ພັກ,ລັດແລະປະຊາຊົນຫວຽດນາມຍາມໃດກໍ່ຮຽງບ່າຮຽງໄຫຼ່ກັບບັນດາເພື່ອນລາວ
ທ່ານນາຍົກລັດຖະມົນຕີຫງວຽນເຕິ໋ນຢຸງ ແລະ ທ່ານເລຂາທິການໃຫຍ່, ປະທານປະເທດລາວ ຈູມມະລີ ໄຊຍະສອນ
(ພາບ: VGP/Nhật Bắc)
(vovworld) – ພັກ, ລັດ ແລະ ປະຊາຊົນຫວຽດນາມ ຍາມໃດກໍ່ຮຽງບ່າຮຽງໄຫຼ່ກັບບັນດາເພື່ອນລາວ. ນີ້ແມ່ນຄຳຢັ້ງຢືນຂອງທ່ານນາຍົກລັດຖະມົນຕີຫງວຽນເຕິ໋ນຢຸງ ທີ່ການເຈລະຈາກັບທ່ານເລຂາທິການໃຫຍ່, ປະທານປະເທດລາວ ຈູມມະລີ ໄຊຍະສອນ, ໃນຕອນບ່າຍວັນທີ 25/11. ການນຳສອງທ່ານໄດ້ເຫັນດີເປັນເອກະສັນນຳກັນວ່າທັງສອງຝາຍຈະຕັ້ງໜ້າຊີ້ນຳບັນດາກະຊວງ, ຂະແໜງການ, ທ້ອງຖີ່ນຕ່າງໆຂອງສອງປະເທດສືບຕໍ່ສົມທົບກັນຢ່າງແໜ້ນແຟ້ນ ເພື່ອຜັນຂະຫຍາຍບັນດາຂໍ້ຕົກລົງຂອງການນຳຂັ້ນສູງ ແລະ ຜົນກອງປະຊຸມຄັ້ງທີ 36 ຂອງຄະນະກຳມະການລະຫວ່າງລັດຖະບານຫວຽດນາມ - ລາວ; ພ້ອມທັງກະກຽມໃຫ້ກອງປະຊຸມຄັ້ງທີ 37 ຂອງຄະນະກຳມະການລະຫວ່າງລັດຖະບານໃນຕົ້ນປີ 2015. ສອງຝ່າຍກໍ່ຍູ້ແຮງຄວາມຄືບໜ້າໃນບັນດາກິດຈະກຳ, ໂຄງການນຳໃຊ້ທຶນຊ່ວຍເຫຼືອພັດທະນາ, ເພີ່ມທະວີການຮ່ວມມືດ້ານວັດທະນະທຳ, ການສຶກສາ - ບຳລຸງສ້າງ, ວິທະຍາສາດ - ເຕັກນິກ, ສືບຕໍ່ເປີດກວ້າງ ແລະ ເພີ່ມທະວີການພົວພັນຮ່ວມມືລະຫວ່າງບັນດາກະຊວງ, ຂະແໜງການທ້ອງຖີ່ນ. ສອງຝ່າຍກໍ່ຢືນຢັນສືບຕໍ່ເອົາໃຈໃສ່, ສ້າງເງື່ອນໄຂສະດວກໃຫ້ວິສາຫະກິດສອງປະເທດຊຸກຍູ້ການຮ່ວມມືດ້ານເສດຖະກິດ, ການຄ້າ, ການລົງທຶນ.
ແລະກໍ່ໃນຕອນບ່າຍວັນດຽວກັນ, ທ່ານນາຍົກລັດຖະມົນຕີຫງວຽນເຕິ໋ນຢຸງ ພ້ອມດ້ວຍຄະນະຜູ້ແທນຫວຽດນາມໄດ້ເດີນທາງອອກຈາກວຽງຈັນກັບເມືອຮ່າໂນ້ຍ, ສິ້ນສຸດການເຂົ້າຮ່ວມ ກອງປະຊຸມຂັ້ນສູງເຂດ 3 ຫຼ່ຽມພັດທະນາ ກຳປູເຈຍ - ລາວ - ຫວຽດນາມ (CLV) ຄັ້ງທີ 8ຢ່າງຈົບງາມ.