ພາບປະກອບ

ຕອນບ່າຍວັນທີ 17 ມິຖຸນາ, ຢູ່ນະຄອນ ລາວກາຍ, ກົມໃຫຍ່ປ່າໄມ້ - ກະຊວງກະສິກຳ ແລະ ພັດທະນາຊົນນະບົດ ສົມທົບກັບຄະນະກຳມະການປະຊາຊົນແຂວງ ລາວກາຍ ຈັດຕັ້ງພິທີຕອບສະໜອງວັນໂລກປ້ອງກັນ, ຕ້ານການຫັນເປັນທະເລຊາຍ (17/6) ດ້ວຍການເຂົ້າຮ່ວມຂອງຜູ້ຕາງໜ້າຫຼາຍແຂວງ, ນະຄອນໃນທົ່ວປະເທດ.

        ສະຫະປະຊາຊາດ ໄດ້ເລືອກເອົາວັນທີ 17 ມິຖຸນາ ຂອງແຕ່ລະປີ ເປັນວັນໂລກຕ້ານການຫັນເປັນທະເລຊາຍ. ປີ 2018, ເລຂາທິການໃຫຍ່ສົນທິສັນຍາກ່ຽວກັບການຕ້ານການຫັນເປັນທະເລຊາຍ ໄດ້ເລືອກເຟັ້ນເອົາຫົວຂໍ້ “ເລືອກເຟັ້ນຄຸນຄ່າແທ້ຈິງສຳລັບທີ່ດິນ” ເພື່ອໃຫ້ 186 ປະເທດສະມາຊິກຂອງສົນທິສັນຍາປຸກລະດົມແນໃສ່ຕອບສະໜອງວັນໂລກຕ້ານການຫັນເປັນທະເລຊາຍ. ກົມໃຫຍ່ປ່າໄມ້ ໄດ້ຮັບການມອບໝາຍຈາກກະຊວງກະສິກຳ ແລະ ພັດທະນາຊົນນະບົດມອບໜ້າທີ່ເປັນຫົວໜ່ວຍເພື່ອປະຕິບັດສົນທິສັນຍາສະບັບນີ້.

        ຕາມການສະຖິຕິແລ້ວ, ປີ 2017, ຫວຽດນາມ ໄດ້ປູກປ່າໄດ້ກ່ວາ 235.000 ເຮັກຕາ, ບົວລະບັດປ່າທີ່ປູກໄດ້ເກືອບ 530.000 ເຮັກຕາ, ຟື້ນຟູປ່າໄດ້ເກືອບ 335.000 ເຮັກຕາ ແລະ ຄາດວ່າ, ປູກຕົ້ນໄມ້ກະແຈກກະຈາຍໄດ້ກ່ວາ 60.000 ລ້ານຕົ້ນ.

ຍົກສູງບົດບາດຂອງປະຊາຄົມໃນການຄຸ້ມຄອງ ແລະ ນຳໃຊ້ດິນປ່າແບບຍືນຍົງ

       ເພື່ອຕອບສະໜອງວັນສາກົນຕ້ານການຫັນເປັນທະເລຊາຍປີ 2018, ວັນທີ 18 ມິຖຸນາ, ຢູ່ນະຄອນ ລາວກາຍ, ກົມໃຫຍ່ປ່າໄມ້, ກະຊວງກະສິກຳ ແລະ ພັດທະນາຊົນນະບົດ, ພະແນກກະສິກຳ ແລະ ພັດທະນາຊົນນະບົດແຂວງ ລາວກາຍ ສົມທົບກັນຈັດຕັ້ງກອງປະຊຸມສຳມະນາ “ບົດບາດຂອງປະຊາຄົມໃນການຄຸ້ມຄອງ ແລະ ນຳໃຊ້ດິນປ່າ ແບບຍືນຍົງ” ດ້ວຍການເຂົ້າຮ່ວມຂອງຜູ້ຕາງໜ້າບັນດາແຂວງ ອ໋ຽນບ໋າຍ ແລະ ລາຍເຈົາ. ກອງປະຊຸມໄດ້ໄຈ້ແຍກ ແລະ ຍົກອອກບັນດາຂໍ້ສະເໜີແນະເພື່ອແນໃສ່ສະກັດກັ້ນໄພຫັນເປັນທະເລຊາຍຢູ່ ດເຂດໄຕບັກ (ທາງທິດຕາເວັນຕົກສ່ຽງເໜືອ), ເຊິ່ງເປັນໜຶ່ງໃນ 3 ເຂດຈຸດສຸມໃນການຊຸດໂຊມທີ່ດິນຂອງທົ່ວປະເທດ; ພ້ອມທັງ, ເນັ້ນໜັກຄວາມສຳຄັນຂອງການຍົກສູງບົດບາດຂອງປະຊາຄົມໃນການຄຸ້ມຄອງ ແລະ ນຳໃຊ້ດິນປ່າແບບຍືນຍົງກ່ວາອີກ.