(vovworld) - ເນື່ອງໃນໂອກາດເຂົ້າຮ່ວມກອງປະຊຸມພິເສດລັດຖະມົນຕີການຕ່າງປະເທດອາຊຽນ - ຈີນ ຢູ່ນະຄອນອິຊີແຂວງຢວຽນໜານ, ປະເທດຈີນ ໃນລະຫວ່າງວັນທີ 13/06, ທ່ານຮອງນາຍົກລັດຖະມົນຕີ, ທັງເປັນລັດຖະມົນຕີການຕ່າງປະເທດ ຟ້າມບິ່ງມິງ ໄດ້ມີການພົບປະກັບທ່ານລັດຖະມົນຕີການຕ່າງປະເທດຈີນ ຫວາງອີ. ຢູ່ທີ່ນີ້, 2 ຝ່າຍໄດ້ເຫັນດີເປັນເອກະພາບນຳກັນເພີ່ມທະວີການພົວພັນລະຫວ່າງອາຊຽນ ແລະ ຈີນ; ເສີມຂະຫຍາຍຄວາມສາມາດບົ່ມຊ້ອນໃນການຮ່ວມມື, ປະຕິບັດບັນດາໂຄງການດຳເນີນງານ, ແຜນຮ່າງທີ່ໄດ້ວາງອອກ. ທ່ານຮອງນາຍົກລັດຖະມົນຕີ ຟ້າມບິ່ງມິງ ສະເໜີໃຫ້ 2 ຝ່າຍສືບຕໍ່ຮັກສາບັນດາການຢ້ຽມຢາມ ແລະ ພົບປະຂັ້ນສູງ, ຍູ້ແຮງການຮ່ວມມືທີ່ຕ່າງຝ່າຍຕ່າງມີຜົນປະໂຫຍດ, ປະຕິບັດບັນດາຂໍ້ຕົກລົງທີ່ບັນລຸໄດ້ໃນການຢ້ຽມຢາມຄັ້ງຕ່າງໆຂອງການນຳຂັ້ນສູງ 2 ປະເທດ, ຊຸກຍູ້ການຮ່ວມມືດ້ານເສດຖະກິດ, ການຄ້າ ແລະ ເພີ່ມທະວີການພົວພັນຮ່ວມມືລະຫວ່າງ 2 ປະເທດ. ທ່ານຮອງນາຍົກລັດຖະມົນຕີ ສະເໜີໃຫ້ຈີນ ສ້າງເງື່ອນໄຂສະດວກກວ່າໃນການນຳເຂົ້າສິນຄ້າຂອງຫວຽດນາມ, ຍູ້ແຮງຄວາມຄືບໜ້າບັນດາໂຄງການກໍ່ສ້າງພື້ນຖານໂຄງລ່າງທີ່ໄດ້ຕົກລົງກັນໂດຍໄວ…
ທ່ານຮອງນາຍົກລັດຖະມົນຕີ ຟ້າມບິ່ງມິງ ສະແດງຄວາມວິຕົກກັງວົນຂອງຫວຽດນາມ ກ່ຽວກັບບັນດາການຜັນແປທີ່ສັບສົນຢູ່ທະເລຕາເວັນອອກ ໃນໄລຍະຜ່ານມາ; ສະເໜີໃຫ້ 2 ຝ່າຍຕ້ອງປະຕິບັດຕາມຂໍ້ຕົກລົງ ແລະ ຄວາມຮັບຮູ້ລວມສຳຄັນຂອງການນຳຂັ້ນສູງຂອງ 2 ພັກ, 2 ລັດ ກ່ຽວກັບການຄວບຄຸມຄວາມບໍ່ລົງລອຍກັນໃຫ້ເປັນຢ່າງດີ, ບໍ່ມີການກະທຳເຮັດໃຫ້ສະພາບການສັບສົນຂຶ້ນເຕີ່ມ; ຊຸກຍູ້ບັນດາກົນໄກເຈລະຈາກ່ຽວກັບບັນດາບັນຫາຢູ່ທະເລບັນລຸຄວາມຄືບໜ້າ. ທ່ານຮອງນາຍົກລັດຖະມົນຕີສະເໜີໃຫ້ 2 ຝ່າຍພ້ອມກັບອາຊຽນ ປະຕິບັດຖະແຫຼງການກ່ຽວກັບການພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ຢ່າງມີປະສິດທິຜົນ, ສ້າງປະມວນຂໍ້ກຳນົດການປະພຶດຂອງຝ່າຍຕ່າງໆຢູ່ທະເລຕາເວັນອອກ (COC) ໂດຍໄວ, ປະກອບສ່ວນຮັກສາສັນຕິພາບ, ສະຖຽນລະພາບຢູ່ທະເລຕາເວັນອອກ ແລະ ໃນພາກພື້ນ.
ສ່ວນທ່ານລັດຖະມົນຕີການຕ່າງປະເທດຈີນ ຫວາງອີ ໄດ້ເຫັນດີກ່ຽວກັບບັນດາມາດຕະການເພີ່ມທະວີການພົວພັນຮ່ວມມືລະຫວ່າງ 2 ປະເທດ. ກ່ຽວກັບສະພາບການຢູ່ພາກພື້ນ, ທ່ານ ວາງອີ ຖືວ່າ, ຈີນ ແລະ ອາຊຽນ ລ້ວນແຕ່ມີຄວາມຕ້ອງການຮັກສາສັນຕິພາບ, ຮ່ວມມື, ຄວບຄຸມຄວາມບໍ່ລົງລອຍກັນຢູ່ທະເລຕາເວັນອອກ.