ່ີມທະວີການແບ່ງປັນບົດຮຽນດ້ານນິບັນຍັດ ແລະ ຕິດຕາມກວດກາເປັນປະຈຳ.
ແລະ ກໍໃນຕອນບ່າຍວັນທີ 30/3, ທ່ານປະທານປະເທດຫວຽດນາມເຈືອງເຕີ້ນຊາງ ໄດ້ໃຫ້ການຕ້ອນຮັບທ່ານນາງປານີ ຢາທໍຕູ້ ປະທານສະພາແຫ່ງຊາດລາວ. ທີ່ການຕ້ອນຮັບ, ທ່ານປະທານປະເທດຫວຽດນາມເຈືອງເຕີ້ນຊາງ ຢືນຢັນວ່າ ເລື່ອງ 2 ຝ່າຍແລກປ່ຽນຄະນະຜູ້ແທນຂັ້ນສູງເປັນປະຈຳ ໄດ້ປະກອບສ່ວນເພີ່ມທະວີການພົວພັນມິດຕະພາບ, ຄວາມສາມັກຄີແບບພິເສດລະຫວ່າງ 2 ປະເທດ. ທ່ານປະທານປະເທດຫວຽດນາມເຈືອງເຕີ້ນຊາງ ສະເໜີ 2 ພັກ, 2 ສະພາແຫ່ງຊາດ, ດ້ວຍຄວາມໜ້າທີ່ຄວາມຮັບຜິດຊອບຂອງຕົນ, ຄວນເພີ່ມທະວີການຕິດຕາມກວດກາ, ແກ້ໄຂສິ່ງທີ່ຄ້າງຄ່າເພື່ອປະຕິບັດໜ້າທີ່ໄດ້ວາງອອກຢ່າງມີໄຊ, ຊຸກຍູ້ການຮ່ວມມືຮອບດ້ານລະຫວ່າງ 2 ປະເທດ.