ສະພາແຫ່ງຊາດຫວຽດນາມກຽມພ້ອມແບ່ງປັນບົດຮຽນກັບສະພາແຫ່ງຊາດລາວ
ທ່ານເລຂາທິການໃຫຍ່, ປະທານປະເທດ ລາວ ຈູມມາລີ ໄຊຍະສອນ ແລະ ທ່ານປະທານສະພາແຫ່ງຊາດ ຫງວຽນຊິງຮູ່ງ
(ພາບ: Nhan Sáng/TTXVN)
(vovworld) – ສະພາແຫ່ງຊາດ ຫວຽດນາມ ກຽມພ້ອມແບ່ງປັນບົດຮຽນກັບສະພາແຫ່ງຊາດ ລາວ - ທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮູ່ງ ຢັ້ງຢືນຄືດັ່ງກ່າວທີ່ການພົບປະກັບທ່ານເລຂາທິການໃຫຍ່, ປະທານປະເທດ ລາວ ຈູມມາລີ ໄຊຍະສອນ, ໃນຕອນບ່າຍວັນທີ 16/9, ເນື່ອງໃນໂອກາດເຂົ້າຮ່ວມກອງປະຊຸມ AIPA 35, ຢູ່ ລາວ. ທ່ານປະທານສະພາແຫ່ງຊາດ ຫງວຽນຊິງຮູ່ງ ຢືນຢັນວ່າ: ຫວຽດນາມ ຍາມໃດກໍ່ຖືເປັນສຳຄັນ ແລະ ສະຫງວນບຸລິມະສິດຢ່າງສູງໃຫ້ແກ່ການປັບປຸງ ແລະ ເພີ່ມທະວີການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານກັບ ລາວ ໃນນະໂຍບາຍການຕ່າງປະເທດ. ທ່ານປະທານສະພາແຫ່ງຊາດ ສະເໜີໃຫ້ 2 ປະເທດ ສືບຕໍ່ຮັກສາ ແລະ ເພີ່ມທະວີບັນດາການຢ້ຽມຢາມ ແລະ ພົບປະລະຫວ່າງການນຳຂັ້ນສູງກໍ່ຄືແລກປ່ຽນການຮ່ວມມືລະຫວ່າງບັນດາກະຊວງ, ຂະແໜງການ, ທ້ອງຖີ່ນ, ວິສາຫະກິດຂອງ ຫວຽດນາມ ແລະ ລາວ. ທ່ານປະທານສະພາແຫ່ງຊາດ ຫງວຽນຊິງຮູ່ງ ຊີ້ແຈ້ງວ່າ: ຫວຽດນາມ ພ້ອມແລ້ວແບ່ງປັນບົດຮຽນກັບສະພາແຫ່ງຊາດ ລາວ, ພ້ອມທັງຫວັງວ່າ 2 ຝ່າຍເພີ່ມທະວີວຽກງານໂຄສະນາເຜີຍແຜ່, ສຶກສາໃຫ້ປະຊາຊົນທຸກຊັ້ນວັນນະກ່ຽວກັບຄວາມໝາຍຂອງການປັບປຸງ ແລະ ພັດທະນາການພົວພັນແບບພິເສດ ຫວຽດນາມ - ລາວ ໃນສະພາບການໃຫມ່ຢ່າງບໍ່ຢຸດຢັ້ງ.
ທ່ານເລຂາທິການໃຫຍ່, ປະທານປະເທດ ຈູມມາລີ ໄຊຍະສອນ ຂອບອົບຂອບໃຈສະພາແຫ່ງຊາດ ຫວຽດນາມ ໄດ້ສະຫງວນຄວາມຊ່ວຍເຫຼືອອັນລ້ຳຄ່າໃຫ້ແກ່ສະພາແຫ່ງຊາດ ລາວ ໃນການຈັດຕັ້ງ AIPA 35, ພ້ອມທັງເຊື່ອໝັ້ນວ່າ: ການເຂົ້າຮ່ວມຂອງຄະນະຜູ້ແທນສະພາແຫ່ງຊາດ ຫວຽດນາມ ຈະປະກອບສ່ວນເຂົ້າໃນຜົນສຳເລັດຂອງກອງປະຊຸມຄັ້ງນີ້.
ໃນຂອບເຂດການເຂົ້າຮ່ວມກອງປະຊຸມ AIPA 35, ຕອນເຊົ້າວັນທີ 17/9, ທ່ານປະທານສະພາແຫ່ງຊາດ ຫງວຽນຊິງຮູ່ງ ເຮັດວຽກກັບບັນດານັກລົງທຶນ ຫວຽດນາມ ຢູ່ ລາວ. ພາຍຫຼັງໄດ້ຮັບຟັງບັນດາວິສາຫະກິດລາຍງານ, ທ່ານປະທານສະພາແຫ່ງຊາດ ຫງວຽນຊິງຮູ່ງ ຕີລາຄາສູງບັນດາ, ຄວາມມານະພະຍາຍາມຂອງວິສາຫະກິດ ຫວຽດນາມ ລົງທຶນຢູ່ ລາວ.
ທ່ານປະທານສະພາແຫ່ງຊາດ ຫງວຽນຊິງຮູ່ງ ກໍ່ຫວັງວ່າຝ່າຍ ລາວ ສືບຕໍ່ຊ່ວຍເຫຼືອບັນດາວິສາຫະກິດ ຫວຽດນາມ ແກ້ໄຂຄວາມຫຍຸ້ງຍາກເທື່ອລະກ້າວ, ພ້ອມກັນແບ່ງປັນບັນດາຄວາມສະດວກ, ຄວາມຫຍຸ້ງຍາກ. ຜົນສຳເລັດຂອງລາວ ກໍ່ແມ່ນຜົນສຳເລັດຂອງ ຫວຽດນາມ ແລະ ກົງກັນຂ້າມ.