(vovworld) – ໂດຍໄດ້ຮັບຄຳເຊີນຂອງກະຊວງການຕ່າງປະເທດ ສ.Panama, ຄະນະຜູ້ແທນກະຊວງການຕ່າງປະເທດຫວຽດນາມ ໂດຍທ່ານລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ ຮ່າກິມຫງອກ ນຳໜ້າ, ໄດ້ໄປຢ້ຽມຢາມ ສ.Panama ຢ່າງເປັນທາງການ ແລະ ດຳເນີນການພິຈາລະນາການເມືອງຢູ່ສ.Panama ໃນລະຫວ່າງວັນທີ 21 – 22/11. ນີ້ແມ່ນການເຈລະຈາດ້ານການເມືອງຄັ້ງທຳອິດ ນັບແຕ່ເວລາ 2 ປະເທດລົງນາມໃນບົດບັນທຶກຊ່ວຍຈຳສ້າງຕັ້ງກົນໄກດັ່ງກ່າວ (10/2012) ແລະ ແມ່ນເຫດການສຳຄັນເພື່ອມຸ່ງໄປເຖິງການສະເຫຼີມສະຫຼອງ 40 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ 2 ປະເທດ (28/08/1975 – 28/08/2015).
ທີ່ການພົບປະທາບທາມດ້ານການເມືອງ, ທ່ານລັດຖະມົນຕີຊ່ວຍວ່າການກະຊວງການຕ່າງປະເທດ Luis Miguel Hincapie ແລະ ທ່ານລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມ ຮ່າກິມຫງອກ ໄດ້ເຫັນດີນຳກັນວ່າ 2 ຝ່າຍຕ້ອງຊຸກຍູ້ການແລກປ່ຽນຄະນະຜູ້ແທນທຸກຂັ້ນ, ສ້າງຕັ້ງບັນດາກົນໄກຮ່ວມມືຢ່າງມີປະສິດທິຜົນ, ເພີ່ມທະວີການພົວພັນລະຫວ່າງບັນດາກະຊວງ, ຂະແໜງການ ແລະ ວິສາຫະກິດ 2 ປະເທດ, ສົມທົບສ້າງກອບກົດໝາຍໃຫ້ສົມບູນແບບແກ່ການພົວພັນຮ່ວມມືຜ່ານການເຈລະຈາ ແລະ ລົງນາມໃນບັນດາສັນຍາຮ່ວມມືດ້ານການຄ້າ, ການລົງທຶນ, ສຶກສາ. 2 ຝ່າຍກໍ່ໄດ້ແລກປ່ຽນກ່ຽວກັບສະພາບການສາກົນ ແລະ ພາກພື້ນທີ່ຕ່່າງຝ່າຍຕ່າງມີຄວາມສົນໃຈ, ສະໜັບສະໜູນເຊິ່ງກັນ ແລະ ກັນອອກສະໝັກຮັບເລືອກຕັ້ງເຂົ້າໃນບາງກົນໄກສຳຄັນຂອງສະຫະປະຊາຊາດ ໃນໄລຍະຈະມາເຖິງ… ການນຳ Panama ຢືນຢັນວ່າ, ຍາມໃດ Panama ກໍ່ຕິດຕາມບັນຫາທະເລຕາເວັນອອກຢ່າງໃກ້ຊິດ, ສະໜັບສະໜູນຄວາມເປັນທຳ ແລະ ແກ້ໄຂການຂັດແຍ່ງໂດຍສັນຕິວິທີ, ບໍ່ນຳໃຊ້ອາວຸດ, ບົນພື້ນຖານເຄົາລົບກົດໝາຍສາກົນ. ທ່ານລັດຖະມົນຕີຊ່ວຍວ່າການກະຊວງການຕ່າງປະເທດ ຮ່າກິມຫງອກ ກໍ່ສະແດງຄວາມປາດຖະໜາວ່າ, ສະມາຄົມມິດຕະພາບ Panama - ຫວຽດນາມ ຈະສືບຕໍ່ຮັກສາ ແລະ ເປີດກວ້າງບັນດາການເຄື່ອນໄຫວແລກປ່ຽນຂໍ້ມູນຂ່າວສານ, ສາມັກຄີ ແລະ ມິດຕະພາບ, ໜູນຊ່ວຍການພົວພັນດ້ານເສດຖະກິດ, ການຄ້າ, ວັດທະນະທຳ, ການທ່ອງທ່ຽວທີ່ພວມພັດທະນາລະຫວ່າງ 2 ປະເທດ.