(vovworld) – ຕອນຄໍ່າວັນທີ 26/07, ຢູ່ນະຄອນກວາງຫງ້າຍ, ວິທະຍຸກະຈາຍສຽງຫວຽດນາມ (VOV) ສົມທົບກັບທະນາຄານແຫ່ງລັດຫວຽດນາມ, ຄະນະກຳມະຫານປະຊາຊົນແຂວງກວາງຫງ້າຍ ໄດ້ຈັດລາຍການພົບປະແລກປ່ຽນສະແດງສິລະປະ “ລະດົມກຳລັງໃຈໃຫ້ຊາວປະມົງເດີນເຮືອຫາປາຢູ່ທະເລ”. ເຂົ້າຮ່ວມລາຍການມີທ່ານຮອງປະທານສະພາແຫ່ງຊາດຫວຽດນາມ ອວງຈູລີວ.
ຈຸດພົ້ນເດັ່ນຂອງລາຍການພົບປະແລກປ່ຽນແມ່ນພົບປະແລກປ່ຽນກັບບັນດາແຂກຖືກເຊີນ ເຊິ່ງເປັນຜູ້ຕາງໜ້າຂອງກຳລັງກວດກາການປະມົງ, ຕຳຫຼວດທະເລ ແລະ ຊາວປະມົງທີ່ດີເດັ່ນ. ບັນດາການແລກປ່ຽນ, ໂອ້ລົມຂອງແຂກຖືກເຊີນໄດ້ຊີ້ໃຫ້ເຫັນຄວາມຕັດສິນໃຈ, ມີໄຫວພິບ, ບໍ່ຫວາດຫວັນຕໍ່ຄວາມຫຍຸ້ງຍາກຂອງກຳລັງປະຕິບັດກົດໝາຍຫວຽດນາມ ໃນການຕໍ່ສູ້ກັບເລື່ອງຈີນ ຕັ້ງຮ້ານເຈາະນ້ຳມັນໄຮຢາງ 981 ຢ່າງຜິດກົດໝາຍໃນເຂດເສດຖະກິດຈຳເພາະ ແລະ ໄຫຼ່ທະວີບຂອງຫວຽດນາມ; ເຈດຈຳນົງສັດສິນໃຈ, ອອກສູ່ທະເລ, ປົກປັກຮັກສາເຂດຫາປາທີ່ມີມາແຕ່ດົນນານ, ປົກປັກຮັກສາເຂດທະເລ, ໝູ່ເກາະຂອງຊາວປະມົງຫວຽດນາມ.
ທີ່ລາຍການ, ທະນາຄານແຫ່ງລັດຫວຽດນາມ ໄດ້ມອບຈຳນວນເງິນ 5 ຕື້ດົງ ໃຫ້ກຳລັງກວດກາການປະມົງແຂວງກວາງຫງ້າຍ; 100 ລ້ານດົງໃຫ້ 10 ຄອບຄົວກວດກາການປະມົງ ແລະ ຕຳຫຼວດທະເລທີ່ປະສົບກັບຄວາມຫຍຸ້ງຍາກ. VOV ກໍ່ມອບ 200 ລ້ານດົງໃຫ້ແກ່ບັນດາຊາວປະມົງທີ່ປະສົບກັບຄວາມຫຍຸງຍາກຢູ່ 3 ແຂວງ ກວາງນາມ, ກວາງຫງ້າຍ ແລະ ບິ່ງດິ້ງ.
ຕາມທ່ານຜູ້ອຳນວຍການໃຫຍ່ VOV ຫງວຽນດັງຕ໋ຽນແລ້ວ, ລາຍການ “ລະດົມກຳລັງໃຈໃຫ້ຊາວປະມົງເດີນເຮືອຫາປາຢູ່ທະເລ” ມີຄວາມໝາຍສຳຄັນຍິ່ງສຳລັບຊາວປະມົງແຂວງກວາງຫງ້າຍ ເວົ້າສະເພາະ ແລະ ຊາວປະມົງໃນທົ່ວປະເທດເວົ້າລວມ. ທ່ານຜູ້ອຳນວຍການໃຫຍ່ VOV, ຫງວຽນດັງຕ໋ຽນ ກ່າວວ່າ.
“ດ້ວຍໜ້າທີ່ຂອງອົງການສື່ມວນຊົນໃຫຍ່ຂອງພັກ, ລັດ ແລະ ດ້ວຍ 4 ຮູບແບບສື່ມວນຊົນຄື: ກະຈາຍສຽງ, ໂທລະພາບ, ໜັງສ່ືພິມເອເລກໂຕນິກ ແລະ ໜັງສື່ພິມ, VOV ໄດ້ພ້ອມກັບບັນດາອົງການສື່ມວນຊົນໂຄສະນາແຜນນະໂຍບາຍ, ແນວທາງນະໂຍບາຍຂອງພັກ, ລັດຢ່າງຄົບຖ້ວນເຖິງຊາວປະມົງ. ແລະນີ້ແມ່ນລາຍການສົມທົບທີ່ມີຄວາມໝາຍສຳລັບຊາວປະມົງເມື່ອອອກສູ່ທະເລຫາປາ ທັງພັດທະນາເສດຖະກິດ, ທັງຢັ້ງຢືນອະທິປະໄຕຂອງຫວຽດນາມ.”