ລາຍການພິເສດເນື່ອງໃນໂອກາດຢ້ຽມຢາມສັນທະວະໄມຕີ ສປປ ລາວ ຂອງທ່ານເລຂາທິການໃຫຍ່ ຫງວຽນຟູ໋ຈ້ອງ

ວັນພະຫັດ ທີ 24 ພະຈິກ ຄ.ສ. 2016 | 15:20:02

(vovworld) - ວັນທີ 24/11, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ ເລີ່ມຕົ້ນການຢ້ຽມຢາມສັນທະວະໄມຕີ ສປປ ລາວ ຢ່າງເປັນທາງການ, ແຕ່ວັນທີ 24 – 26/11/2016 ຕາມຄຳເຊື້ອເຊີນຂອງທ່ານເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດ ສປປ ລາວ ບຸນຍັງ ວໍລະຈິດ. ນີ້ແມ່ນການຢ້ຽມຢາມຕ່າງປະເທດຄັ້ງທຳອິດຂອງທ່ານໃນຖານະຕຳແໜ່ງເປັນ ເລຂາທິການໃຫຍ່ ອາຍຸການກອງປະຊຸມໃຫຍ່ຄັ້ງທີ XII ຂອງພັກກອມມູນິດ ຫວຽດນາມ, ສິ່ງດັ່ງກ່າວສະແດງໃຫ້ເຫັນວ່າ ພັກ ແລະ ລັດ ຫວຽດນາມ ຖືສາຍພົວພັນສາມັກຄີແບບພິເສດ ຫວຽດນາມ - ລາວ ເປັນສຳຄັນທີ່ສຸດ. ເນື່ອງໃນໂອກາດນີ້, ລາຍການກະຈາຍສຽງພາກພາສາ ລາວ ວິທະຍຸກະຈາຍສຽງ ຫວຽດນາມ ຂໍຈັດລາຍການພິເສດ. ເລີ່ມຕົ້ນເຊີນທ່ານຮັບຟັງບັນດາຂ່າວກ່ຽວກັບການເຄື່ອນໄຫວຂອງທ່ານ ເລຂາທິການໃຫຍ່ ຫງວຽນຟູ໋ຈ້ອງ ຢູ່ ສປປ ລາວ. ພາຍຫຼັງພາກຂ່າວພວກເຮົາຈະພ້ອມກັນຫວນຄືນສາຍພົວພັນຮ່ວມມື ຫວຽດນາມ - ລາວ ໃນບັນດາຂົງເຂດ: ການເມືອງ, ເສດຖະກິດ, ການພົບປະແລກປ່ຽນປະຊາຊົນ - ເຊິ່ງແມ່ນບັນດາຂົງເຂດທີ່ໄດ້ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບ ຫວຽດນາມ - ລາວ ນັບມື້ນັບສວຍສົດງົດງາມ ແລະ ໝັ້ນຄົງຂະໜົງແກ່ນໄປຊົ່ວກາລະນານ.

-------------

ນັບແຕ່ສອງປະເທດ ຫວຽດນາມ ແລະ ລາວ ສ້າງຕັ້ງສາຍພົວພັນທາງການທູດເມື່ອປີ (1962), ພິເສດແມ່ນພາຍຫຼັງສອງປະເທດລົງນາມໃນສົນທິສັນຍາມິດຕະພາບ ແລະ ການຮ່ວມມືປີ (1977), ການພົວພັນລະຫວ່າງສອງປະເທດນັບມື້ນັບໄດ້ຮັບການປັບປຸງ ແລະ ພັດທະນາຢ່າງບໍ່ຢຸດຢັ້ງ, ປະກອບສ່ວນສຳຄັນເຂົ້າພາລະກິດປົດປ່ອຍຊາດ ແລະ ສ້າງສາພັດທະນາປະເທດຊາດຂອງສອງປະເທດ ຫວຽດນາມ - ລາວອ້າຍນ້ອງ. ປະຈຸບັນ, ສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດພວມພັດທະນາຢ່າງແຮງ, ທັງເລິກເຊິ່ງ ແລະ ກວ້າງຂວາງໃນທຸກຂົງເຂດ. ສອງຝ່າຍໄດ້ຜັນຂະຫຍາຍການປະຕິບັດບັນດາຂໍ້ຕົກລົງທີ່ບັນລຸໄດ້ລະຫວ່າງການນຳຂັ້ນສູງຂອງສອງພັກ, ສອງລັດ; ບັນດາເນື້ອໃນທີ່ກອງປະຊຸມຄັ້ງທີ 38 ຄະນະກຳມະການລະຫວ່າງລັດຖະບານ ກ່ຽວກັບການຮ່ວມມືສອງຝ່າຍ ຫວຽດນາມ - ລາວຢ່າງມີປະສິດທິຜົນ, ແລະ ບັນລຸໄດ້ບັນດາຜົນງານທີ່ຕັ້ງ.

ການພົວພັນດ້ານການເມືອງລະຫວ່າງສອງປະເທດໄດ້ຮັບການຊຸກຍູ້ຢ່າງແຮງ, ນັບມື້ນັບສະໜິດຕິດພັນ ແລະ ໄວ້ເນື້ອເຊື່ອໃຈກວ່າ. ສອງຝ່າຍໄດ້ສົມທົບກັນຈັດຕັ້ງການຢ້ຽມຢາມ, ພົບປະແລກປ່ຽນລະຫວ່າງການນຳຂັ້ນສູງຂອງສອງພັກ, ສອງລັດ, ພິເສດແມ່ນພາຍຫຼັງທັງສອງປະເທດຈັດຕັ້ງກອງປະຊຸມໃຫຍ່ພັກ ແລະ ການເລືອກຕັ້ງສະພາແຫ່ງຊາດຂອງແຕ່ລະປະເທດສຳເລັດຜົນ; ຫວຽດນາມ ໄດ້ເປີດບັນດາຊຸດຟຶກອົບຮົມໃຫ້ພະນັກງານລາວ; ເພີ່ມທະວີການແລກປ່ຽນຂໍ້ມູນຂ່າວສານ; ຈັດຕັ້ງກອງປະຊຸມສຳມະນາກ່ຽວກັບວຽກງານກໍ່ສ້າງພັກ, ການຄຸ້ມຄອງເສດຖະກິດ - ສັງຄົມ; ສົມທົບກັບລາວໂຄສະນາກ່ຽວກັບມູນເຊື້ອແຫ່ງຄວາມສາມັກຄີແບບພິເສດ ຫວຽດນາມ - ລາວ. ສາຍພົວພັນ ຫວຽດນາມ - ລາວ ບໍ່ພຽງແຕ່ແມ່ນສາຍພົວພັນທາງການທູດທຳມະດາເທົ່ານັ້ນ, ຫາກແມ່ນສາຍພົວພັນທີ່ໄດ້ຮັບການສ້າງຂຶ້ນດ້ວຍເລືອດເນື້ອຂອງປະຊາຊົນ ແລະ ນັກຮົບສອງປະເທດ, ແມ່ນສາຍພົວພັນແບບພິເສດ ແລະ ຫາຍາກຢູ່ໃນໂລກ. ກ່ອນການຢ້ຽມຢາມສັນທະວະໄມຕີ ສປປ ລາວ ຢ່າງເປັນທາງການຂອງທ່ານ ເລຂາທິການໃຫຍ່ ຫງວຽນຟູ໋ຈ້ອງ. ທ່ານ ທອງສະຫວັນ ພົມວິຫານ, ເອກອັກຄະລັດຖະທູດ ວິສາມັນ ຜູ້ມີອຳນາດເຕັມແຫ່ງ ສປປ ລາວ ປະຈຳ ຫວຽດນາມ ແລະ ທ່ານ ຫງວຽນຮູຍຕັງ, ຮອງຫົວໜ້າຄະນະພົວພັນຕ່າງປະເທດສູນກາງພັກກອມມູນິດ ຫວຽດນາມ ໄດ້ຕີລາຄາກ່ຽວກັບສາຍພົວພັນດ້ານການເມືອງລະຫວ່າງສອງປະເທດ ຫວຽດນາມ - ລາວ ວ່າ:

- ສຽງທ່ານເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ຫວຽດນາມ ທອງສະຫວັນ ພົມວິຫານ:

- ທ່ານ ຫງວຽນຮູຍຕັງ: ສອງຝ່າຍໄດ້ເພີ່ມທະວີບັນດາການພົບປະ ລະຫວ່າງການນຳຂັ້ນສູງ 2 ພັກ, 2 ລັດດ້ວຍຫຼາຍຮູບການ, ສົມທົບກັນຢ່າງແໜ້ນແຟ້ນໃນບັນດາບັນຫາທີ່ມີລັກສະນະຍຸດທະສາດ ແລະ ກຳນົດທິດໃຫ້ການພົວພັນ ກໍ່ຄືແກ້ໄຂບັນດາຄວາມຫຍຸ້ງຍາກ, ສິ່ງຍັງຄົງຄ້າງຢ່າງທັນການ. ຮັກສາກົນໄກສົ່ງທູດພິເສດເມື່ອມີຄວາມຈຳເປັນ. ຈັດຕັ້ງບັນດາກອງປະຊຸມສຳມະນາ, ກອງປະຊຸມຫົວເລື່ອງສະເພາະ, ແລກປ່ຽນຂໍ້ມູນຂ່າວສານ, ທິດສະດີ ແລະ ບົດຮຽນພຶດຕິກຳຕົວຈິງໃນການກຳນົດທິດແນວທາງ, ນະໂຍບາຍເປັນປະຈຳ.

- ທ່ານ ຫງວຽນຮູຍຕັງ: ມີຫຼາຍປັດໄຈຕັດສິນເຖິງການພົວພັນລະຫວ່າງ 2 ປະເທດ, ນັ້ນແມ່ນສິ່ງທີ່ຄ້າຍຄືກັນດ້ານປະຫວັດສາດ, ວັດທະນະທຳ, ທັງ 2 ປະເທດມີອຸດດົມຄະຕິປະຕິວັດລວມ, ມີເສັ້ນທາງກໍ່ສ້າງ ແລະ ພັດທະນາລວມ, ມີຄວາມສາມັກຄີ, ນ້ຳໃຈປະຕິວັດຈົ່ງຮັກພັກດີ, ບໍລິສຸດຜຸດຜ່ອງ ລະຫວ່າງ 2 ພັກ. 2 ຝ່າຍໄດ້ສຳເລັດກິດຈະກຳຮຽບຮຽງປື້ມປະຫວັດສາດແຫ່ງສາຍພົວພັນແບບພິເສດ ຫວຽດນາມ - ລາວ (1930 – 2007). ນີ້ແມ່ນກິດຈະກຳທີ່ມີຄວາມໝາຍອັນໃຫຍ່ຫຼວງ, ເລິກເຊິ່ງກ່ຽວກັບປະຫວັດສາດ, ວິທະຍາສາດ, ການເມືອງ, ກອງທັບ ແລະ ສັງຄົມ, ສ່ອງແສງຢ່າງຊື່ຕົງ ແລະ ມີຊີວິດຊີວາກ່ຽວກັບການພົວພັນ ຫວຽດນາມ - ລາວ, ມີຄຸນຄ່າໃນວຽກງານໂຄສະນາ, ສຶກສາ ກ່ຽວກັບຄວາມຮັບຮູ້ດ້ານການເມືອງເພື່ອໃຫ້ລຸ້ນຫຼັງ ແລະ ເພື່ອນມິດສາກົນເຂົ້າໃຈແຈ້ງກ່ວາກ່ຽວກັບການພົວພັນສາມັກຄີແບບພິເສດນີ້.

- ທ່ານ ຫງວຽນຮູຍຕັງ: ເພື່ອເສີມຂະຫຍາຍບັນດາປັດໄຈສຳຄັນໃນການພົວພັນ ຫວຽດນາມ - ລາວ, 2 ຝ່າຍຕ້ອງເພີ່ມທະວີການຮ່ວມມືໃຫ້ມີຄວາມແທດຈິງ, ເລິກເຊິ່ງ, ເສີມຂະຫຍາຍທ່າສະດວກໃຫ້ກັນ, ແລກປ່ຽນ, ແບ່ງປັນບົດຮຽນໃນການພັດທະນາ, ເພີ່ມທະວີການສຶກສາດ້ານການເມືອງ, ແນວຄິດ, ພິເສດແມ່ນການໂຄສະນາ, ສຶກສາໃຫ້ລຸ້ນໜຸ່ມ 2 ປະເທດ. ຮັກສາວຽກງານສຶກສາດ້ານແນວຄິດການເມືອງເປັນປະຈຳເພື່ອໃຫ້ທົ່ວພັກ, ທົ່ວປວງຊົນ, ພິເສດແມ່ນລຸ້ນໜຸ່ມ 2 ປະເທດ ມີຄວາມເຂົ້າໃຈແຈ້ງກ່ວາກ່ຽວກັບຄວາມໝາຍ ແລະ ຄວາມຈຳເປັນຕ້ອງເພີ່ມທະວີການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດລະຫວ່າງ 2 ພັກ, 2 ລັດ. ສົມທົບບັນດາຮູບແບບຕໍ່ສູ້ຢ່າງເໝາະສົມເພື່ອຕ້ານຄືນບັນດາຖ້ອຍທຳນອງ, ເສກສັນປັ້ນແຕ່ງ, ແບ່ງແຍກການພົວພັນລະຫວ່າງ 2 ພັກ, 2 ລັດ.

------- ------

ພ້ອມກັບການພົວພັນດ້ານການເມືອງອັນດີງາມນັ້ນ. ໃນຊຸມປີຜ່ານມາ, ການພົວພັນດ້ານເສດຖະກິດ ການຄ້າ ແລະ ການລົງທຶນລະຫວ່າງສອງປະເທດກໍ່ນັບມື້ນັບພັດທະນາ, ໃນເບື້ອງຕົ້ນໄດ້ສ້າງເປັນພື້ນຖານດ້ານວັດຖຸເພື່ອເພີ່ມທະວີການຮ່ວມສຳພັນ ແລະ ປັບປຸງສາຍພົວພັນແບບພິເສດ ຫວຽດນາມ - ລາວ. ສອງຝ່າຍໄດ້ລົງນາມໃນສັນຍາການຄ້າສອງຝ່າຍສະບັບໃໝ່; ເຊັນສັນຍາການຄ້າຊາຍແດນ, ຜັນຂະຫຍາຍກົນໄກ “ປະຕູດຽວ, ຢຸດເທື່ອດຽວ“ ຢູ່ຄູ່ດ່ານຊາຍແດນສາກົນ ລາວບາວ - ແດນສະຫວັນ. ຍ້ອນມີບັນດານະໂຍບາຍບຸລິມາສິດ, ພິເສດ ທີ່ເໝາະສົມຂອງທັງສອງຝ່າຍ, ວົງເງິນການຄ້າ ຫວຽດນາມ - ລາວຈຶ່ງໄດ້ຮັບການເຕີບໂຕຢ່າງສະໝ່ຳສະເໝີໃນຊຸມປີຫວ່າງແລ້ວນີ້. ເຊີນທ່ານຮັບຟັງບົດສາລະຄະດີຂອງນັກຂ່າວ ຢ້ຽວຮົ່ງ.

-----------------

ໄລ່ສະເພາະ 9 ເດືອນຕົ້ນປີ 2016, ວົງເງິນການຄ້າສອງສົ້ນ ຫວຽດນາມ - ລາວ ບັນລຸໄດ້ເກືອບ 591,5 ລ້ານ USD. ມາຮອດປະຈຸບັນ, ມີ 266 ໂຄງການໄດ້ຮັບໜັງສືອະນຸຍາດໃຫ້ລົງທຶນ ດ້ວຍຈຳນວນທຶນປະມານ 5,5 ຕື້ USD. ມີຫຼາຍໂຄງການລົງທຶນໄດ້ເສີມຂະຫຍາຍປະສິດທິຜົນ, ຜະລິດດຳເນີນທຸລະກິດມີກຳໄລ, ປະກອບສ່ວນຢ່າງຕັ້ງໜ້າເຂົ້າໃນພາລະກິດພັດທະນາຂອງສອງປະເທດ, ສ້າງວຽກເຮັດງານທຳ ແລະ ປະຕິບັດວຽກງານຮັບປະກັນຊີວິດສັງຄົມຢູ່ລາວເປັນຢ່າງດີ. ມີບາງໂຄງການລົງທຶນຂອງບັນດາວິສາຫະກິດ ຫວຽດນາມ ຢູ່ລາວ ພວມໄດ້ຮັບການຜັນຂະຫຍາຍຢ່າງໄວ, ແລະ ໄດ້ມີປະສິດທິຜົນຕັ້ງໜ້າໃນເບື້ອງຕົ້ນຄື: ກຸ່ມບໍລິສັດ ຮ່ວາງແອງ - ຢາລາຍ; ບັນດາທະນາຄານຂອງ ຫວຽດນາມ ສາຂາຢູ່ ລາວ; ໂຄງການໂທລະຄົມຂອງກຸ່ມບໍລິສັດ Viettel…ໃນນັ້ນພົ້ນເດັ່ນແມ່ນທະນາຄານ Sacombank ສາຂາຢູ່ລາວ. ທ່ານຟ້າມກວາງຟູ໋, ຜູ້ອຳນວຍການໃຫຍ່ Sacombank ສາຂາຢູ່ລາວ, ໃຫ້ຮູ້ວ່າ

“Sacombank ສາຂາຢູ່ລາວ ໄດ້ຮັບການສ້າງຕັ້ງເມື່ອວັນທີ 12/12/2008, ວັນທີ 03/08/2015 Sacombank ໄດ້ດຳເນີນການຍົກລະດັບສາຂາຢູ່ລາວ ໃຫ້ກາຍເປັນທະນາຄານລູກຖືຫຸ້ນ 100%. ຜ່ານການເຄື່ອນໄຫວມາເປັນເວລາ 8 ປີ, Sacombank ລາວ ໄດ້ມີບັນດາບາດກ້າວເຕີບໂຕພໍສົມຄວນ, ນັບມື້ນັບຢືນຢັນອິດທິພົນຊື່ສຽງ, ເຊື່ອມໂຍງເຂົ້າກັບລະດັບການພັດທະນາເສດຖະກິດຂອງລາວ ຜ່ານການສະໜອງບັນດາ ມາດຕະການແກ້ໄຂດ້ານການເງິນຢ່າງຮອບດ້ານ ແລະ ບັນດາການບໍລິການທະນາຄານ ທັນສະໄໝ ທີ່ສະຫງວນໃຫ້ລູກຄ້າເຊິ່ງແມ່ນວິສາຫະກິດ, ປະຊາຊົນທຸກຊັ້ນຄົນຢູ່ທ້ອງຖິ່ນ ກໍຄື ວົງການຊາວຫວຽດນາມອາໄສຢູ່ລາວ ແລະ ບັນດາວິສາຫະກິດຫວຽດນາມ ທີ່ມີການລົງທຶນດຳເນີນທຸລະກິດຢູ່ລາວ”.

ແຫຼ່ງທຶນ FDI ຂອງ ຫວຽດນາມ ທີ່ລົງທຶນເຂົ້າລາວໄດ້ເພີ່ມຂຶ້ນຢ່າງຕໍ່ເນື່ອງໃນໄລຍະ 2011-2015 ນັບທັງຈຳນວນໂຄງການ ແລະ ຍອດຈຳນວນທຶນຈົດທະບຽນ. ປະຈຸບັນ ລາວຢືນອັນດັບທີໜຶ່ງໃນຈຳນວນ 64 ປະເທດ ແລະ ເຂດແຄວ້ນມີການເຄື່ອນໄຫວລົງທຶນຂອງວິສາຫະກິດ ຫວຽດນາມ; ການເຄື່ອນໄຫວລົງທຶນຂອງວິສາຫະກິດ ຫວຽດນາມ ໄດ້ຂະຫຍາຍໄປທົ່ວ 16/18 ແຂວງ, ນະຄອນຂອງລາວ. ປະລິຍາເອກ ແບກງອກທັ໋ງ, ພະແນກແຜນການ ແລະ ພັດທະນາ, ມະຫາວິທະຍາໄລ ເສດຖະກິດ ແຫ່ງຊາດ, ໃຫ້ຮູ້ວ່າ:

“ປະຈຸບັນ, ບັນດາຂົງເຂດລົງທຶນຂອງຫວຽດນາມ ຢູ່ລາວ ຕົ້ນຕໍແມ່ນພະລັງງານ, ການບໍລິການ, ພື້ນຖານໂຄງລ່າງ, ກະສິກຳ - ປ່າໄມ້, ຂຸດຄົ້ນບໍ່ແຮ່, ທະນາຄານ… ຫວຽດນາມ ແມ່ນ 1 ໃນບັນດາຄູ່ຮ່ວມມືໃຫຍ່ ມີລະດັບຍຸດທະສາດຂອງລາວ ແລະ ມີກາລະໂອກາດຫຼາຍຢ່າງໃນການພັດທະນາການພົວພັນຮ່ວມມືລະຫວ່າງຫວຽດນາມ - ລາວ. 2 ປະເທດ ມີການພົວພັນດ້ານເສດຖະກິດ ແລະ ການເມືອງພິເສດ. ສະນັ້ນ, ລັດຖະບານລາວ ກໍສະໜັບສະໜູນ ແລະ ໃຫ້ບຸລິມະສິດແກ່ບັນດາວິສາຫະກິດຫວຽດນາມ ກໍ່ມາລົງທຶນ, ດຳເນີນທຸລະກິດຢູ່ລາວທີ່ສຸດ”.

ມີຫຼາຍໂຄງການລົງທຶນເຂົ້າລາວ ດ້ວຍຂອບຂະໜາດໃຫຍ່ຂອງຫວຽດນາມ ໄດ້ເຄື່ອນໄຫວຢ່າງມີປະສິດທິຜົນ, ນຳມາເຊິ່ງຜົນປະໂຫຍດຢ່າງແທດຈິງໃຫ້ແກ່ການພັດທະນາເສດຖະກິດ, ສັງຄົມຂອງລາວ, ປະກອບສ່ວນເພີ່ມລາຍຮັບງົບປະມານໃຫ້ລັດຖະບານລາວ ປະມານ 240 – 260 ລ້ານ USD/ປີ, ສ້າງວຽກເຮັດງານທຳໃຫ້ຜູ້ອອກແຮງງານ 35.000 ຄົນ. ຄາດວ່າ, ໃນປີ 2017, ຕົວເລກນີ້ຈະບັນລຸ 350 – 400 ລ້ານ USD/ປີ, ສ້າງວຽກເຮັດງານທຳໃຫ້ຜູ້ອອກແຮງງານລາວ ປະມານ 45.000 ຄົນ ແລະ ຈະສືບຕໍ່ເພີ່ມຂຶ້ນໃນຊຸມປີຕໍ່ໄປ. ໃນການພົບປະກັບບັນດາວິສາຫະກິດຫວຽດນາມ ລົງທຶນຢູ່ລາວ, ທ່ານນາຍົກລັດຖະມົນຕີລາວ ທອງລຸນ ສີສຸລິດ, ໄດ້ຕີລາຄາສູງບັນດາວິສາຫະກິດຫວຽດນາມ ທີ່ພວມເຄື່ອນໄຫວລົງທຶນຢູ່ລາວ.

ສຽງທ່ານນາຍົກລັດຖະມົນຕີລາວ ທອງລຸນ ສີສຸລິດ

ບັນດາໂຄງການລົງທຶນຂອງວິສາຫະກິດຫວຽດນາມ ຢູ່ລາວ ບໍ່ພຽງແຕ່ແມ່ນການເຄື່ອນໄຫວດ້ານເສດຖະກິດເຊິ່ງ 2 ຝ່າຍຕ່າງມີຜົນປະໂຫຍດເທົ່ານັ້ນ ຫາກຍັງສະແດງໃຫ້ເຫັນວ່າ ພັກ, ລັດ ແລະ ປະຊາຊົນຫວຽດນາມ ປະເທດລາວ ອ້າຍນ້ອງເປັນສຳຄັນ ແລະ ປາດຖະໜາຢາກປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ, ສັງຄົມຂອງປະເທດລາວ ອີກດ້ວຍ. ປະກອບສ່ວນສຳຄັນເຂົ້າໃນການປັບປຸງ ແລະ ພັດທະນາສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງຫວຽດນາມ - ລາວ ຢ່າງບໍ່ຢຸດຢັ້ງ.

-------------

ນີ້ແມ່ນການເຄື່ອນໄຫວລົງທຶນຂອງຫວຽດນາມ ຢູ່ລາວ. ເຖິງຢ່າງໃດກໍ່ຕາມ, ການລົງທຶນຂອງບັນດາວິສາຫະກິດ ລາວ ຢູ່ ຫວຽດນາມ ຍັງບໍ່ທັນເໝາະສົມກັບສາຍພົວພັນແບບພິເສດ ຫວຽດນາມ - ລາວ ໄດ້ເທື່ອ. ການຢ້ຽມຢາມ ສປປ ລາວ ຄັ້ງນີ້ຂອງທ່ານ ເລຂາທິການໃຫຍ່ ຄະນະບໍລິຫານງານສູນກາງພັກ ກອມມູນິດ ຫວຽດນາມ ຫງວຽນຟູ໋ຈ້ອງ ຈະປະກອບສ່ວນຊຸກຍູ້ການພົວພັນລົງທຶນຂອງທັງສອງຝ່າຍກວ່າອີກຢ່າງແນ່ນອນ.

ຄຽງຂ້າງບັນດາຜົນງານດ້ານການເມືອງ, ການຮ່ວມມືດ້ານເສດຖະກິດ, ການຄ້າ ແລະ ການລົງທຶນແລ້ວ, ຍັງມີຂົງເຂດໜຶ່ງອີກໄດ້ຮັບຄວາມເອົາໃຈໃສ່ເປັນພິເສດຈາກສອງລັດ, ນັ້ນແມ່ນການພົວພັນຕ່າງປະເທດປະຊາຊົນ. ໃນຊຸມປີຜ່ານມາ, ສະມາຄົມມິດຕະພາບ ຫວຽດນາມ - ລາວ; ລາວ - ຫວຽດນາມທຸກຂັ້ນໄດ້ປະສານສົມທົບກັບຄະນະກຳມະການແນວໂຮມປະເທດຊາດ ຫວຽດນາມ ແລະ ບັນດາອົງການຈັດຕັ້ງສະມາຊິກທຸກຂັ້ນຈັດຕັ້ງການເຄື່ອນໄຫວແລກປ່ຽນຫຼາຍຢ່າງເຊັ່ນ: ງານພົບປະແລກປ່ຽນມິດຕະພາບທີ່ເປັນມູນເຊື້ອລະຫວ່າງຄະນະພົວພັນຕ່າງປະເທດ ຫວຽດນາມ - ລາວ; ງານພົບປະປະຈຳປີຂອງພະນັກງານການທູດຍິງ ຫວຽດນາມ - ລາວ, ງານພົບປະແລກປ່ຽນນາຍທະຫານໜຸ່ມ ຫວຽດນາມ - ລາວ; ງານພົບປະແລກປ່ຽນວັດທະນະທຳ, ອາຫານການກິນ ຫວຽດນາມ - ລາວ; ຕ້ອນຮັບນັກສຶກສາ ລາວ ມາຢູ່ໃນເຮືອນຂອງຊາວ ຫວຽດນາມ… ເພື່ອແນໃສ່ເພີ່ມທະວີການໂຄສະນາ, ຂົນຂວາຍ, ເຕົ້າໂຮມ, ສ້າງຄວາມສາມັກຄີໃນໝູ່ຊາວຫວຽດນາມ ຢູ່ຕ່າງປະເທດໃນສະພາບການໃໝ່; ປຸກລະດົມນ້ຳໃຈຮັກຊາດ, ຄວາມເອກອ້າງທະນົງໃຈຕໍ່ປະເທດຊາດ, ຮັກສາ ແລະ ເສີມຂະຫຍາຍມູນເຊື້ອ, ສີສັນວັດທະນະທຳຂອງຊາດໃນປະຊາຄົມຊາວ ຫວຽດນາມ ຢູ່ຕ່າງປະເທດ; ສົ່ງເສີມການລົງທຶນພັດທະນາເສດຖະກິດ, ດຶງດູດພູມປັນຍາ, ເສດຖະກິດ, ເຂົ້າຮ່ວມບັນດາລາຍການຮັບປະກັນຊີວິດສັງຄົມຢູ່ທ້ອງຖີ່ນ. ບົດສາລະຄະດີຂອງນັກຂ່າວ ຕວຽດມາຍ.

--------------

ທີ່ທ່ານຫາກໍ່ຮັບຟັງຜ່ານໄປແລ້ວນັ້ນແມ່ນລາຍການສິລະປະໃນງານມາໂຫລານທຳນອງເພງແຫ່ງສັນຕິພາບ, ມິດຕະພາບ 2016 ໂດຍສະມາຄົມມິດຕະພາບ ຫວຽດນາມ - ລາວ ນະຄອນ ຮ່າໂນ້ຍ ຈັດຕັ້ງຫວ່າງແລ້ວນີ້. ເຂົ້າຮ່ວມງານມະໂຫລານຄັ້ງນີ້ມີ 10 ຫົວໜ່ວຍດ້ວຍ 20 ບົດເພງ, ວາດຟ້ອນມ່ວນທີ່ສຸດຊຶ່ງໄດ້ຮັບການເລືອກເຟັ້ນຈາກຫົວໜ່ວຍເຫຼົ່ານັ້ນ. ທ່ານ ດ່ວານມີງເຈົາ, ປະທານສະມາຄົມມິດຕະພາບ ຫວຽດນາມ - ລາວ ນະຄອນ ຮ່າໂນ້ຍ, ໃຫ້ຮູ້ວ່າ:

“ສະມາຄົມມິດຕະພາບ ຫວຽດນາມ - ລາວ ຮ່າໂນ້ຍໄດ້ຮັບການສ້າງຕັ້ງເມື່ອປີ 1984, ດ້ວຍການເຄື່ອນໄຫວຕົ້ນຕໍ່ແມ່ນວຽກງານພົວພັນຕ່າງປະເທດປະຊາຊົນ. ພິເສດ, ດ້ວຍການເຄື່ອນໄຫວແມ່ນການສຶກສາໃຫ້ລຸ້ນໜຸ່ມກ່ຽວກັບການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດລະຫວ່າງສອງຊາດ ຫວຽດນາມ - ລາວ”.

ສະມາຄົມມິດຕະພາບ ຫວຽດນາມ -ລາວ ນະຄອນ ຮ່າໂນ້ຍ ແມ່ນໜ່ຶ່ງໃນບັນດາສະມາຄົມສະມາຊິກຕັ້ງໜ້າທີ່ສຸດຂອງສູນກາງສະມາຄົມມິດຕະພາບ ຫວຽດນາມ - ລາວ. ສູນກາງສະມາຄົມມິດຕະພາບ ຫວຽດນາມ - ລາວ ໄດ້ຮັບການສ້າງຕັ້ງເມື່ອວັນທີ 15/1/1975. ມາຮອດປະຈຸບັນໄດ້ມີສະມາຄົມສັງກັດ 40 ແຫ່ງດ້ວຍສະມາຊິກນັບໝື່ນຄົນ, ເຊິ່ງແມ່ນບັນດາອະດີດນັກຊ່ຽວຊານ, ອະດີດທະຫານອາສາສະໝັກ, ນັກຮຽນ, ນັກສຶກສາ ແລະ ປະຊາຊົນທຸກຊັ້ນວັນນະ. ໃນຕະຫຼອດ 41 ປີຜ່ານມາ, ສະມາຄົມມິດຕະພາບ ຫວຽດນາມ -ລາວ ທຸກຂັ້ນ, ແຕ່ຂັ້ນສູນກາງ ລົງຮອດທ້ອງຖິ່ນໄດ້ຈັດຕັ້ງການເຄື່ອນໄຫວຫຼາຍຢ່າງ ດ້ວຍຫຼາຍຮູບຫຼາຍແບບ, ແລະອຸດົມສົມບູນ, ພິເສດແມ່ນການເຄື່ອນໄຫວສຶກສາ, ວັດທະນະທຳ, ອັນໄດ້ປະກອບສ່ວນສຳຄັນເຂົ້າໃນການປັບປຸງ ແລະ ເພີ່ມທະວີການພົວພັນມິດຕະພາບ ຫວຽດນາມ - ລາວ. ທ່ານຕະມີງເຈົາ, ອະດີດຮອງຫົວໜ້າຄະນະປະຈຳຄະນະພົວພັນຕ່າງປະເທດສູນກາງພັກ, ອະດີດເອກອັກຄະລັດຖະທູດ ຫວຽດນາມ ປະຈຳລາວ, ຮອງປະທານສູນກາງສະມາຄົມມິດຕະພາບ ຫວຽດນາມ -ລາວ, ໃຫ້ຮູ້ວ່າ:

“ໃນຊຸມປີຜ່ານມາ, ສູນກາງສະມາຄົມມິດຕະພາບ ຫວຽດນາມ -ລາວ ໄດ້ມີການເຄື່ອນໄຫວຫຼາຍຢ່າງກ່ຽວຂ້ອງເຖິງບັນດາເຫດການໃຫຍ່ຂອງປະເທດລາວຄື: ໃນໂອກາດວັນຊາດລາວ (2/12) ພວກຂ້າພະເຈົ້າເຄີຍຈັດຕັ້ງງານໂຮມຊຸມນຸມຢູ່ຂັ້ນສູນກາງ ແລະ ທ້ອງຖິ່ນ, ຈັດຕັ້ງການພົບປະກັບນັກສຶກສາ ລາວ ທີ່ພວມຮ່ຳຮຽນຢູ່ ຫວຽດນາມ, ຈັດຕັ້ງການເຄື່ອນໄຫວໃຫ້ພະນັກງານ, ພາລະກອນສະຖານທູດລາວປະຈຳ ຫວຽດນາມໄປຢ້ຽມຢາມປູຊະນີຍະສະຖານປະຫວັດສາດ, ບ່ອນທີ່ບັນດາສະຫາຍການນຳລາວ ເຄີຍເຄື່ອນໄຫວປະຕິວັດຢູ່ ຫວຽດນາມຄື: ແຂວງຕວຽນກວາງ, ຟູ໋ເທາະ.”

ພິເສດ, ປີ 2017, ຫວຽດນາມ ແລະ ລາວຈະພ້ອມກັນສະເຫຼີມສະຫຼອງ 55 ປີແຫ່ງວັນສ້າງຕັ້ງການພົວພັນທາງການທູດ ຫວຽດນາມ - ລາວ (5/9/1962 – 5/9/2017) ແລະ 40 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື (18/7/1977 – 18/7/2017). ນີ້ແມ່ນໂອກາດເພື່ອໃຫ້ສູນກາງສະມາຄົມມິດຕະພາບ ຫວຽດນາມ -ລາວ, ລາວ - ຫວຽດນາມ ສືບຕໍ່ຈັດຕັ້ງການເຄື່ອນໄຫວເລິກເຊິ່ງ, ກ້ວາງຂວາງຫຼາຍຢ່າງໃນໝູ່ປະຊາຊົນທຸກຊັ້ນວັນນະ. ທ່ານ ຕະມີງເຈົາ, ໃຫ້ຮູ້ວ່າ:

“ພວກຂ້າພະເຈົ້າຈະຜັນຂະຫຍາຍການເຄື່ອນໄຫວສຶກສາມູນເຊື້ອແຫ່ງການພົວພັນມິດຕະພາບໃຫ້ແກ່ປະຊາຊົນ 2 ປະເທດ, ພິເສດແມ່ນໃຫ້ລຸ້ນໜຸ່ມສອງປະເທດ. ພວກຂ້າພະເຈົ້າຈະສົມທົບກັບສູນກາງສະມາຄົມມິດຕະພາບ ລາວ - ຫວຽດນາມ ຈັດຕັ້ງການເຄື່ອນໄຫວພົບປະແລກປ່ຽນໃນທົ່ວປະເທດ, ນຳມາເຊິ່ງປະສິດທິຜົນແທດຈິງຄື: ລາຍການແລກປຽນສິລະປະ, ລາຍການໂທລະພາບຖ່າຍທອດສົດຢູ່ບັນດາປູຊະນີຍະສະຖານປະຫວັດສາດ, ພິມຈຳໜ່າຍປື້ມກ່ຽວກັບສາຍພົວພັນລະຫວ່າງ 2 ປະເທດ ເພື່ອໂຄສະນາ, ສຶກສາມູນເຊື້ອໃຫ້ລຸ້ນໜຸ່ມ, ຈັດຕັ້ງການພົບປະ, ແລກປ່ຽນຄະນະຜູ້ແທນຂັ້ນສູງສູນກາງສະມາຄົມມິດຕະພາບຫວຽດນາມ - ລາວເພື່ອແລກປ່ຽນບົດຮຽນ, ຂໍ້ມູນຂ່າວ, ພິຈາລະນາບັນດາມາດຕະການແນໃສ່ເພີ່ມທະວີການເຄື່ອນໄຫວພົວພັນຕ່າງປະເທດປະຊາຊົນ, ເພີ່ມທະວີຄວາມສາມັກຄີລະຫວ່າງ 2 ປະເທດ.”

ດ້ວຍບັນດາການເຄື່ອນໄຫວໃນປີ 2017, ສູນກາງສະມາຄົມມິດຕະພາບ ຫວຽດນາມ -ລາວ ແລະ ສູນກາງສະມາຄົມມິດຕະພາບ ລາວ - ຫວຽດນາມ ຈະປະກອບສ່ວນຫຼາຍກ່ວາອີກເຂົ້າໃນການພົວພັນມິດຕະພາບທີ່ເປັນມູນເຊື້ອຂອງ 2 ປະເທດ.

-----------

ຫວນຄືນຊຸມປີທີ່ຜ່ານມາກໍ່ເຫັນວ່າການພົວພັນ ຫວຽດນາມ - ລາວໃນບັນດາຂົງເຂດ: ການເມືອງ, ເສດຖະກິດ, ການພົວພັນປະຊາຊົນໄດ້ມີບາດກ້າວພັດທະນາຕັ້ງໜ້າ, ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບແບບພິເສດຫວຽດນາມ - ລາວ ໃຫ້ນັບມື້ນັບເກີດດອກອອກຜົນຢ່າງບໍ່ຢຸດຢັ້ງ.

ໃນການຢ້ຽມຢາມສັນທະວະໄມຕີ ສປປ ລາວ ຢ່າງເປັນທາງການຂອງທ່ານ ເລຂາທິການໃຫຍ່ ຫງວຽນຟູ໋ຈ້ອງ, ສອງຝ່າຍແລກປ່ຽນແຜນນະໂຍບາຍ, ກຳນົດທິດທາງ ແລະ ບັນດາເນື້ອໃນຮ່ວມມື, ມາດຕະການໃຫຍ່ ເພື່ອແນໃສ່ຍົກສູງຄຸນນະພາບ, ປະສິດທິຜົນການຮ່ວມມື ຫວຽດນາມ - ລາວໄລຍະ 2016 – 2020 ໃນບັນດາຂົງເຂດການເມືອງ, ການທູດ, ການປ້ອງກັນຊາດ, ປ້ອງກັນຄວາມສະຫງົບ, ເສດຖະກິດ, ວັດທະນະທຳ, ການສຶກສາ, ວິທະຍາສາດເຕັກນິກ ແລະ ການຮ່ວມມືລະຫວ່າງບັນດາກະຊວງ, ຂະແໜງການ, ທ້ອງຖີ່ນຂອງສອງປະເທດ.

ການຢ້ຽມຢາມສັນທະວະໄມຕີ ສປປ ລາວ ຢ່າງເປັນທາງການຂອງທ່ານ ເລຂາທິການໃຫຍ່ ຫງວຽນຟູ໋ຈ້ອງ, ເປັນການຢັ້ງຢືນແນວທາງ, ແຜນນະໂຍບາຍສະເໝີຕົ້ນສະເໝີປາຍຂອງ ຫວຽດນາມ ໃນການພົວພັນກັບ ລາວ; ສຸມໃສ່ປັບປຸງ, ເພີ່ມທະວີການພົວພັນສາມັກຄີແບບພິເສດ, ສະໜິດຕິດພັນ, ໄວ້ເນື້ອເຊື່ອໃຈ ແລະ ຮ່ວມມືຢ່າງຮອບດ້ານ ຫວຽດນາມ - ລາວ ໃນໄລຍະພັດທະນາໃໝ່ຂອງແຕ່ລະພັກ, ແຕ່ລະປະເທດ; ຢືນຢັນເຖິງການສະໜັບສະໜູນຢ່າງແຮງ ແລະ ຮອບດ້ານຂອງ ຫວຽດນາມ ຕໍ່ພາລະກິດປ່ຽນໃໝ່, ປົກປັກຮັກສາ ແລະ ສ້າງສາປະເທດລາວ. ການຢ້ຽມຢາມແມ່ນຂີດໝາຍສຳຄັນໃນການເພີ່ມທະວີການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ຫວຽດນາມ - ລາວ, ສືບຕໍ່ໄຂໄລຍະໃໝ່, ທີ່ຂະຫຍັນຂັນເເຄື່ອນ, ມີປະສິດທິຜົນ ແລະ ແທດຈິງ.