ສະພາເລືອກຕັ້ງແຫ່ງຊາດຈັດວາລະປະຊຸມຄັ້ງທີ3
ທ່ານ ຫງວຽນຊິງຮູ່ງ ເປັນປະທານວາລະປະຊຸມ
(ພາບ: PHẠM KIÊN /TTXVN)
|
(vovworld) – ວາລະປະຊຸມຄັ້ງທີ 3 ຖືກຈັດຕັ້ງໃນຕອນບ່າຍວັນທີ 3/3, ພາຍໃຕ້ການເປັນປະທານຂອງທ່ານປະທານສະພາແຫ່ງຊາດ ຫງວຽນຊິງຮູ່ງ, ປະທານສະພາເລືອກຕັ້ງແຫ່ງຊາດ. ວາລະປະຊຸມເພື່ອແນໃສ່ຕີລາຄາຄວາມຄືບໜ້າໃນການຜັນຂະຫຍາຍວຽກງານກະກຽມການເລືອກຕັ້ງຮອດຈຸດເວລານີ້ ແລະ ພິເສດແມ່ນຮັບຮອງເອົາມະຕິຂອງສະພາເລືອກຕັ້ງແຫ່ງຊາດກ່ຽວກັບຈຳນວນຫົວໜ່ວຍເລືອກຕັ້ງ, ບັນຊີລາຍຊື່ບັນດາຫົວໜ່ວຍເລືອກຕັ້ງ ແລະ ຈຳນວນສະມາຊິກສະພາແຫ່ງຊາດທີ່ຮັບການເລືອກຕັ້ງຢູ່ແຕ່ລະຫົວໜ່ວຍເລືອກຕັ້ງໃນທົ່ວປະເທດເພື່ອພິມຈຳໜ່າຍພາຍຫຼັງວາລະປະຊຸມ. ສະພາກໍຮັບຮອງເອົາມະຕິກ່ຽວກັບຫຼັກການຈັດແບ່ງຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຢູ່ສູນກາງລົງສະໝັກຮັບເລືອກຕັ້ງຢູ່ທ້ອງຖິ່ນ.
ກ່າວຄຳເຫັນທີ່ກອງປະຊຸມ, ທ່ານປະທານສະພາແຫ່ງຊາດ ຫງວຽນຊິງຮູ່ງ, ປະທານສະພາເລືອກຕັ້ງແຫ່ງຊາດ, ຮັບຮູ້ ແລະ ຕີລາຄາສູງຄວາມຄືບໜ້າໃນການຜັນຂະຫຍາຍວຽກງານກະກຽມໃຫ້ແກ່ການເລືອກຕັ້ງຂອງລະບົບບັນດາອົງການກ່ຽວຂ້ອງ, ພິເສດແມ່ນການເສີມຂະຫຍາຍບົດບາດຂອງແນວໂຮມປະເທດຊາດ ຫວຽດນາມ ແລະ ບັນດາອະນຸກຳມະການ, ສະມາຊິກຂອງສະພາເລືອກຕັ້ງ. ທ່ານປະທານສະພາແຫ່ງຊາດ ຫງວຽນຊິງຮູ່ງ ໃສ່ໃຈວ່າ: ການເລືອກຕັ້ງຈະດຳເນີນໃນວັນທີ 22/5/2016, ດັ່ງນັ້ນແນວໂຮມປະເທດຊາດ ຫວຽດນາມ ແລະ ບັນດາອົງການສະມາຊິກ, ກຳລັງປະກອບອາວຸດ ຄວນປະກາດໃຊ້ມະຕິຊີ້ນຳວຽກງານເລືອກຕັ້ງໃຫ້ລະອຽດໂດຍໄວ, ມີການຈັດແບ່ງໜ້າທີ່ຮັບຜິດຊອບລະອຽດເພື່ອຮັບປະກັນຄວາມຮຽກຮ້ອງຕ້ອງການທີ່ໄດ້ວາງອອກໃນວັນເລືອກຕັ້ງ, ເພື່ອໃຫ້ວັນເລືອກຕັ້ງຖືກດຳເນີນໄປຢ່າງດີງາມ, ເຮັດໃຫ້ວັນເລືອກຕັ້ງສະມາຊິກສະພາແຫ່ງຊາດຊຸດທີ 14 ແລະ ສະມາຊິກສະພາປະຊາຊົນທຸກຂັ້ນອາຍຸການ 2016 – 2021 ກາຍເປັນວັນບຸນໃຫຍ່ຢ່າງແທ້ຈິງ.