(ພາບປະກອບ)
(vovworld) - ວັນທີ 1/4, ຄະນະປະຈຳປະຊາທິປະໄຕ ແລະ ສິດທິມະນຸດ ຈັດຕັ້ງກອງປະຊຸມສຳມະນາດ້ວຍຫົວຂໍ້ວ່າ: “25 ປີແຫ່ງສົນທິສັນຍາກ່ຽວກັບສິດຂອງເດັກ: ຊີວິດຂອງເດັກນ້ອຍຈະດີກວ່າຫຼືບໍ“ ເພື່ອແນໃສ່ຫວນຄືນວິວັດການປັບປຸງຊີວິດການເປັນຢູ່ຂອງເດັກນ້ອຍໃນທົ່ວໂລກ. ບັນດາຜູ້ແທນໄດ້ສຸມໃສ່ປຶກສາຫາລືກ່ຽວກັບສິດຂອງເດັກໃນໄລຍະປະຈຸບັນ ແລະ ເນັ້ນໜັກເຖິງເລື່ອງສົ່ງເສີມສຸຂະພາບໃຫ້ເດັກ, ສິດຂອງເດັກ, ບັນດາຜົນງານທີ່ບັນລຸໄດ້ ແລະ ຊີ້ອອກບັນດາການທ້າທາຍໃນຄວາມມານະພະຍາຍາມຢຸດຕິການໃຊ້ຄວາມຮຸນແຮງຕໍ່ເດັກນ້ອຍ; ເນັ້ນໜັກບັນດາປະເທດຢູ່ໃນໂລກຕ້ອງມີພັນທະປົກປ້ອງເດັກ, ນັບທັງດ້ານຮ່າງກາຍ ແລະ ຈິດໃຈ. ທ່ານ ຫງວຽນດັກວິງ, ເລຂາທີໜຶ່ງສູນກາງຊາວໜຸ່ມກອມມູນິດ ໂຮ່ຈີມິນ, ປະທານສະມາຄົມສະຫະພັນຊາວໜຸ່ມຫວຽດນາມ, ປະທານກຸ່ມສະມາຊິກສະພາແຫ່ງຊາດໜຸ່ມ, ສະມາຊິກຄະນະຜູ້ແທນຫວຽດນາມ, ໃຫ້ຮູ້ວ່າ, ຫວຽດນາມ ໄດ້ມີຄວາມມານະພະຍາຍາມຫຼາຍຢ່າງ ເພື່ອປະຕິບັດຂໍ້ກຳນົດໃນສົນທິສັນຍາ ກໍ່ຄືບັນດາຂໍ້ສະເໜີຂອງກຳມາທິການກ່ຽວກັບສິດຂອງເດັກ; ປະຕິບັດພັນທະລາຍງານ ແລະ ໂອ້ລົມສົນທະນາກ່ຽວກັບສະພາບການປະຕິບັດສົນທິສັນຍາ ແລະ ອະນຸສັນຍາເພີ່ມເຕີມສອງສະບັບ. ລັດຖະທຳມະນູນຫວຽດນາມ ສະບັບປັບປຸງປີ 2013 ໄດ້ລະບຸບັນດາສິດຂອງເດັກຢ່າງຄົບຖ້ວນ. ແລະ ກໍ່ຢູ່ທີ່ກອງປະຊຸມ, ຄະນະຫວຽດນາມ ໄດ້ສະເໜີຄວນເພີ່ມທະວີການແລກປ່ຽນບົດຮຽນໃນການປະຕິບັດສິດຂອງເດັກລະຫວ່າງປະຊາຊາດ ເພື່ອຊອກຫາມາດຕະການແກ້ໄຂບັນຫາເດັກນ້ອຍພາຍໃນປະເທດໃຫ້ເໝາະສົມ; ເພີ່ມທະວີການລົງທຶນແຫຼ່ງກຳລັງໃຫ້ວຽກງານເດັກ.