(vovworld)- ໃນວັນທີ 28/7, ອິນໂດເນເຊຍ ຈັດກອງປະຊຸມຂັ້ນສູງຊັບພະຍາກອນທາງນ້ຳອາຊີຕາເວັນອອກ ແລະ ປາຊີຟິກ. ນີ້ແມ່ນການພົບປະສົນທະນາຫຼາຍຂະແໜງລະຫວ່າງ ບັນດາຝ່າຍຂັ້ນສູງທີ່ກ່ຽວຂ້ອງເຖິງຂະແໜງສິນໃນນ້ຳ ກັບບັນດາຜູ້ຕາງໜ້າລັດຖະບານ, ບໍ່ຂື້ນກັບລັດຖະບານ, ອົງການການເງິນ ແລະ ວິທະຍາສາດ. ກອງປະຊຸມແມ່ນໂອກາດ ເພື່ອໃຫ້ແຕ່ລະຝ່າຍ ໄດ້ສະແດງທັດສະນະ ແລະ ບັນດາມາດຕະການແກ້ໄຂທີ່ຈຳເປັນ ເພື່ອແນໃສ່ປ່ຽນແປງ, ພັດທະນາອາຊີບຫາປາແບບຍືນຍົງ, ທັງກ່ຽວກັບຂໍ້ກຳນົດ ແລະ ການລົງທຶນ. ຄະນະຜູ້ແທນຫວຽດນາມ ໂດຍ ທ່ານ ຫວູວັນຕ້າມ ຮອງລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ນຳໜ້າໄດ້ເຂົ້າຮ່ວມ.
ທີ່ກອງປະຊຸມ, ບັນດາຜູ້ແທນເຫັນດີເປັນເອກະພາບ ການປະຕິຮູບຊີບຫາປາທີອາດສາມາດຊຸກຍູ້ບັນດາຜົນງານ ຂອງຂະແໜງສິນໃນນ້ຳອາຊີພາກພື້ນອາຊີຕາເວັນອອກສຽງໃຕ້-ປາຊີຟິກ ແລະ ຊຸກຍູ້ຂະແໜງນີ້ ໃຫ້ພັດທະນາແບບຍືນຍົງ. ຄຽງຄູ່ກັບບັນດາຄວາມມານະພະຍາຍາມ ເພື່ອປະເຊີນໜ້າກັບການຈັບຫາປາຢ່າງຜິດກົດໝາຍ, ບັນດາລັດຖະບານ ຈຳເປັນຕ້ອງຄຸ້ມຄອງ ຢ່າງແໜ້ນແຟ້ນ ເພື່ອຫຼີກຫຼ້ຽງສະພາບການຂຸດຄົ້ນສິນທະເລເກີນຂອບເຂດ ຫຼື ນຳໃຊ້ບັນດາມາດຕະການຂຸດຄົ້ນແບບດັບສູນ, ແນໃສ່ສະກັດກັ້ນການທຳລາຍ ລະບົບນິເວດທາງທະເລ. ໃນໂອກາດນີ້, ບັນດາເຈົ້າໜ້າທີ່ກໍ່ປຶກສາຫາລື ກ່ຽວກັບບັນຫາຢັ້ງຢືນຕົ້ນກຳເນີດຂອງຜະລິດຕະພັນສິນໃນນ້ຳ, ໃນນັ້ນ ມີການໃຫ້ຄຳໝັ້ນສັນຍາຕໍ່ຕ້ານການຈັບຫາປາຢ່າງຜິດກົດໝາຍ (IUU).