(vovworld) – ຕອນຄໍ່າວັນທີ 7/4, ທີ່ ປັກກິ່ງ, ໄດ້ຈັດພິທີເປີດການເຄື່ອນໄຫວປີແລກປ່ຽນວັດທະນະທຳ ອາຊຽນ - ຈີນ ຢ່າງເປັນທາງການ. ເຫດການດັ່ງກ່າວແມ່ນການເຄື່ອນໄຫວໂດຍກະຊວງວັດທະນະທຳ ແລະ ກະຊວງການຕ່າງປະເທດ ຈີນ ສົມທົບກັນຈັດຕັ້ງຕາມສັນຍາທີ່ບັນລຸໄດ້ລະຫວ່າງການນຳຂັ້ນສູງ ຈີນ ແລະ 10 ປະເທດອາຊີຕາເວັນອອກສ່ຽງໃຕ້ເມື່ອທ້າຍປີກ່າຍເນື່ອງໃນໂອກາດ 10 ປີແຫ່ງວັນສ້າງຕັ້ງສາຍພົວພັນຄູ່ຮ່ວມມືຍຸດທະສາດສອງຝ່າຍ. ກ່າວຄຳເຫັນໄຂພິທີ, ທ່ານຮອງນາຍົກລັດຖະມົນຕີ ຈີນ ລ໋ຽວແຢນຕຸງ ເນັ້ນໜັກວ່າ ຈີນ ປາດຖະໜາຢາກເປັນຂົວຕໍ່ພ້ອມກັບບັນດາປະເທດ ອາຊີຕາເວັນອອກສ່ຽງໃຕ້ເຮັດໃຫ້ສາຍພົວພັນສອງຝ່າຍໃນຂົງເຂດພົວພັນແລກປ່ຽນປະຊາຊົນເລີກເຊີ່ງກວ່າອີກ, ເພື່ອເພີ່ມທະວີການຮ່ວມມື, ຮັດແໜ້ນນ້ຳໃຈມິດຕະພາບລະຫວ່າງປະຊາຊົນ ຈີນ - ອາຊຽນ.
ເຂົ້າຮ່ວມພິທີເປີດ, ທ່ານນາງ ດັ້ງທິບີກລຽນ, ຮອງລັດຖະມົນຕີກະຊວງວັດທະນະທຳ ກິລາ ແລະ ທ່ອງທ່ຽວ ຫວຽດນາມ, ຫົວຫນ້າຄະນະຜູ້ແທນຫວຽດນາມ ໃຫ້ຮູ້ວ່າ: ຫວຽດນາມ ຕີລາຄາສູງເລື່ອງຈັດຕັ້ງປີແລກປ່ຽນວັດທະນະທຳ ອາຊຽນ -ຈີນ ແລະ ຖືວ່າ ນີ້ແມ່ນກາລະໂອກາດດີ ເພື່ອແນະນຳວັດທະນະທຳ, ເພີ່ມທະວີຄວາມເຂົ້າໃຈ ແລະ ນຳ້ໃຈມິດຕະພາບລະຫວ່າງປະຊາຊົນສອງປະເທດ.
“ໃນຫລາຍປີຜ່ານມາ, ບໍ່ພຽງແຕ່ໃນຂອບເຂດຫວຽດນາມ ກັບ ອາຊຽນເທົ່ານັ້ນ ຫາກ ອາຊຽນ ກັບຈີນ, ຫວຽດນາມ ລ້ວນແຕ່ເປັນສະມາຊິກເຂົ້າຮ່ວມຢ່າງຕັ້ງຫນ້າບັນດາການເຄື່ອນໄຫວທີ່ໄດ້ວາງອອກໃນແຕ່ລະປີ. ປີນີ້, ຫວຽດນາມ ກໍກະກຽມເຂົ້າຮ່ວມການພົວພັນແລກປ່ຽນວັດທະນະທຳ ເພື່ອໂຄສະນາພາບພົດປະເທດຊາດ ແລະ ຊາວຫວຽດນາມ.”
ປີແລກປ່ຽນວັດທະນະທຳ ອາຊຽນ - ຈີນ ຖືກດຳເນີນໃນຕະຫຼອດປີເຊີ່ງມີປະມານ 150 ການເຄື່ອນໄຫວໂດຍ 10 ປະເທດ ອາຊີຕາເວັນອອກສ່ຽງໃຕ້ ແລະ ຈີນ ຈັດຕັ້ງດ້ວຍຫຼາຍຮູບແບບທີ່ອຸດົມສົມບຸນຄື ກອງປະຊຸມ, ການສະແດງສິລະປະ, ການວາງສະແດງ, ການພົບປະແລກປ່ຽນ ແລະ ບຳລຸງລ້ຽງຜູ້ເກັ່ງກ້າສາມາດ, ໜັງສືພິມ, ຮູບເງົາ, ການພິມຈຳໜ່າຍ, ກິລາ, ການທ່ອງທ່ຽວ, ສາສະໜາ, ການພົບປະ ແລກປ່ຽນລະຫວ່າງໄວໜຸ່ມ….