(ທ່ານນາງຮອງປະທານສະພາແຫ່ງຊາດ
ຫວຽດນາມ ຫງວຽນທິກີມເງິນ)
(vovworld) – ໂດຍສືບຕໍ່ການຢ້ຽມຢາມ ແລະ ເຮັດວຽກຢູ່ ຍີ່ປຸ່ນ, ວັນທີ 29/8, ກ່າວຄຳເຫັນທີ່ວາລະອັດກອງປະຊຸມ “ສະພາທົ່ວໂລກເພື່ອແມ່ຍິງ”, ທ່ານນາງຮອງປະທານສະພາແຫ່ງຊາດ ຫວຽດນາມ ຫງວຽນທິກີມເງິນ ຖືວ່າ: ນີ້ແມ່ນເຫດການສຳຄັນ ສະແດງໃຫ້ເຫັນຄວາມເອົາໃຈໃສ່ຂອງລັດຖະບານ ຍີ່ປຸ່ນ ສຳລັບການຊຸກຍູ້ແມ່ຍິງເຂົ້າ ຮ່ວມຊີວິດ - ສັງຄົມ ຍີ່ປຸ່ນ ແລະ ໃນໂລກ. ນີ້ກໍແມ່ນໂອກາດ ເພື່ອໃຫ້ບັນດາຜູ້ແທນປຶກສາຫາລື, ພິຈາລະນາ, ຍົກອອກບັນດາຂໍ້ສະເໜີ, ມາດຕະການ ເພື່ອແນໃສ່ປະກອບສ່ວນແກ້ໄຂບັນດາສິ່ງທ້າທາຍໃໝ່ສຳລັບການມອບສິດໃຫ້ແມ່ຍິງ, ມຸ່ງໄປເຖິງການກໍ່ສ້າງສັງຄົມເພື່ອໃຫ້ແມ່ຍິງເສີມຂະຫຍາຍບົດບາດຂອງຕົນຢ່າງແທ້ຈິງ. ທ່ານນາງຮອງປະທານສະພາແຫ່ງຊາດ ຫງວຽນທິກີມເງິນ ໃຫ້ຮູ້ວ່າ: ຫວຽດນາມ ໄດ້ປະກາດໃຊ້ ແລະ ຕັ້ງໜ້າຜັນຂະຫຍາຍຍຸດທະສາດແຫ່ງຊາດກ່ຽວກັບຄວາມສະເໝີພາບລະຫວ່າງຍິງ - ຊາຍໃນໄລຍະ 2011 – 2020 ແລະ ວາງອອກບັນດາຄາດໝາຍແຫ່ງຊາດກ່ຽວກັບຄວາມສະເໝີພາບລະຫວ່າງຍິງ - ຊາຍ, ເພີ່ມທະວີບັນດາການເຄື່ອນໄຫວຮ່ວມມືກັບສາກົນທັງ2 ຝ່າຍ ແລະ ຫລາຍຝ່າຍ.
ກ່ອນໜ້ານັ້ນ, ກ່າວຄຳເຫັນທີ່ພິທີໄຂ, ທ່ານນາຍົກລັດຖະມົນຕີ ຍີ່ປຸ່ນ Shinzo Abe ໄດ້ສົ່ງສານເຖິງທົ່ວກອງປະຊຸມໂດຍຫວັງວ່າ: ທັງແມ່ຍິງ ແລະ ຜູ້ຊາຍພ້ອມກັນມານະພະຍາຍາມສ້າງສັງຄົມທີ່ມີປະໂຫຍດ, ເຊິ່ງໃນນັ້ນ ຕ້ອງເສີມຂະຫຍາຍບົດບາດ ແລະ ຄວາມສາມາດຂອງແມ່ຍິງ. ທ່ານນາຍົກລັດຖະມົນຕີ Abe ກໍໃຫ້ຄຳໝັ້ນສັນຍາຈະສະຫງວນແຫຼ່ງທຶນ ODA ປະມານ 4,2 ຕື້ເຢັນ ເພື່ອມຸ່ງໄປເຖິງສັງຄົມເສີມຂະຫຍາຍໄດ້ບົດບາດຂອງ ແມ່ຍິງໃນທົ່ວໂລກ. ນີ້ແມ່ນຄັ້ງທີ 2 ຍີ່ປຸ່ນ ຈັດຕັ້ງກອງປະຊຸມສະພາທົ່ວໂລກເພື່ອແມ່ຍິງ, ດຳເນີນໃນລະຫວ່າງວັນທີ 28 – 29/8. ກອງປະຊຸມໄດ້ດຶງດູດການເຂົ້າຮ່ວມຂອງຜູ້ແທນກ່ວາ 1.300 ທ່ານ ໃນນັ້ນມີການນຳປະມານ 140 ທ່ານທີ່ມາຈາກ 40 ປະເທດ, ພາກພື້ນ ແລະ ອົງການຈັດຕັ້ງສາກົນ 7 ແຫ່ງ.