(vovworld) - ວັນທີ 14/04, ທ່ານ Dmitry Peskov ໂຄສົກວັງ Kremlin ຖະແຫຼງວ່າ, ລັດເຊຍ ພ້ອມແລ້ວທີ່ຈະຟື້ນຟູບົດບັນທຶກຊ່ວຍຈຳກ່ຽວກັບການຫຼີກລ້ຽງການປະທະກັນທາງອາກາດກັບອາເມລິກາ ຢູ່ຊີຮີ, ຖ້າຫາກ “ບັນດາການກະທຳບໍ່ອາດຄາດຄະເນລ່ວງໜ້າໄດ້” ຂອງວໍຊິງຕັນ ບໍ່ເກີດຂຶ້ນອີກເທື່ອໜຶ່ງ. ຕາມທ່ານ Peskov ແລ້ວ, ເລື່ອງອາເມລິກາ ກ່າວຫາກອງທັບຊີຣີ ກ່ຽວຂ້ອງເຖິງເຫດບຸກໂຈມຕີເຊິ່ງຖືກສົງໄສວ່າໄດ້ນຳໃຊ້ອາວຸດເຄມີ ພຽງແມ່ນຂໍ້ອ້າງອີງໃຫ້ການບຸກໂຈມຕີທາງອາກາດໃສ່ຖານທີ່ໝັ້ນກອງທັບອາກາດ Shairat ຢູ່ຊີຣີ ໃນວັນທີ 07/04 ຜ່ານມາ. ທ່ານ Peskov ຖືວ່າ “ຄຳກ່າວຫາດັ່ງກ່າວບໍ່ມີຫຼັກຖານ, ເມື່ອຍັງບໍ່ທັນມີການສຶບສວນໃດໆທີ່ໄດ້ຮັບການປະຕິບັດ ແລະ ຊ້ຳບໍ່ໜຳບໍ່ມີຄວາມມານະພະຍາຍາມປະຕິບັດການສືບສວນຄືແນວນັ້ນ”.
ວັນທີ 07/04 ຜ່ານມາ, ອາເມລິກາ ໄດ້ຍິງລູກສອນໄຟນຳວິທີ Tomahawk 59 ໜ່ວຍໃສ່ຖານທີ່ໝັ້ນການທະຫານຊີຣີ ຢູ່ເທດສະບານ Ash Shairat, ໃກ້ກັບແຂວງ Homs. ລັດເຊຍ ໄດ້ເອີ້ນການບຸກໂຈມຕີທາງອາກາດແມ່ນ “ການກະທຳເກາະຜິດແນໃສ່ປະເທດມີສິດອະທິປະໄຕ”. ພ້ອມທັງລັດເຊຍ ກໍ່ຖະແຫຼງຢຸດຕິຂໍ້ຕົກລົງສະກັດກັ້ນການປະທະກັນທາງອາກາດກັບອາເມລິກາ ຢູ່ຊີຣີ.