ວິສາຫະກິດຫວຽດນາມມີບົດບາດສຳຄັນໃນການເຊື່ອມໂຍງເຂົ້າກັບສາກົນ
ພາບປະກອບ
(vovworld) - ຫວຽດນາມ ພວມເຊື່ອມໂຍງເຂົ້າກັບສາກົນຢ່າງແຮງ. ຄຽງຂ້າງການປະຕິຮູບລະບອບແຫ່ງລັດ, ບັນດາວິສາຫະກິດກໍ່ຕ້ອງມະນາພະຍາຍາມ, ຍົກສູງກຳລັງແກ່ງແຍ້ງຂອງຕົນ. ນີ້ກໍ່ແມ່ນເນື້ອໃນໂດຍບັນດາຜູ້ແທນສຸມໃສ່ປຶກສາຫາລືທີ່ກອງປະຊຸມສຳມະນາ “ບົດບາດຂອງວິສາຫະກິດໃນການຍົກສູງຄວາມສາມາດແກ່ງແຍ້ງແຫ່ງຊາດໃນການເຊື່ອມໂຍງເຂົ້າກັບສາກົນ”, ໂດຍກະຊວງການຕ່າງປະເທດ ຫວຽດນາມ ສົມທົບກັບຫ້ອງການການຄ້າ ອຸດສາຫະກຳ ຫວຽດນາມ, ກະຊວງແຜນການ ແລະ ການລົງທຶນ, ຈັດຕັ້ງໃນຕອນເຊົ້າວັນທີ 28/11 ຢູ່ຮ່າໂນ້ຍ. ບັນດາຄຳເຫັນຂອງຜູ້ແທນທີ່ກອງປະຊຸມສຳມະນາລ້ວນແຕ່ເຫັນດີເປັນເອກະພາບຖືວ່າ: ວິວັດທະນາການເຊື່ອມໂຍງເຂົ້າກັບສາກົນຂອງ ຫວຽດນາມ ພວມກ້າວເຂົ້າສູ່ໄລຍະໃໝ່ຢ່າງເລິກເຊິ່ງ, ກ້ວາງຂວາງກ່ວາອີກ. ປີ 2015, ປະຊາຄົມ ອາຊຽນ ຈະເຄື່ອນໄຫວຢ່າງເປັນທາງການ. ຫວຽດນາມ ພວມກະກຽມສິ້ນສຸດການເຈລະຈາບັນດາຂໍ້ຕົກລົງການຄ້າເສລີ (FTA) ກັບບັນດາຄູ່ຮ່ວມມືຫຼັກແຫຼ່ງຄື: ອີຢູ, ສ.ເກົາຫຼີ, ສຳພັນທະມິດພາສີ ລັດເຊຍ - ເບລາຣຸດ - ກາຢັກສະຖານ, ພ້ອມທັງມານະພະຍາຍາມຊຸກຍູ້ການເຈລະຈາສັນຍາການຄ້າຂ້າມ ປາຊີຟິກ (TPP) ແລະ ຄູ່ຮ່ວມມືເສດຖະກິດຮອບດ້ານເຂດ ອາຊີຕາເວັນອອກ (FCEP). ທ່ານລັດຖະມົນຕີວ່າການກະຊວງການຕ່າງປະເທດ ບຸ່ຍແທງເຊີນ, ເນັ້ນໜັກທີ່ກອງປະຊຸມສຳມະນາວ່າ:
“ຮັບຮູ້ສິ່ງດັ່ງກ່າວຢ່າງຈະແຈ້ງ, ລັດຖະບານ ຫວຽດນາມ ກຳນົດວ່າການປັບປຸງສະພາບແວດລ້ອມແຫ່ງການດຳເນີນທຸລະກິດ ແລະ ຍົກສູງງຄວາມສາມາດແກ່ງແຍ້ງແມ່ນໜ້າທີ່ຈຸດສຸມຢ່າງສະເໝີຕົ້ນສະເໝີປາຍ, ຢ່າງຕໍ່ເນື່ອງ ແລະ ເປັນປະຈຳໃນຍຸດທະສາດພັດທະນາເສດຖະກິດສັງຄົມ. ຄຽງຄູ່ກັບການປ່ຽນໃໝ່ຮູບແບບການເຕີບໂຕ, ສ້າງໂຄງປະກອບພື້ນຖານເສດຖະກິດ ແລະ ປັບປຸງບັນດາພື້ນຖານ ໃຫ້ແກ່ການພັດທະນາຢ່າງຍາວນານ ຄືຫັນພື້ນຖານໂຄງລ່າງເປັນທັນສະໄໝ ແລະ ຍົກສູງຄຸນນະພາບແຫຼ່ງຊັບພະຍາກອນມະນຸດ, ຫວຽດນາມ ພວມຜັນຂະຫຍາຍ ມາດຕະການປັບປຸງສະພາບແວດລ້ອມແຫ່ງການດຳເນີນທຸລະກິດ ແລະ ຍົກສູງກຳລັງຄວາມສາມາດຄວາມແກ່ງແຍ້ງຢ່າງເດັດຂາດ ແລະ ຄົບຊຸດ. ”